„Ели Лили“ очекува силен раст на продажбата, ривалот „Ново Нордиск“ разочара

„Ели Лили“ (Eli Lilly & Co.) во средата даде оптимистичка прогноза за продажбата за годинава, откако силната побарувачка за нејзиниот лек за слабеење ја зацврсти позицијата на компанијата како лидер на пазарот за лекови против дебелина.

Прогнозата е сосема спротивна од онаа на ривалот „Ново Нордиск“ (Novo Nordisk A/S), кој во вторникот ги предупреди инвеститорите дека продажбата може да падне до 13 отсто годинава поради засилената ценовна конкуренција на пазарот за лекови за слабеење. „Ели Лили“, пак, очекува продажбата да порасне до 27 отсто годинава.

Акциите на „Ели Лили“ пораснаа за 9,1 отсто во 8:07 часот наутро во Њујорк, пред почетокот на редовното тргување.

Има неверојатна побарувачка за лековите за слабеење, а „Ели Лили“ и „Ново Нордиск“ се борат со конкуренцијата од онлајн здравствени компании што продаваат поевтини копирани верзии. Американскиот претседател Доналд Трамп исто така го постави намалувањето на трошоците за лекови како клучен приоритет, а двата производитела склучија договори за понуда на пониски цени како резултат на тоа.

„Ели Лили“ е во релативно посилна позиција од „Ново Нордиск“ затоа што неговите блокбастери „маунџаро“, против дијабетес, и „зепбаунд“, против дебелина, имаат уште една деценија патентна заштита. „Ели Лили“ исто така беше поактивна во борбата против конкуренцијата со копирани верзии. Во меѓувреме, лековите на „Ново Нордиск“ уште од оваа година ќе се соочат со генеричка конкуренција во некои земји.

„Ова е уште еден доказ дека тие доминираат во оваа категорија“, рече Џаред Холц од „Мизухо“ (Mizuho), осврнувајќи се на позицијата на „Ели Лили“ на пазарот за лекови против дебелина. „‘Ново’ заостанува и сите го знаат тоа.“

„Ели Лили“ стана шампион во лековите за слабеење
Вкупните рецепти за „зепбаунд“ го надминаа „вегови“ на „Ново“ во 2025 година

Bloomberg

„Ели Лили“ денеска соопшти дека продажбата за целата година ќе изнесува од 80 до 83 милијарди долари, надминувајќи ја просечната процена на Волстрит од 77,7 милијарди долари. Компанијата очекува приспособена добивка за 2026 година во опсег од 33,50 до 35 долари по акција, во споредба со 33,08 долари по акција колку што очекуваа аналитичарите.

Производителот на лекови очекува пазарот за лекови против дебелина дополнително да се прошири годинава, откако администрацијата на Трамп се согласи да ги покрива таквите лекови за повеќе пациенти преку „Медикер“ (Medicare), владината здравствена програма за постари лица.

„Ели Лили“ исто така чека одобрување за својата таблета за слабеење, кое би можело да пристигне уште во април. „Ново“ оваа година лансираше апче за слабеење што имаше силен почеток. Во четирите недели од лансирањето, повеќе од 170.000 пациенти ја зеле таблетата, изјави извршниот директор на „Ново“, Мајк Даустдар, во интервју за „Блоомберг ТВ“ (Bloomberg TV) во вторникот.

„Ели Лили“ е подготвена брзо да реагира во конкуренцијата. Компанијата веќе произведе милијарди дози од оралниот лек пред неговото лансирање. Таа соопшти дека најниската доза од таблетата, доколку биде одобрена од Американската администрација за храна и лекови, ќе чини 149 долари месечно.

Производителот на лекови продава и нова верзија на „зепбаунд“ со повеќекратни дози, потег што ѝ помогна на „Ели Лили“ да го обезбеди договорот со Трамп. Претходно, „зепбаунд“ беше достапен во САД во две различни форми: мало шишенце за еднократна употреба и автоинјектор со една доза, кои се фрлаат секоја недела по употребата. Во писмо со датум од 20 јануари, Американската администрација за храна и лекови ѝ даде зелено светло на компанијата да го продава „зепбаунд“ во уред што содржи количество на лек за еден месец.

