Позитивната прогноза на „Енвидија“ ги смири стравувањата од ВИ-балон

„Енвидија“ (Nvidia Corp.) објави изненадувачки силна прогноза за приходите и го отфрли тврдењето дека индустријата за ВИ е во балон, ублажувајќи ги стравувањата што се проширија низ технолошкиот сектор.

Највредната компанија во светот очекува продажба од околу 65 милијарди долари во јануарскиот квартал — за околу 3 милијарди повеќе од прогнозите на аналитичарите. „Енвидија“ исто така соопшти дека приходниот бум од половина билион долари, кој се очекува во наредните квартали, може да биде уште поголем од предвиденото.

Прогнозата укажува дека побарувачката за ВИ-акцелераторите на „Енвидија“, скапите и моќни чипови што се користат за развој на ВИ-модели, останува силна. Последниве недели, „Енвидија“ се соочуваше со се поголеми стравувања дека неконтролираното трошење за таква опрема не е одржливо.

„Имаше многу разговори за ВИ-балон“, рече извршниот директор Џенсен Хуанг во разговорот со аналитичарите. „Од нашата перспектива, сликата е сосема поинаква.“

Позитивните коментари ги зголемија акциите за околу 5 отсто во тргувањето по затворањето на берзата. Тие пораснаа за 39 отсто годинава до заклучувањето на берзата, оставајќи ја пазарната вредност на компанијата на 4,5 билиони долари.

Резултатите на „Енвидија“ станаа барометар за здравјето на ВИ-индустријата, а веста ги подигна и акциите на други компании поврзани со овој сектор. „Кор Вив“ (CoreWeave Inc.),  компанијата што обезбедува пресметковни услуги за ВИ, доби повеќе од 9 отсто во тргувањето по затворањето на берзата доби повеќе од 9 отсто во продолженото тргување. Неговиот конкурент „Небиус“ (Nebius Group NV) порасна повеќе од 8 отсто.

„Пазарите реагираат многу позитивно на веста дека нема слабеење на ВИ-импулсот“, рече Брајан Малбери, менаџер за клиентски портфолија во „Закс инвестмент менаџмент“ (Zacks Investment Management). Неговата фирма поседува акции на „Енвидија“.

„Побарувачката за хардверските решенија на ’Енвидија‘ останува силна“, додаде тој.

Извршниот директор на „Енвидија“ минатиот месец рече дека компанијата има повеќе од 500 милијарди долари приходи што доаѓаат во наредните неколку квартали. Сопствениците на големи дата-центри ќе продолжат да трошат за нова опрема затоа што инвестициите во ВИ почнаа да даваат резултати, рече тој.

Bloomberg

Финансиската директорка Колет Крес отиде чекор понатаму во средата, наведувајќи дека „Енвидија“ најверојатно ќе ја надмине целта од 500 милијарди долари.

„Секако постои можност да имаме повеќе од веќе најавените 500 милијарди долари“, рече таа во телеконференцијата. „Бројката ќе расте.“

Сè поголемата улога на ВИ ќе помогне да се одржи побарувачката за производите на „Енвидија“, рече Хуанг. Технологијата веќе помага да се забрзаат постојните пресметковни задачи, како пребарувањето. А наскоро ќе влезе и во физичкиот свет во форма на роботи и други уреди.

Резултатите на „Енвидија“ за третиот квартал исто така ги надминаа проценките на аналитичарите. Приходите пораснаа за 62 проценти, на 57 милијарди долари во периодот што заврши на 26 октомври. Добивката изнесуваше 1,30 долари по акција. Аналитичарите предвидуваа продажба од 55,2 милијарди долари и добивка од 1,26 долари по акција.

Главната единица за дата-центри на „Енвидија“ оствари 51,2 милијарди долари приходи во кварталот, во споредба со просечната проценка од 49,3 милијарди долари. Чиповите што се користат во гејминг компјутери, некогаш главен извор на приходи за компанијата, донесоа продажба од 4,3 милијарди долари. Тоа е во линија со просечната проценка од 4,4 милијарди долари.

Прогнозата за најновиот квартал ја одразува импресивната експанзија на компанијата. Продажбата ќе биде повеќе од десеткратно поголема од истото тримесечје пред само три години. А „Енвидија“ е на пат да оствари поголема годишна нето-добивка отколку што двата нејзини долготрајни ривали, „Интел“ (Intel Corp.) и „АМД“ (Advanced Micro Devices Inc.) ќе пријават вкупна продажба.

