Какви автомобили возат македонските и бизнисмените од регионот

Деловните луѓе и менаџерите во регионот најчесто се возат во лимузини, во кои патувањето е удобно, економично и безбедно. Сè повеќе од нив се одлучуваат за спортски теренски возила СУВ (SUV). Електричните автомобили сè уште се возат ретко. Тоа веројатно е поврзано со несоодветната инфраструктура во голем дел од регионот.

Што возат бизнисмените и менаџерите често е тајна, бидејќи, на пример, особено во Србија, тие не сакаат да се истакнуваат и да зборуваат за својот имот. Тоа често е случај и во Македонија. Сепак, успеавме да собереме некои од најинтересните примери и да разговаравме со менаџери, кои со нас споделија какви автомобили возат. И, секако, имаме интересни податоци. Еден македонски директор вози скутер до работа, милионер вози само спонзорирани автомобили, а воопшто нема сопствен автомобил, но имаме и менаџер што има неколку многу скапи автомобили, за кои всушност нема време да ги вози. Во целата приказна има и такви што поседуваат авиони.

На прв поглед се чини дека хрватските бизнисмени се тие што имаат доста богат возен парк, иако мораат да одвојат повеќе пари за автомобили поради повисоките даноци. Купувањето ново или користено возило во Хрватска може да поскапи и до 20 отсто поради дополнителните трошоци. Покрај данокот на додадена вредност (ДДВ), плаќаат и данок чија висина зависи од издувните гасови и од вредноста на возилото. Идентичен дизел „фолксваген голф“ (Volkswagen Golf), кој во Хрватска чини 29.100 евра, во Србија е 25.600 евра, во Словенија 26.000 евра, а во Босна и Херцеговина приближно 25.600 евра. Уште поскапо е во Северна Македонија, каде што цената е 31.400 евра. Повисоките даноци, барем судејќи според возниот парк, не ги одвраќаат претприемачите да купуваат поскапи автомобили.

Каков е возниот парк на македонските бизнисмени

Лимузини од повисоката класа, „мерцедес С класа“ (S class), „ауди“ (Audi Q8) - вакви возила го сочинуваат возниот парк на дел од македонските менаџери. И додека сопственик на компанија што има возен парк од над два милиони евра зборува со гордост за своите автомобили, има и такви Македонци што не сакаат да откриваат што купиле и колку пари ги чинело тоа задоволство. А нема некоја причина возилото да е тајна, особено ако даночните обврски биле целосно намирени.

Златко Муцунски е еден од познатите менаџери во Македонија, но тој е и човек од автомобилската индустрија - долгогодишен прв човек на „Порше Македонија“ (Porsche Macedonia). Го прашавме прво каков автомобил вози тој, но и какви автомобили купуваат неговите муштерии од редот на директорската фела. Муцунски вели дека не штедат - тие што имаат пари ги трошат на возила од повисоките сегменти. Тоа, ако можеме да забележиме, па и не е некоја финансиска ставка за нив.

Златко Муцунски

„Македонските менаџери во принцип возат лимузини од повисоката класа, ’фолксваген пасат’ (Volkswagen Passat), ’шкода суперб’ (Skoda Superb) или ’ауди А4’ (Audi A4). Сопствениците на компании се решаваат за повисоките сегменти, па возат ’ауди’ (Audi A6, Audi Q5, Q7 или Q8), но и ’порше панамера’ (Porsche Panamera) или ’порше кајен’ (Porsche Cayenne). Сакале да признаеме или не, возилата секако се статусен симбол во општеството. Така што секој би го возел тоа што може да си го дозволи. Со појавата на лизинг-финансирањето полесно е да се набави полуксузно возило, без притоа да се оптоварат билансите на компанијата“, вели Муцунски.

Тој, се разбира, најчесто се вози во службениот автомобил кој всушност и го промовира - го вози само по три месеци и тоа е најновиот автомобил и највисокиот во класата.

