Корупцијата и сивата економија остануваат на врвот на листата на главни кочници за бизнис-секторот, посочуваат од Стопанската комора на Македонија (СКМ).
Претседателот на СКМ, Бранко Азески, не е голем оптимист за 2024 година, бидејќи, според него, основните проблеми за стопанството и натаму се присутни. Приоритетите за решавање на она што најмногу му е потребно на бизнисот, тој ги сумира во неколку потточки.
„На прво место се корупцијата сконцентрирана во врвот на јавната администрација и високата стапка на сивата економија, понатаму следува прашањето со завршување на процесот на гасификација, со цел намалување на цените, поддршка на извозно ориентираните компании, понатаму решавање на нерегулираните онлајн медиуми и нивното нерегистрирање како трговски друштва, што создава голем проблем, и како петти приоритет го ставаме наоѓањето начин градежните дозволи да се издаваат најбрзо што може и да бидат ограничени со одреден рок...“, вели Азески во интервју за „Блумберг Адрија“.
Според Азески, наредната година ќе донесе стагнација на бизнис-секторот, земајќи го предвид изборниот период, а потенцира и дека сè уште се присутни и ризиците од надворешните влијанија.
Bloomberg Adria
„Јас не гледам решение, и ние како бизнис-заедница не гледаме решение ниту на кризата во Украина ниту на состојбите што се случуваат во ЕУ и во Германија, кои може да се прелеат и на друго место. Знаете дека јужните моќни земји на ЕУ се во длабоки долгови, сето тоа ме ограничува да размислувам дека, и покрај максималните напори што може да ги направиме, прашање е дали ќе постигнеме резултати. А дали правиме максимални напори, тоа ве убедувам дека не. Мислам и дека ќе имаме изгубени шест месеци во периодот на изборите, а потоа, како и секоја друга работа, ќе помине период на усогласување, во кој ќе видиме дали си се ’допаѓаме’ со новата влада и ќе губиме време на тоа. Во секој случај бизнисот нема да запре, но ќе забави. Во втората половина од 2024 година може да добие импулс, со новата влада може повторно да се појави еден ентузијазам што е важен за нас, меѓутоа треба да ни е јасно дека темелите на кои почива оваа работа се проблематични. Јас би бил многу внимателен во давањето процени за наредната година, мислам дека ништо нема да се смени. Што се однесува на нас и состојбите што јас ги познавам на планот за нашето задолжување, на реалната состојба, на начинот на кој ги изведуваме изборите, ќе имаме сериозни проблеми, затоа што непотребно се греат некои кампањи што одат против бизнисот во делот на спроведувањето на пазарната економија, владеењето на правото итн. Така што има повеќе опасности отколку предности што ги носи идната година“, вели првиот човек на Стопанската комора.
Од позицијата на претседател на Асоцијацијата на балкански комори, пак, Азески вели дека инфраструктурата ќе биде главен приоритет во 2024 година за поврзување на земјите од Западен Балкан и зголемување на регионалната соработка.
Тој посочува дека во наредниот период дека ќе се прави скенирање на состојбите и потребите на терен, а она што ќе биде главен фокус е железничкиот транспорт.
„На планот на инфраструктурата не направивме голем исчекор, освен коридорот 10 што поминува низ државите. За да биде сè поставено како што треба, во наредниот период ќе направиме скен на територијата на десетте држави во поглед на инфраструктурното поврзување - што имаме во моментот, што е планирано и што ни треба нам како бизнис-заедница за да ги зголемиме трговијата и регионалната соработка. Агендата е со претставниците на Светската банка и ЕБРД да разговараме во јануари, а во јуни да ги повикаме претседателите на владите на сите 10 земји, за кои би имале конкретни барање и би поттикнале таква инвестициска активност. Особено тука имаме голем заостаток кај железницата, која е главното превозно средство за големите товари на Балканот, и мислам дека целосна програма што ќе ги скенира моменталната состојба и проекциите ќе претставува една основа и на крајот на годината ќе може да кажеме дека навистина сме направиле нешто за компаниите на тој план“, вели Азески.
.webp){kind=icon}