Добивката на „Енвидија“ ги надмина продажбите на ривалите

Bloomberg

Проширувањето на „Енвидија“ се соочува со предизвици. Американските ограничувања за испорака на напредни чипови во Кина во голема мера ја исклучија компанијата од огромниот пазар за нејзините производи.

Хуанг лобираше во Вашингтон за укинување на тие правила, тврдејќи дека се контрапродуктивни во однос на безбедносните цели што треба да ги исполнат. Но, и покрај делумното повлекување на најстрогите мерки, „Енвидија“ во моментов не проектира никаква продажба на ВИ-акцелератори во Кина.

„Нашата прогноза за Кина е нула“, рече Хуанг во интервју за „Блумберг ТВ“. „Би сакале да ја добиеме можноста повторно да се вклучиме на кинескиот пазар со одлични производи.“

Некои инвеститори исто така изразија загриженост за структурата на мегадоговорите што „Енвидија“ ги склучува со своите клиенти. Трансакциите вклучуваат инвестиции во стартапи како „Опен еј-ај“ (OpenAI) и „Антропик“ (Anthropic PBC), отворајќи прашање дали тие договори создаваат вештачка побарувачка за компјутерите.

Почетокот на неделава, „Енвидија“ и клиентот „Мајкрософт“ (Microsoft Corp.) соопштија дека се обврзале да инвестираат до 15 милијарди долари во „Антропик“. Стартапот, пак, се обврза да купи пресметковен капацитет од 30 милијарди долари од облачната услуга „Азур“ (Azure) на „Мајкрософт“ и ќе работи со инженерите на „Енвидија“ на фино подесување на чипови и ВИ-модели.

На телеконференцијата, Хуанг беше прашан за договорите со „Опен еј-ај“ и „Антропик“. Тој рече дека инвестицијата на „Енвидија“ во „Опен еј-ај“, која сè уште не е финализирана, ќе донесе добар поврат. Поддршката за „Антропик“, пак, ќе помогне да се воспостават врски со компанија што досега не била голем корисник на технологијата на „Енвидија“, рече тој.

Некои ривали на „Енвидија“ станаа пооптимистични дека конечно можат да го предизвикаат доминантното место на компанијата во ВИ-акцелераторите. Овој месец, „АМД“ предвиде забрзан раст на својот бизнис со ВИ-чипови и ги истакна перспективите за претстојните производи.

„АМД“, „Броудком“ (Broadcom Inc.) и „Квалком“ (Qualcomm Inc.) објавија партнерства со големи корисници на чиповите на „Енвидија“. А операторите на дата-центри сè почесто настојуваат да користат повеќе сопствени дизајни, значаен чекор што би ја намалил нивната зависност од снабдувањето од „Енвидија“.

Хуанг рече дека конкурентскиот притисок и понатаму е низок. Повеќе клиенти доаѓаат кај „Енвидија“ откако претходно пробале алтернативи, од кога било досега, вели тој, додавајќи дека комплексноста на ВИ-компјутерските системи ја постави „Енвидија“ во силна позиција.

Извршниот директор исто така настојува да ја прошири употребата на ВИ во што поголем дел од светската економија. Тој започна глобална турнеја со цел да убеди државни институции и корпорации да ја применат неговата технологија.

„Енвидија“, основана во 1993 година, го предводеше развојот на пазарот за графички чипови што создаваат реалистични слики за компјутерски игри. „АМД“ е нејзин единствен преостанат голем ривал во тој бизнис.

„Енвидија“ ја изгради својата доминација во ВИ со тоа што ја приспособи истата архитектура на чипови за обработка на огромни количини податоци, овозможувајќи им на истражувачите да создаваат софтвер што почна да се приближува до човековите способности.

Компанијата со седиште во Санта Клара, Калифорнија, сè уште држи повеќе од 90 проценти од пазарот за ВИ-акцелераторски чипови. Таа додаде и други производи за да ја зацврсти својата предност, меѓу кои мрежна опрема, софтвер и други услуги.

„Бизнисот е многу силен“, рече Хуанг во интервјуто. „Одлично го испланиравме овој исклучително силен период.“