„Моите службени возила се вообичаено од премиум-сегментот - ’ауди’. Истите тие им ги продаваме потоа на заинтересирани клиенти“, вели Муцунски.

„Масерати“ најголема љубов

За Кочо Анѓушев во Македонија знаат сите. Бизнисменот што важи за еден од најбогатите по потекло е од Велес. Се проба и во политиката, но тој за себе вели дека е роден да биде бизнисмен. А почнал како автомеханичар, од каде што вели ја носи и љубовта кон добар автомобил. Во моментов приватното возило му е од брендот БМВ (BMW). Станува збор за „БМВ 7 740l“, кое е старо година и половина. Има и „БМВ ренџ ровер аутобиографи“ (BMW Range Rover Autobiography). Службеното возило, кое е регистрирано на компанијата со која раководи „Фероинвест“, е „БМВ 5 520d“ (BMW 5 520d).

БМВ, Кочо Анѓушев

Анѓушев вели дека возило што му правело најголем мерак е „масерати“ (Maserati), какво што имал до пред една година.

„Имав ’масерати’ од 2012 година, но некако се почувствував стар за него (се смее) и го продадов минатата година. Јас не ги кријам моите возила, а сопствен автомобил имаат и двете деца и сопругата“, вели Анѓушев.

Милионската флота на македонскиот градежник

Бизнисмен од градежниот сектор со кој поразговаравме ни откри дека неговиот возен парк тежи два милиони евра. Фатмир Етеми е сопственик на градежната компанија „ЗСФ ком“ и еден од акционерите во Комерцијална банка. Тој има два „мерцедеса“ од класата С. Едниот е „С класа 350“ (S class 350), другиот е „С класа мајбах“ (S class 400 - Maybach).

„Сакам луксузни автомобили. Уживам во нив. Освен овие два ’мерцедеса’, имам и други автомобили и еден џип ’мерцедес Г класа’. Го возам кога одиме во странство“, вели Етеми.

Менаџер што се колне во мотори

Но приказната за македонските менаџери има и друга слика кога станува збор за превозното средство. Душан Пецовски е генерален директор на фармацевтската компанија „Реплек“. Тој за „Блумберг Адрија“ изјави дека нема службен автомобил и дека воопшто не користи, туку на работа оди со сопствен превоз, но тоа е најчесто мотор (веспа или скутер).

Душан Пецовски

„Љубител сум на две тркала, бидејќи возењето под отворено небо ми дава чувство на слобода, независност и адреналин, во кои јас уживам. Секако, носам задолжителна опрема, како шлем, кожена јакна и штитници“, вели Пецовски.

Инаку, кога би избирал идеален автомобил за себе, вели дека е најважно да нема покрив.

„Мој избор би бил кабрио-модел, да можам да го гледам небото и да уживам во воздухот и ветерот додека се возам. Тоа за мене е неповторливо чувство. Мој избор би бил олдтајмер кабриолет, од типот ’сааб’, ’буба’, ’мини морис’ и ’фијат’“, додава Пецовски.

Не купив куќа или јахта, купив автомобили

Кога зборуваме за бизнисмени и автомобили во регионот, приказната мора да ја започнеме со Мате Римац. Тој за неколку години стана еден од најбараните луѓе во автомобилската индустрија. Речиси сите европски производители сакаат да соработуваат со него или со неговата компанија, која е специјализирана за електрични системи со високи перформанси. Тој, пак, многу отворено зборува за своите компании и автомобили. Со инвестициите на производителите на автомобили како „Порше“ и „Хјундаи“, како и инвестициските банки „Софтбанк“ (Softbank) и „Голдман Сакс“ (Goldman Sachs), неговата компанија стана една од највредните во овој дел од Европа. Во последните пет години од инвеститорите инкасирал повеќе од 800 милиони евра.

