Пет скијачки дестинации што се поевтини од најпопуларните, а исто толку престижни

Еве неколку добри вести за скијачите: климатскиот феномен Ла Ниња најавува обилен снег во Јужна и Северна Америка и пониски температури во Европа сезонава, што е вистинско олеснување во споредба со минатата година, кога падна малку снег. Што може да биде проблем? Скијачките центри очекуваат рекорден број посетители. Сепак, можете да имате сѐ – фантастични патеки, одлични понуди и многу снег доколку изберете алтернативни дестинации во непосредна близина на некои од најпознатите скијачки центри во светот.

Наместо Куршевел во Франција, пробајте го Сен Никола де Верос

Евазион Мон Блан/Bloomberg Businessweek

Куршевел и блискиот Межев колку што се скапи толку се и исклучителни, но подобра понуда ве очекува на спротивната страна од скијачката област Евазион Мон Блан (Évasion Mont Blanc). Таму ќе го најдете скијалиште во местото Сен Никола де Верос и во него новиот хотел „Армансет“ (Armancette) со поволни цени. Хотелот располага со 19 апартмани со пристап кон патеката (по цена од 593 евра) со поглед на Мон Блан и нуди пристап до огромен терен, со 235 средно тешки патеки на кои можете да скијате дури до Межев и назад за еден ден.

Патувањето дотаму и назад трае шест часа, вклучувајќи и пауза за ручек - савојски фонду и кралска торта исполнета со крем од бадем во ресторанот на патеката „Шале ду Радаз“ (Chalet du Radaz). Бонус е тоа што ски-центарот има универзална ски-карта (Mont Blanc Unlimited pass), која овозможува пристап до познатите ски-центри како Шамони, оддалечен само 40 минути.

Наместо Аспен-Шоумас, пробајте го Крестед Бјут

Атмосферата во Крестед Бјут е повеќе рустикална отколку отмена. Меѓутоа, откако почна да стекнува имиџ на луксузна дестинација особено ги привлекува страсните скијачи што сакаат да ги тестираат своите вештини. Третина од површината на скијачките терени од вкупно 636 хектари отпаѓа на  екстремни патеки, кои започнуваат од височина од 3.657 метри и вклучуваат некои од најтешките, двојно црни патеки во Колорадо.

За почетниците исто така има понуда, пространи благи долги патеки и пријатно опкружување. Првиот луксузен хотел беше отворен во 2022 година. Станува збор за хотелот „Вакера хаус“ (Vaquera House), кој има 10 соби, тераса со џакузи на покривот и подно греење во бањите (цените почнуваат од 660 евра или 720 долари за ноќевање).

Понудата на активности освен скијање не е пребогата - се нудат претежно хамбургери и пиварници. Сепак, видливи се предвесници на промени, како што е ресторанот „Ту твелв“ (Two Twelve), кој внесува примеси на врвна кујна на главната улица Елк авенија (Elk Avenue).

Наместо Сент Мориц во Швајцарија, пробајте го Ароса-Ленцерхајд

Ароса-Ленцерхајд/Bloomberg Businessweek

Хотели никнуваат и во ски-центарот Ароса-Ленцерхајд, 64 километри северно од луксузниот Сент Мориц. Неговите патеки, со вкупна должина од 225 километри, се спуштаат од височина од 2.865 метри, каде што постојано има снег.

(Патеките во Сент Мориц достигнуваат висина од 3.290 метри.) Теренот вклучува сè, од стрмни до благи патеки погодни за семејства, а сите нив ги опслужуваат две пространи и едноставно уредени одморалишта. Хокеарските ѕвезди Марсел Нидерер и Арно дел Курто неодамна го отворија „Пострезиденс ам си“ (Postresidenz am See) (цените започнуваат од 216 швајцарски франци или 230 евра, односно 254 долари за ноќевање), во кој има соби и единици во стил на кондоминиуми.

Од спротивната страна на планината, „Валбела ресорт“ (Valbella Resort) (цени од 337 швајцарски франци или 358 евра), со соби и апартмани со две спални, неодамна е реновиран благодарение на сопственикот „Киркби А/С“ (Kirkby A/S), матичната компанија на групацијата „Лего“ (Lego Group).

И двата хотела се наоѓаат недалеку од патеките. Ски-центарот Валбела е популарен меѓу семејствата од Европа поради школата за скијање, додека истоимениот хотел има игротека со тема „Лего“. Местото се издвојува и по својата амбициозна понуда кога станува збор за активности по скијањето. Рестораните „Ла бреза“ (La Brezza) во Ароса и „Ла рива“ (La Riva) во Ленцерхајд, препознатливи по менијата за дегустација и белите чаршафи, можат да се пофалат со ѕвезди на „Мишелин“.

Наместо Кицбил во Австрија, пробајте го Салбах

Салбах/Bloomberg Businessweek

Кицбил, кој има стрмни брзи патеки, но и благи падини погодни за почетници, секоја година привлекува сѐ повеќе скијачи од САД. Бројот на посети во поширокиот регион на Тирол, според податоците на веб-страницата Ski.com, е зголемен за 20 проценти на годишно ниво, а најголем промет отпаѓа на ова место, познато по натпреварите во скијање.

Сепак, Австријците веќе подолго време се одлучуваат за алтернативна дестинација: Салбах. На само еден час, овој мегаскијачки центар е поголем и, некои велат, подобро опремен од неговиот славен сосед, особено бидејќи беа поставени три нови гондоли и лифтови пред одржувањето на Светското првенство во алпско скијање на Меѓународната скијачка федерација (ФИС) во февруари годинава.

Друга предност? Поради живата апрес-ски сцена, може да очекувате помалку скијачи на патеките рано наутро. Сместете  се во „Натурхотел Форстхофгут“ (Naturhotel Forsthofgut) (цени од 230 евра или 254 долари), модерен хотел во стил на вила, со едноставни линии и обложен со светло дрво. Скијачката школа прифаќа деца од предучилишна возраст што се подготвени да се качат на скии, а исто така им дава можност на поискусните скијачи да скијаат со помош на водич по познати патеки, како што е патеката „Челенџ“ (Challenge) долга 64 километри, до која водат 32 жичници.

Наместо Нисеко во Јапонија, пробајте го Русуку

Ако ви се допаѓа јапонскиот фин сув снег за скијање, размислете за скијачкиот центар Русуку, оддалечен на 30 минути возење со автомобил или воз источно од познатиот скијачки центар Нисеко, со кој ги дели истите временски услови.

Русуку е мал во споредба со огромниот Нисеко, зафаќа само 212 хектари и нуди 27 патеки на три различни планини. Сепак, не е сè во големината: неговиот сопственик „Камори Канко“ (Kamori Kanko Co.) стои  зад некои од светските ски-дестинации, како што се Тињ на француските Алпи и скијачкиот центар Хевнли во близината на езерото Тахо во САД. Русуку четири пати од 2017 година ја добива светската скијачка награда за најдобар скијачки центар во Јапонија.

Резервирајте сместување во „Вале Русуцу“ (Vale  Rusutsu) (цени од 40.000 јени или 241 евро, односно 277 долари за ноќ) и уживајте во панорамскиот поглед на Западната Планина. Во близина е спа-центарот „Котобуки“, со топла изворска вода. Можете да го пробате и „Вестин Русуцу ресорт“ (Westin Rusutsu Resort) (цени од 94.000 јени или 567 евра), кој по неодамнешното реновирање повторно е отворен за гостите во декември.