Приходите од туризмот во Македонија растат, а годинава се очекува да заврши со 500 милиони долари девизен прилив од туристичката индустрија.
„Кога ќе ги споредиме податоците од 2019 со првите осум месеци во 2023 година, двата најголеми туристички центри Охрид и Скопје се во мала позитива од пет до седум отсто во однос на бројот на ноќевање и во бројот на туристи генерално“, вели во интервју за „Блумберг Адрија“ Љупчо Јаневски, директор на Агенцијата за поддршка и промоција на туризмот.
Блумберг Адрија
Јаневски смета дека другите градови покажуваат минус пред сè поради нивната фискална недисциплина и можеби заостанувањето во статистичките податоци за разлика од другите центри.
„Ако се гледаат генерално податоците и се прави споредба на 2019 со 2023 година, резултатите се приближно исти. Односно податоците се слични со првите осум месеци“, вели Јаневски.
Тој смета дека околу фискалната недисциплина би требало воведување на регионалните и светските практики односно воведување туристичка инспекција, која очекуваме да профункционира во 2024 или 2025 година.
„Исто така зголемување на влијанието на Агенцијата за поддршка и промоција на туризмот со дополнителни законски измени и нивни подобрувања, секако со Министерството за економија, ќе овозможи намалување на сивата зона во туристичката индустрија“, вели Јаневски.
Тој додава дека на Балканот генерално сивата економија изнесува од 40 до 45 отсто, што претставува голем притисок на сите други чинители во туристичката индустрија што се придржуваат на законите.
Според Јаневски, во однос на приливот од туристичката индустрија, ќе надминеме 500 милиони долари.
„Очекуваме дека во 2023 година таа бројка да биде приближно 530 милиони долари. Ако ги споредиме најдобрата 2022 година односно првите шест месеци со истиот период од 2023 година, зголемувањето е за 24 отсто. Додека, ако ги споредиме 2019 и 2023 година, зголемувањето е некаде околу 40 отсто“, вели Јаневски.
Тој додава дека политичките случувања во опкружувањата секако имаат влијание и врз туризмот, односно се гледа намалување на бројот на туристи што конкретно доаѓаат од Бугарија.
.webp){kind=icon}