Денес неговата колекција на автомобили е доста импресивна, но уште пред да вози автомобил имал скутер, кој, како што вели, многу му значел. Сеќавајќи се на времето кога возел мотор „дукати“, често знае да се пошегува дека му е мило што е жив. Неговиот прв автомобил бил „шкода октавија“ (Skoda Octavia). Она што е интересно за него е што до неодамна немаше голема колекција на автомобили. Но кога продал мал удел во компанијата, почнал да купува и автомобили. „Не купив куќа или јахта, туку автомобили“, рече тој во интервју за српската ТВ-емисија САТ. За само две години тој создаде една од највредните колекции на автомобили во овој дел од Европа.

Гледајќи ги автомобилите што ги поседува, јасно е дека на Римац му се блиски возилата од БМВ. За себе купил купе БМВ (BMW Z4 M) и спортски мотоцикл „дукати панигејл“ (Ducati Panigale).

Како службено возило неколку години користел „ауди А8“, кое го заменил со „БМВ М5“. Пред тоа возел и „БМВ М6“. Иако неговата компанија е специјализирана за производство на моќни електрични системи и електрични автомобили, Мате Римац не поседува електричен автомобил. Според неговите зборови, тој е љубител на автомобили, но поседува само „бензинци“.

Негов автомобил од соништата бил „БМВ M3“ од 1990 година. Но, кога конечно го купил, неговиот ентузијазам за него не траел долго, бидејќи, како што вели, брзо се навикнал на модерни и брзи автомобили. „Штом возите ’невера’, сите други автомобили се бавни“.

Денес има колекција на многу скапи автомобили. Хибрид на „ферари СФ90“ (Ferrari SF90) со илјада коњски сили, друго „ферари ГТС“ (Ferrari 812 GTS), кое особено му се допаѓа и вели дека звучи неверојатно. Купил и „мерцедес СЛР мекларен“, чија слика имал закачено на ѕидот како дете.

Најскапите автомобили во неговата колекција се „порше карера“ (Porsche Carrera GT) и „бугати чирон спорт“ (Bugatti Chiron Sport). Само „чиронот“ чини 3,2 милиони евра, а со хрватските даноци цената е блиску до пет милиони евра. Денес „карера“ вреди повеќе од милион евра, додека секое од споменатите „ферари“ вреди најмалку половина милион евра.

Нарачал и „римац невера“. „Купив ’невера’ и ’бугати’, но не добив ни евро попуст на нив. Не ни побарав. Никој не може да добие попуст, дури ни јас“, изјави тој за САТ (SAT). Кога во колекцијата ќе ја додадеме и „невера“, вкупната вредност на неговиот возен парк, според нашата процена, ќе биде близу 10 милиони евра.

Неговиот список со желби е сè уште доста долг. На листата му се и егзотични автомобили што ја користат технологијата на неговата компанија, како што се „коингисег регера“ (Koenigsegg Regera), „астон мартин валкири“ (Aston Martin Valkyrie) и „пинифарина батиста“ (Pinifarina Battista).

Римац признава дека речиси никогаш не ги вози автомобилите што ги поседува, бидејќи е премногу зафатен.

Трговец со недвижности што не сака премногу внимание

Сопственикот на „Оперета“ (Opereta), најголемата агенција за недвижности во Хрватска, Боро Вујовиќ се вози во официјалното „БМВ Х4“ (BMW X4). Го избрал, вели, затоа што е пристојно и има стил. „Сакав да биде поинаку, купе, ново и необично, но не премногу агресивно. Не сакав модел што ќе привлекува премногу внимание, туку добар и безбеден автомобил – значи ’Германец’“, ни изјави Вујовиќ. „Оние што се разбираат, препознаваат дека тоа е добар автомобил, а оние што не разбираат, не треба ни да знаат“, продолжува тој. За модел како неговиот е потребно да се издвојат од 60 до 100 илјади, евра во зависност од опремата.

Тој истакнува дека при изборот на автомобил најважно му е да седи високо, како теренец. Повеќе му одговара на подолгите патувања и е поудобно од моделите каде што седи ниско или, како што вели, лежи. „Многу често сум на пат, па ми се допаѓа видливоста. Исто така ми е важно да е дизел или хибрид поради заштедата на гориво“.

