Амансио Ортега оваа година ќе инкасира околу 3,2 милијарди евра (3,7 милијарди долари) дивиденда од сопственикот на „Зара“, „Индитекс“ (Inditex SA), што е најголемата исплата што милијардерот ја добил од малопродажниот гигант што го коосновал пред повеќе од шест децении.
„Индитекс“ во средата соопшти дека планира оваа година да ја зголеми дивидендата за 4 отсто, на 1,75 евро по акција. Ортега, чија ќерка Марта е неизвршна претседателка на компанијата, е најголемиот акционер на групацијата, со повеќе од 59 отсто удел, главно преку неговата семејна канцеларија „Понтегадеа инверсионес“ (Pontegadea Inversiones).
Ортега (89) има нето-богатство од околу 126,7 милијарди долари, што го прави 15-от најбогат човек во светот, според индексот Bloomberg Billionaires. Акциите на „Индитекс“ пораснаа за 33 отсто во последните две години и достигнаа рекордно ниво во февруари. Со пазарна капитализација од 167,6 милијарди евра, компанијата е најголемиот јавно листиран трговец со облека во светот.
Ортега најчесто го користи поголемиот дел од дивидендите за купување недвижности, главно луксузни деловни и станбени објекти во големи градови. „Понтегадеа“ исто така инвестира во проекти за обновлива енергија, како и во инфраструктура за електрична енергија, гас и телекомуникации.
Токму овие купувања му донесоа на Ортега сопственост врз познати објекти како зградата „Хаугвут“ во Њујорк, „Саутиист“, финансискиот центар во Мајами, „Ројал банк плаза“ во Торонто и зградата „Пост“ во Лондон.
Минатиот месец „Понтегадеа“ се приклучи на конзорциум предводен од „Меквари“ (Macquarie Asset Management) за купување на операторот за пристаништа и железници „Кјуб холдингс“ (Qube Holdings Ltd.) во договор вреден околу 11,7 милијарди австралиски долари (8,3 милијарди долари).
Минатата година семејната канцеларија на Ортега се согласи да ја купи зградата „Пост“ во центарот на Ванкувер, комплекс со две кули изнајмен на „Амазон“ (Amazon.com Inc.), а плати и повеќе од 105 милиони долари за „Атлас плаза“ во Мајами. Компанијата исто така купи 49 отсто удел во британската „ПД портс“ (PD Ports).
.webp){kind=icon}