Финансискиот директор на „Ели Лили“, Лукас Монтарс, изјави дека компанијата планира да го пласира пенкалото со повеќекратни дози на пазарот во следните 30 дена. Лекот ќе биде опција за пациентите на „Медикер“ кога програмата ќе почне да ги покрива трошоците за терапијата. Монтарс додаде дека компанијата планира да го понуди пенкалото и преку директната платформа на „Ели Лили“ за продажба на потрошувачите, каде што пациентите можат да плаќаат за лековите во готово.

Силното портфолио на постојни и идни лекови ѝ помага на „Ели Лили“ да стекне предност пред ривалот „Ново“, дури и во услови на ценовен притисок што ја погодува целата индустрија, напиша аналитичарот на БМО (BMO Markets) Еван Сајгерман.

„Иако ‘Ели Лили’ и ‘Ново’ настапуваат на истите пазари, притисоците со кои се соочуваат не се идентични“, рече Сајгерман.

„Зепбаунд“ на „Ели Лили“ се покажа како поефикасен од „вегови“ на „Ново“, што дополнително ѝ дава предност на фармацевтската компанија со седиште во Индијана. Во директна споредбена студија минатата година, „зепбаунд“ им помогна на пациентите да намалат околу два инча повеќе од обемот на половината во однос на „вегови“.

Нови лекови

Компанијата тестира и нови, потенцијално поефикасни лекови за слабеење за различни состојби. Нејзината следна генерација инјекција за слабеење „ретатрутид“ (retatrutide), на пример, е во клинички испитувања за дебелина и други поврзани состојби, како кардиоваскуларни заболувања и хронична бубрежна болест. Во декември „Ели Лили“ соопшти дека лекот им помогнал на пациентите да изгубат речиси една четвртина од телесната тежина, што би можело да го направи експерименталниот лек за слабеење најмоќниот досега.

„Ели Лили“ започна и нови студии за „бренипатид“ (brenipatide) - експериментален лек што ги имитира истите хормони како „зепбаунд“ кај нарушувања поврзани со употреба на тутун, биполарно нарушување и астма. Компанијата веќе го испитуваше лекот и кај нарушувања поврзани со употреба на алкохол.

Додека „Ново“ е фокусирана речиси исклучиво на дијабетес и дебелина, портфолиото на „Ели Лили“ опфаќа и други области, вклучувајќи ги невронауката, имунологијата и ракот. Компанијата доби одобрување за нов лек за забавување на Алцхајмеровата болест во 2024 година, наречен „кисунла“ (Kisunla). Таа исто така проучува уште едно експериментално соединение за Алцхајмерова болест, „ремтернетуг“ (remternetug), за кое резултати би можеле да има во текот на оваа година.

Во четвртиот квартал, продажбата на блокбастер-инјекцијата за слабеење „зепбаунд“ изнесуваше 4,3 милијарди долари, во споредба со процените од 3,8 милијарди долари. Лекот против дијабетес „маунџаро“ достигна 7,4 милијарди долари, наспроти процените од 6,7 милијарди долари. „Маунџаро“ станува сè попопуларен и надвор од САД, каде што приходите достигнаа 3,3 милијарди долари.

Вкупно, „Ели Лили“ оствари продажба од 19,3 милијарди долари во кварталот, надминувајќи ја просечната процена на аналитичарите од 18 милијарди долари. Добивката на компанијата изнесуваше 7,54 долари по акција, над очекувањата од 6,73 долари по акција.

„Ели Лили“ соопшти дека оваа година очекува глобално намалување на цените во ниските до средните двоцифрени проценти, делумно поттикнато од договорот со американската влада за пониски цени на лековите и новите цени за директно плаќање во готово.