Сопствен автомобил нема, секогаш користи службен, бидејќи, како што посочува, практично каде и да оди, прави нешто за компанијата. „Но кога би можел да изберам нешто за моја душа, мојот автомобил од соништата, тоа би било ’ферари’ или ’мекларен’. Тоа не е за секој ден, туку за уживање“, смета Вујовиќ, додавајќи дека ’ферарито’ му паднало во очи бидејќи го вози поранешниот хрватски фудбалер Марио Манџукиќ, со кого игра тенис.„Навистина одличен автомобил“, заклучува тој.

Хрватски банкар со вистинска авторизница во Осиек

Еден од најголемите колекционери на автомобили во Хрватска е Бранко Остовиќ, банкар од Осиек. За време на поранешна Југославија, тој се занимаваше со рели-трки, а се збогати со продажбата на „Соник банк“ (Sonic Bank) во 2006 година. По продажбата ретко е во медиумите, но кога се појавува, најчесто тоа е поради неговата колекција на автомобили, која е една од најголемите во Југоисточна Европа. Освен што донира пари во добротворни цели, негова голема страст се и автомобилите. Остовиќ вели дека во својата колекција има повеќе од 30 автомобили. Пред неколку години во својата гаража пушти новинарка од порталот „24 сата“ и ѝ рече: „Некој има акции, а некој друг има колекција на автомобили што може да ги продаде ако треба“.

classicdriver.com

Посебно место во неговата колекција има брендот „Ролс ројс“ (Rolls Royce). Кога британскиот бренд почна да го продава најновиот ’фантом’ (Phantom) во 2018 година, Остовиќ беше еден од првите клиенти. Тој во моментов го продава за 380 илјади евра преку веб-страницата „Класик драјвер“ (Classic Driver).

classicdriver.com

Ознаките на праговите - неговото име и презиме - покажуваат дека автомобилот е направен по нарачка од фабриката само за Остовиќ. Тој  поседува и претходна генерација на седанот „фантом“ и „фантом дропхед“ (Phantom Drophead), од кои само 30 беа произведени за колекционери за да ја одбележат стогодишнината од статуата на „Ролс ројс“. Пред неколку години на аукција во САД купи „ролс ројс силвер клауд“ ( Rolls Royce Silver Cloud) од 1956 година, кој претходно беше во сопственост на американскиот холивудски танчар Фред Астер, а кој моментално се продава на веб-страницата „Класик драјвер“ за 50 илјади евра. Има и „ролс ројс фантом“ (Rolls-Royce Phantom) од 1929 година.

classicdriver.com

Во колекцијата на Остовиќ има и „алфа ромео компетиционе“ (Alfa Romeo 8C Competizione), „јагуар Е-тајп роудстер“ (Jaguar E-type roadster и XK140), „ферари скалигети“ (Ferrari Scaligetti 612) од ограничена серија, „ферари 330 ГТ“(Ferrari 330 GT), „порше 911 спорт класик“ (Porsche 911 Sport Classic), „ламборџини авентадор“ (Lamborghini Aventador) и други. Тој исто така поседува „ферари 456“ (Ferrari 456), кој некогаш бил во сопственост на британскиот комичар Роуан Аткинсон. Пред многу години продаде неколку „ферари“ (Ferrari), „алфа ромео 8Ц спајдер“ (Alfa Romeo 8C Spyder) и винтиџ „мерцедес“ (vintage Mercedes). Не се знае точно што има во својата колекција денес, но ако на патиштата видите „ролс ројс“, „ферари“ или винтиџ „јагуар“ со осиечки регистарски таблички, речиси е сигурно дека е во сопственост на Бранко Остовиќ.

Верност кон „мерцедес“, вкочанет заден дел во „ферари“

Борис Жгомба, претседател на управниот одбор на хрватската туристичка компанија „Унилајн груп“ ( Uniline Group), пред два месеца доби нов бизнис „Мерцедес ГЛЕ“, кој го користи и приватно. Тој истакнува дека 17 години му е верен на брендот „Мерцедес“ и на шега додава дека за лојалноста кон марката треба да размислат да му дадат бесплатно. Самиот вели дека при купувањето автомобил прво гледа на безбедноста, а потоа на удобноста, бидејќи често во кариерата возел над сто илјади километри годишно.

