Наумоски: Македонија не е загрозена од случајот Кредит Суис

Случувањата со Кредит Суис немаат директни последици врз македонската монетарна економија, вели во интервју за „Блумберг Адриjа“, универзитетскиот професор Синиша Наумоски, оценувајќи ја историската фузија меѓу УБС и Кредит Суис како позитивна вест, бидејќи вели стабилноста повторно се враќа.

Тој посочува дека овој случај, како и пропаѓањето на неколку американски финансиски институции нема да имаат директни последици врз нашиот систем, бидејќи е позициониран на традиционалното банкарство. 

„Изложеноста на македонскиот банкарски систем е некаде 5 до 6,6 проценти што значи дека нашето портфолио е диверзифицирано и не зависи толку во однос на ризичните обврзници. Нашиот банкарски систем има традиционален деловен модел и нема да има директна загрозеност, но секако мора да сме внимателни.“, вели Наумоски.