Се бориме за рекорд од милион странски туристи - домашниот туризам низ бројки

Македонија во изминатиов период бележи континуиран пораст на бројот на туристи кој во минатата година достигнал над 1,3 милиони лица од кои 916.000 биле гости од странство. Станува збор за значително зголемување ако се земе предвид дека пред една деценија, во 2015 година вкупниот број на туристи во земјава изнесувал околу 816.000 лица, од кои околу 485.000 биле странски туристи.

Минатата година била рекордна и по бројот на остварените ноќевања во земјава. Имено, податоците на Државниот завод за статистика покажуваат дека странските и домашните туристи оствариле вкупно 3,32 милиони ноќевања, што е убедливо најголем број од 2008 година наваму.

Од друга страна, статистичките податоци откриваат дека во изминативе години има намалување на вкупниот број соби и легла во сместувачките капацитети во земјава. Анализиравме на што се должат ваквите трендови.

Каква е состојбата кај хотелското сместување?

Вкупниот број на хотелски соби во Македонија се зголемил од 4.747 соби во 2008 година на 10.733 соби во минатата година. Во овој период, забележителен пораст има кај бројот на соби во хотелите со три, четири и пет ѕвезди, додека има намалување на бројот на соби во хотелите од пониските категории.

Сепак, ако сака да привлече повеќе гости кои претпочитаат полуксузно сместување, Македонија очигледно ќе мора да привлече инвестиции и реномирани хотелски брендови кои би отвориле нови хотели со пет ѕвезди, пред се во туристичките места каде што има недостиг од вакви капацитети. Имено, значителен дел од сегашните 2.175 соби од повисоката класа се лоцирани во хотелите со пет ѕвезди во Скопје.

Камповите пропуштена можност, благ раст кај приватното сместување

Статистичките податоци откриваат значителен пад во капацитетите за камперско сместување во Македонија, што е поразителен факт кој се должи на тоа што голем број кампови во земјава беа запуштени поради несоодветно управување. Всушност, на прсти можат да се избројат камповите кои се уште успешно работат. Земјава бележи негативен тренд кај капацитетите за кампување во период кога во светот се бележи континуирано зголемување на интересот за ваков вид туристички престој. Интересот оди дотаму, што голем број кампови во светот сега нудат таканаречени „глампинг“ услуги односно нудат луксузно камперско сместување кое им овозможува на гостите да бидат во директен допир во природата и при тоа да не ја загубат комоцијата која ја добиваат во хотелите.

Во Македонија лани имало 11.206 соби во приватни куќи и станови коишто се издаваат за одмор, што е благо зголемување во однос на 2008 година кога биле евидентирани 10.569 соби во вакви приватни капацитети. Иако станува збор за позитивен тренд, сепак станува збор за благ пораст ако се земе предвид дека станува збор за периодот од петнаесетина години. Мора да се нагласи дека во Македонија се достапни пари од европските фондови за развој на рурален туризам кои се уште недоволно искористени.

Македонија има што да понуди

„Блумберг Адрија“ веќе пишуваше дека се зголемува бројот на туристи во светот кои бараат погодности какви што постојат и во хотелите со пет ѕвезди, само што наместо популарни туристички места преферираат помалку познати дестинации. Тие најчесто инсистираат на сместувања кои вклучуваат базен, мирни градини, хидромасажни кади или спа-центри, со впечатливи пејзажи за опуштање и бегство од секојдневието. Нашата земја одлично се вклопува во овој тренд со оглед на тоа што е релативно непозната дестинација која изобилува со природни убавини.

Исто така, објавивме дека околу 31 отсто од туристите денес, особено од генерацијата зед, попрво би научиле некоја нова вештина за време на патувањето отколку да купат сувенир. Побарувачката за вакви искуства расте и кај нас, а тоа се гледа и од понудата на туроператорите, кои во последно време сѐ почесто нудат програма со активности наместо класични тури. Па така, на различни блогови за храна и патувања сѐ почесто ќе сретнете кулинарски работилници за приготвување традиционални јадења и печива, често во домашна или селска атмосфера, со локални состојки и вино, што на туристите им овозможува директен контакт со македонската гастрономска култура.  

  Добар пример дека Македонија може да понуди многу повеќе од езерски туризам е Крушево кое од година во година урива рекорди во посетеноста. Освен како реномиран центар за адреналински спорт, Крушево се етаблира и како препознатлива и посакувана одржлива локација, откако неодамна влезе на престижната листа со Топ 100 приказни за зелени дестинации (Top 100 Stories of Good Practices in Green Destinations 2025) на меѓународната организација „Грин дестинејшнс“ (Green Destinations).