Бидејќи се залага за одржлив туризам, избра и релативно одржливо возило. Станува збор за плагин (plug-in) хибрид со електричен досег од стотици километри. „Ова ми е сосема доволно за секојдневно градско возење. На малку подолги патувања, електричниот мотор го поддржува дизел-погонот, но 90 проценти од времето возам на струја“, објаснува тој.

Жгомба вели дека никогаш не сонувал за спортски автомобили. Секогаш се трудел да извлече најголема вредност за своите пари. „Возев ’ферари’ и можам да ви кажам дека тоа е најнепријатниот автомобил на светот. Вашиот задник е практично на асфалтот и го чувствувате секој удар во бубрезите. Тоа не е за мене“, рече тој. Жгомба го менува автомобилот во просек на секои четири години, а пред „мерцедес“ возел „ланчија“ и „БМВ М5“. Денес веќе не го интересираат такви возила.

Тој се сеќава дека неговите пријатели одамна му препорачале теренец со автоматски менувач. „Ми рекоа: Никогаш нема да се вратиш на стариот пат кога еднаш ќе го пробаш. И  беа во право. Се сеќавам дека во моето спортско БМВ, по долго патување, десната рака и левата нога ми беа вкочанети од менувачот и спојката, но кај автоматиката нема такво нешто“.

На крајот, тој сподели со нас една позната изрека меѓу менаџерите - оние што сè уште не успеале во бизнисот возат БМВ, а оние што веќе имаат успех возат „мерцедес“. „Има многу вистина во тоа“, заклучи тој.

Поминал милиони километри на струја

Саша Цветојевиќ, директор на хрватската компанија „Инсако“, специјализирана за дистрибуција на стоки за широка потрошувачка, долги години е лојален на „Тесла“. Тој бил еден од првите сопственици на нивниот автомобил во регионот, поминал милиони километри на струја и посочува дека нема намера да се врати на старите типови возила. Тој приватно вози „тесла модел С“ (Tesla Model S), но за деловни потреби штотуку купил „модел икс“ (Model X) во верзија „плејд“ (Plaid), со над илјада коњски сили, што гарантира моќ на забрзување.

„Она што го сметам за фасцинантно за ’Тесла’ и зошто никогаш не би го заменил за многу попознат бренд е леснотијата на користење. Нивниот кориснички интерфејс е тешко да му се опише некому што не го доживеал. Автомобилот всушност ги следи моите потреби кога ќе влезам во него наутро, знае каде одам затоа што е поврзан со мојот календар, знае кога одам затоа што ги следи моите навики, ме чека наутро загреан или изладен. Многу работи прави автоматски, кога ќе му пријдам ми ја отвара вратата, кога ќе влезам и ќе притиснам на кочницата ја затвора вратата. Кога ќе излезам од него, се става во режим на паркирање, се заклучува и слично“, опишува Цветојевиќ, додавајќи дека со сето тоа е исклучително забавно да се вози.

„Забрзувањето е нагло, нема турбодупка“, нагласува тој, истакнувајќи дека сè е доста добро и еколошки решено, бидејќи компанијата има полначи поврзани со соларни панели на покривот. Тој ни кажа дека ден пред разговорот бил домаќин на група деловни луѓе од целиот свет, кои имале можност да возат автомобили од висока класа, „ферари“, „ламборџини“, „порше“, „пагани“, но ништо не им се допаднало толку како моделот што моментално го поседува. Го изоставивме прашањето за неговиот автомобил од соништата, бидејќи очигледно тој веќе го вози.

