За зимски туризам имаме само желба

Првото нешто што е потребно за зимски туризам е снег, второто нешто се добри патишта за брзо да се стигне до зимските туристички центри. Во моментов, за жал, Македонија има само по малку и од двете нешта.

2022 година беше уште една од низата години кога во градовите не видовме снег ниту еден ден. На високите места имаше колку да ги обои во бело, за зимски туризам – немаше доволно.

Македонија има два зимски туристички центра - Попова Шапка и Маврово. Во овие над 30 години од независноста се зборуваше за многу проекти, најфален меѓу нив беше тој за ски-центарот Кожуф. Ништо не се реализира.

Во моментов Шапка чека да се развие во согласност со плановите на новиот инвеститор. А и Шапка и Маврово чекаат патишта што нема да ги одвраќаат туристите.

Зимските центри се недостапни – патишта или има малку или воопшто нема

Биљана Пејоска Ристеска, дипломирана организаторка по туризам и угостителство од Институтот за одговорен и организиран туризам, вели дека основно за развој на туризмот се комуникациските и атрактивните фактори.

„Комуникацијата упатува на одговори на прашањата на секој посетител турист од типот: Како да се стигне до конкретната дестинација? Дали одењето е тешко или лесно? Дали бара подолго или пократко патување? Има ли пат, аеродром, железница и каква е нивната поврзаност со крајната дестинациска цел т.е. сместувачкиот капацитет, вели Пејоска Ристеска.

Биљана Пејоска Ристеска / Приватна архива

И кога ќе одговорите на сите овие прашања, резултатите во земјава во моментов се сè попоразителни.

„Сообраќајната инфраструктура и поврзаноста на дестинациите, конкретно на зимските центри, со транспортни средства е минимална или не постои. Ако комуникациските фактори се оневозможени, тогаш атрактивните немаат можност да се реализираат, а тоа се климата, природните убавини и културно-историските форми на организирани посети. Без исполнување на овие фактори не можеме да сметаме на вистински развој на зимскиот туризам, како и на туризам воопшто“, вели таа.

Министерот за економија Крешник Бектеши вели дека државата работи за да се развие зимскиот туризам во земјава.

Блумберг Адрија

„Во рамките на програмските активности, Министерството за економија има поддржано конкретни проекти за развој на зимски туризам, како што се поставување сигнализација, обележување велосипедски патеки, поддршка на манифестации и форуми. Исто така Министерството го поддржа стратегискиот проект за ски-центар на Попова Шапка. Таа стратегиска инвестиција е предвидена во износ од 186 милиони евра. Предвидени се изградба на нови терени за скијање, ски-лифтови, паркинг-простори, сместувачки објекти и други содржини“, вели Бектеши.

Шапка ќе личи на Доломитите, ама за пет години, дотогаш?

Проектот за Попова Шапка е амбициозен и чини над 180 милиони евра. Треба да го реализира италијанската компанија „Техно Алпи“, која планира Попова Шапка да ја направи атрактивен туристички центар.

Првата фаза за реализација на планот треба да почне годинава. Според бизнис-планот, таа ќе трае до 2028 година и во тој период на Шапка треба да влезат околу 55 милиони евра.

Во оваа фаза е планирана изградба на вештачко езеро, затоа што се потребни резервоари со вода за да може да се прави снег што ќе помогне сезоната да трае од декември до март.

Фокусот на инвеститорот ќе бидат скијачките патеки. Планирани се 16 нови патеки, особено од страната на Јелак, каде што снегот трае подолго. Планирана е изградба на девет нови жичници, а на почетокот ќе се градат две. Освен тоа, инвеститорот планира и набавка на седум нови ратраци. Во бизнис-планот е наведено дека треба да бидат изградени и 15 километри патеки за крос-скијање.

Блумберг Адрија

Недостигот од снег е главниот проблем што го донесоа климатски промени. Експертите велат дека фокусот на државните вложувања треба да биде токму тука.

„За жал, Македонија повеќе од 10 години нема изградено дефиниран начин за изработка на државна стратегија за развој на туризмот. Надежта дека вештачкиот снег може да биде замена за природниот и да овозможи непречено одвивање на зимската сезона е различна во различни области, што значи дека не е секаде можна да се оствари затоа што е условена од два фактора, а тоа се температурата на воздухот и релативната влажност“, вели Пејоска.

Снег нема, а цените на Пониква и во Берово исти како на Златибор или во Банско

Какви се цените во македонските зимски туристички центри? За четири ноќевања во Крушево за време на зимскиот распуст (прва половина на јануари) за 11-годишно дете, за сместување во скромен капацитет со полн пансион, агенциите бараат околу 200 евра. Пребаравме (на „Букинг“) сместување за четиричлено семејство во истиот период.

Вила за двајца возрасни и две деца на Маврово, за четири ноќевања, чини од 200 евра нагоре. Со вклучен појадок и до 500 евра. На Попова Шапка цените за истиот аранжман почнуваат од 250 евра, а со појадок од 600 евра.

Малку поевтини се места како Пониква или Берово, кои се продаваат како зимски центри, а таму нема ниту патеки за скијање ниту други содржини. Апартман за четиричлено семејства за четири ноќевање чини од 150 евра нагоре, со појадок и вечера стигнува и до 700 евра. Според понудата на „Букинг“, во Копаоник, Златибор или Банско се наоѓа исто сместување за истите пари.

Во моментов нема коментари за веста. Биди прв да коментира...

Остави коментар