Словенец со ретко „ферари“ вредно неколку милиони евра

Словенечките претприемачи поседуваат неколку интересни автомобили, но главно не се појавуваат во јавноста со нив. Но бидејќи Словенија е мала земја, сè се дознава многу брзо. На пример, познато е дека Јоже Коларич, првиот човек на фармацевтската компанија „Крка“, кој со бруто-плата од 1,3 милион евра е меѓу најдобро платените менаџери во Словенија, ѝ е верен на серијата 7 на БМВ (BMW).

Боштјан Шифрар, директор и сопственик на компанијата „Сибо Г“, која се занимава со развој и производство на амбалажа, поседува неколку спортски автомобили „мерцедес-бенц“. Од родстер СЛС АМГ (SLS AMG) до СУВ Г63 АМГ (SUV G63 AMG).

Најбогатиот Словенец Само Логин, коосновач на „Аутфит 7“ (Outfit7), кој пред неколку години беше продаден за речиси милијарда евра, е воздржан за својот приватен живот. Сепак, познато е дека сака да ги вози своите автомобили на тркачки патеки. Веќе е виден со „лотус елис С“ (Lotus Elise S), а наводно поседува и „порше 911 ГТ2 РС“ (Porsche 911 GT2 RS). Тој сè уште е сопственик на исклучително реткото тркачко „ферари Фхх-к Ево“ (Ferrari Fxx-k Evo) со број 37, вредно неколку милиони евра. Не смее да се вози по патишта, бидејќи е наменет само за возење на тркачки патеки. Логин учествуваше на две ексклузивни трки со овој редок модел во 2022 година.

Претприемач што нема автомобил, вози само автомобили спонзорирани од „Тојота“

Иво Боскарол, кој го освои светот со ултралесни авиони и основач на компанијата „Пипистрел“ (Pipistrel), која минатата година ја продаде за 218 милиони евра, гледа далеку во иднината кога станува збор за автомобилите. Така, тој беше еден од првите Европејци со хибриден „приус“ (Prius). „Мислам дека ја увезов првата ’тојота приус’ (Toyota Prius) во Европа. Прочитав статија дека ’Тојота’ произведе возило што регенерира енергија додека моторот работи во лер. Конечно некој што не троши енергија непотребно, помислив и отидов во ’Тојота’ да го порачам, но ме испратија во ’Хонда’ затоа што не ни знаеја дека таков модел воопшто постои. На крајот, всушност, првата генерација на ’приус’ ја увезов самиот од Јапонија“.

Тој ни раскажа за проблемите што ги имал со хомологацијата на автомобилот. „Седум месеци еднаш неделно одев во Љубљана за да ја регистрирам. Не можеа да ги измерат издувните гасови, бидејќи ’приусот’ забрзува на струја. Не можеа да ми стават дека има два мотора во возачката дозвола. Поради технички проблеми не можеа да го регистрираат автомобилот. Постојано возев со пробни таблички“. Сè додека не се смилуваа и не му дадоа нормални регистарски таблички.

Тој го возел „приусот“ четири години пред тој модел официјално да дојде во Словенија.

Toyota, STA

Кога првиот „приус“ плагин хибрид се појави на пазарот, тој беше еден од првите 25 прототипа во Европа по две години тестирање. Оттогаш, како што вели тој, вози хибридни „тојота“ (Toyota) и „лексус“ (Lexuses). „’Тојота’ повеќе нема во своето портфолио автомобили само на бензин. Тоа е филозофијата што ја имам и со авионите. Филозофијата на ’Тојота’ за лин-производство (анг. lean – намалување на отпадот при производство без да се намали продуктивноста), зачувување на природата, ставање на луѓето на прво место и колективна организација се применува и во ’Пипистрел’ (Pipistrel). Организирани сме како ’Тојота’“.

Боскарол вели дека возел многу различни автомобили. „На секои неколку месеци возам нов промотивен автомобил од ’Тојота’. Воопшто немам сопствен автомобил. Предноста е што секогаш ја возам најновата еколошка технологија и можам да го следам нејзиниот развој“. Моментално вози електрична „тојота БЗ4Х“ (Toyota BZ4X).

„Не се врзувам емоционално за автомобилот. Тој, пред сè, за мене е удобно превозно средство“.

За него е важно автомобилот да е ефикасен, технолошки напреден или опремен со технологии што помагаат во безбедноста и го олеснуваат возењето. „Во последно време, автомобил што ме освојува е ’лексус плагин хибрид NX450h+’. Во овој момент, кога би купил автомобил за себе, би купил плагин хибрид“.

Криптомилионер си купил „бентли“ за роденден

Еден од најбогатите Словенци, Дамиан Мерлак, коосновач на една од најстарите берзи за криптовалути во светот, „Битстамп“, не крие дека ги троши и ги инвестира своите милиони. Вредноста на неговиот имот се проценува на над 200 милиони евра. Заедно со акциите, луксузните недвижности и многубројните претприемачки потфати, во неговото портфолио значајно место имаат и автомобилите. Пред да стане милионер, тој возел „ситроен ксара“ (Citroen Xsara).

Кога го заработил својот прв милион, купил земјиште во Порторож и „тесла модел С“ (Tesla Model S). Тоа бил еден од првите автомобили „тесла“ на словенечките патишта. Оттогаш, сепак, им останал верен на автомобилите на бензин. Мерлак извесен период возел „мерцедес ЦЛА 45 АМГ“. Потоа купил „кадилак ескалејд“ (Cadillac Escalade), кој го има и денес. Не продал речиси ниеден свој автомобил. Најчесто се труди да направи нешто корисно со нив. На пример, „кадилакот“ го користел хотел во Бохињ за превоз на гостите од аеродромот.

Дамиан Мерлак

Оттогаш возниот парк му е збогатен со „БМВ З4“ (BMW Z4) и „ламборџини урус“ (Lamborghini Urus). Последно нешто што купил е „бентли континентал ГТ спид“ (Bentley Continental GT Speed), кој го купил за роденден и за него потрошил 400.000 евра. Најмногу го вози автомобилот „БМВ З4“, како што изјавил во интервју за „Атмосфера“. Загрижен е и внимава некој да не му го оштети неговото „бентли“, кое има посебна црна мат боја. Му пречи кога некого што го вози по паркирањето ја треска вратата. Во Дуба нема, туку користи Убер и други слични апликации за превоз.

Еден од најбогатите Срби сака брзина и бензински пумпи

Иако српските мултимилионери внимателно ја чуваат својата приватност, успеавме да најдеме интересни примери. Миодраг Костиќ, сопственикот на „МК груп“ и еден од најбогатите Срби, е љубител на автомобили на бензин. Во 2015 година тој беше забележан како вози „мерцедес С класа“ (Mercedes S-Class) во спортската верзија на С63 АМГ (S63 AMG). Како што призна пред многу години во едно од неговите интервјуа, покрај работата, страст му е и брзината. Неколку години подоцна, на настан на кој присуствувал, возачот го донел со „ауди А8 Л“ (Audi A8 L). Дека тие два автомобила навистина му припаѓаат на Костиќ навестуваа само регистарските таблички со ознака МК. Каков автомобил вози денес не успеавме да дознаеме. Освен автомобили, како што пренесуваа српските медиуми, тој поседува и авион.

Извесно време, наводно, тој поседувал еден од најпопуларните деловни авиони „цесна“ (Cessna 560 XL), кој може да прими до девет патници и има досег од 3.400 километри. Новите чинат над 10 милиони долари, а користените меѓу пет и седум.

Во претходните години, Костиќ помогна да се организира авионски превоз на деца за лекување во САД. Кога Крис долета од Словенија на лекување, Костиќ го понуди својот „гулфстрим Г450“ (Gulfstream G450). Според некои медиуми, авионот бил во сопственост на Костиќ. Не се знае дали навистина го поседува или го издава. До минатата година беше регистриран во Словенија, а денес е во регистарот на Малта. Официјален сопственик е „Хоплин инвестментс“ (Hopelyn Investments) од Британските Девствени Острови. Цената на нов авион од овој тип во времето кога се произведуваше беше над 40 милиони долари, а користените се движеа од 8 до 20 милиони долари.

Милијардерот што му подари дел од својата колекција антиквитети на принцот Алберт

Најбогатиот човек во регионот, чие богатство се проценува на пет милијарди долари, Филип Цептер, познат и како Милан Јанковиќ во Србија, ја изградил својата империја продавајќи тенџериња. Цептер е љубител на автомобили и на трки, а неговата компанија „Цептер интернешнл“ е долгогодишен спонзор на трките во Формула 1 во Монте Карло, Бразил и Канада. Тие се главен спонзор на тенискиот турнир во кнежевството. Компанијата исто така спонзорираше тимови на рели и трки со глисери во Ф1. Во својот возен парк имал „бентли“ (Bentley), „ролс ројс“ (Rolls-Royce), неколку специјални верзии на „мерцедес“, БМВ, „ламборџини“ и „ферари“. Не се знае за кои модели станува збор, а Цептер ги менува во зависност од пригодата. Тој со текот на годините дури и подари дел од својата приватна колекција. Во 2010 година, на принцот Алберт од Монако му подарил тркачки брод и колекција од стари автомобили. Љубител е и на авиони и јахти. Сопственик е на 50-метарската јахта „Џојми“ (JoyMe), која е изградена во Хрватска и е продадена во 2020 година за 12,9 милиони евра. Сè уште можете да ја изнајмите во Хрватска, а неделен наем е меѓу 155 и 175 илјади евра. Тој поседува неколку авиони. И денес користи приватен авион „ембраер легаси “(Embraer Legacy 500). Цените на новите се околу 20 милиони долари, а просечната цена на половните е 14 милиони.

Српските бизнисмени се потаинствени за автомобилите

Српските бизнисмени најчесто не сакаат да зборуваат за својот имот. Сепак, Воислав Лазаревиќ, претседател на управниот одбор на „Адико банка Србија“, со насмевка ни кажа дека неговата сопруга вози подобар автомобил од него. „Таа вози ’ауди’, јас возам ’БМВ серија 1’“. Но, тој не можеше да каже ништо за другите раководители, со напомена дека можеби возат службени возила.

За дополнителни информации контактиравме со фирмата „Стар импорт“ од Белград, која е застапник на возилата „мерцедес-бенц“ на пазарите во Србија, Црна Гора, Босна и Херцеговина и Албанија. Оттаму ни изјавија дека изборот на автомобил зависи од навиките, потребите и вкусовите на купувачот, секако и од финансиските можности. Кај деловните корисници тоа е забележливо слично на сите пазари. Традиционално, тие се одлучуваат за некои од најпродаваните мерцедеси Ц, Е па и С класа седани, како и СУВ-моделите, особено „мерцедес-бенц“ од моделите ГЛЦ и ГЛЕ. Кога станува збор за електричните возила, деловните корисници го претпочитаат моделот ЕкуЕ (EQE). Цените започнуваат во просек од 40.000 евра, а може да достигнат и до 150.000 евра.

Српските менаџери пројавуваат интерес и за електрични возила. „Некои меѓународни компании дури пропишуваат употреба на еколошки возила во своите насоки за возниот парк, со што го насочуваат менаџментот на компаниите кон електрични возила. Иако темата за електромобилноста во Србија е сè уште во зародок, од година на година има мал пораст на продажбата на електрични возила.“

Продажбата и работењето се под влијание на политичките и економските околности на тие земји, кои се сосема различни, пишуваат тие.

Во последно време, секако, навиките на клиентите се менуваат. „Наместо да купат возило, клиентите сè повеќе ја разгледуваат можноста за изнајмување или лизинг. Најчести начини на изнајмување возило се долгорочно изнајмување, над две години, кое најчесто го користат компаниите, и краткорочно изнајмување до 10 дена (за туристички потреби, изнајмување за посебни потреби и сл.)“.

Во изработката на текстот учествуваа Александра Томиќ и Миро Солдиќ

Преведе Александра Томиќ