Откријте ги 50-те најдобри хотели во светот за 2024 година

Втора година по ред, основачите на листата на 50 најдобри ресторани во светот и листата на 50 најдобри барови во светот (World’s 50 Best) се фокусираат на најдобрите хотели. Oваа година Capella Bangkok беше прогласен за најдобар хотел во светот.

Хотелот е дел од групата нови луксузни одморалишта покрај брегот во Бангкок кои значително го подигнаа нивото на луксуз во градот. Секоја соба нуди поглед на реката Чао Фраја, а рестораните го вклучуваат францускиот гастрономски скапоцен камен Mauro Colagrecoi Phra Nakhon токму на брегот на реката, која стана легендарно место за ручек за посетителите и жителите на градот. Нејзиниот базен е толку густо опкружен со бујна вегетација што дава чувство дека ненадејно сте пристигнале на некој од тајландските острови.

Сепак, титулата „најдобар во светот“ е субјективна, а не научна оценка. За да дојде до резултатите, тимот World’s 50 Best бара од своите 600 анонимни членови на жирито да ги рангираат седумте најдобри хотели во кои престојувале во последните 18 месеци.

Тоа е систем кој нужно фаворизира дестинации кои се лесно достапни, големи градови и нови хотели со силен маркетинг: не постојат правила кои им забрануваат на членовите на жирито да користат бесплатен престој, така што хотелите со големи промотивни буџети можат да привлечат бројни инфлуенсери и медиуми, притоа создавајќи мноштво потенцијални гласови за себе. (Bloomberg не прифаќа такви повици)

Бангкок Depositphotos

Од друга страна, дури и најголемите светски патници меѓу членовите на жирито веројатно немале можност да одат на сафари или да ја истражуваат дивината на Патагонија во последниот период, што остава само мал број гласачи со можност да гласаат за имоти на помалку познати дестинации. Во теорија, глобалната комисија на судии треба да помогне, но ниту еден член не е обврзан да гласа за хотелите во нивните матични региони.

Ова делумно ги објаснува резултатите. Многу од местата на листата се познати од минатогодишното издание, што покажува дека влијателните експерти за патувања чувствуваат потреба да ги посетат топ рангираните места кои сè уште лично не ги виделе, создавајќи своевидно ехо на позитивно мислење. Најголемите изненадувања беа најоддалечените одморалишта, како што се Kokomo Private Island на Фиџи (50-то место на листата), Suján Jawai во Раџастан, Индија (43-то место на листата) и Six Senses Zighy Bay во Оман (45-ти на листата).

На овогодинешната церемонија во костуми во лондонскиот „Гилдхол“, за првпат беа доделени наградите за „Најдобар новитет“, „Најпочитуван хотелски синџир“ и „Најподобрени“, кои ги освоија Raffles London at The OWO, Aman и Atlantis the Royal, соодветно. Последниот, во кој Kerzner International Ltd. инвестираше 1,2 милијарди долари, се искачи од 44-та позиција во 2023 година на моменталното деветто место на листата.

Фиџи Depositphotos

Raffles London е еден од хотелите што ја користи значителната маркетиншка предност - има извонредна медиумска поддршка - иако е навистина достоен кандидат, откако беше отворен минатата есен по реновирање од 1,76 милијарди долари. Станува збор за историска зграда која служела како воена база за британските единици за време на двете светски војни.

Кампања на Raffles Извор: Accor group

Минатогодишниот победник, Passalacqua, беше втор оваа година; генерално, половина од хотелите од минатогодишната топ 10 листа ги задржаа своите високо позиционирани места. Слична беше и географската дистрибуција, ако минатата година имаше скромен претставник во субсахарска Африка и Јужна Америка, листата за 2024 година е само малку подобрена, со само два хотела од субсахарска Африка во рангирањето (Singita Kruger National Park и Mount Nelson, a Belmond Hotel) и еден во Јужна Америка (Rosewood São Paulo).

Рангирањето ги одразува и тековните трендовски дестинации. На минатогодишната инаугуративна листа, беше јасно дека членовите на жирито, како и многу патници, беа воодушевени за враќањето во Азија по долгоочекуваното пост-ковид отворање - на списокот за 2023 година имаше 12 хотели од континентот.

Оваа година, центарот на гравитација останува цврсто во Азија, каде слабиот јен го зголеми интересот за Јапонија, додека претстојната сезона на серијата „Белиот лотос“ (The white lotus) помогна да се поттикне туристичкиот бум на Тајланд (двете земји заедно имаат вкупно седум хотели на листата, при што Азија сега има уште повеќе хотели од минатата година).

Соединетите Американски Држави, исто така, го подобрија својот статус, со четири претставници, во споредба со само два минатата година, вклучувајќи ги и првите почести за легендарниот Carlyle Hotel во Њујорк, Four Seasons at the Surf Club во Мајами и Dorchester Collection’s Hotel Bel-Air во Лос Анџелес.

Atlantis the Royal, Дубаи Kerzner Communications

Влегувањето на листата не е важно само за хотелите, туку и за самата дестинација, односно за хотелскиот синџир на кој му припаѓа, според Кристина Снејт-Ленс, генерална директорка на Upper House од Хонгконг, кој минатата година беше на четвртото, а оваа на петтото место. „Тоа е одлична приказна за Хонгконг, за да го одбележиме опоравувањето по затворањето поради ковидот,“ објаснува таа.

Фактот дека Aman, Rosewood и Four Seasons заедно имаат 11 од 50 позиции остава значителен впечаток врз сите хотели од нивното портфолио. Maybourne, Raffles, Oetker Collection и Dorchester Collection исто така добро се позиционираа, со повеќе објекти на листата. Сепак, некои хотели признаваат дека сега е стресно да се одржи позицијата, наведувајќи дека признанието станува важно за нивното позиционирање во однос на конкуренцијата, а присуството на многу високобуџетни објекти ја отежнува ситуацијата за независните одморалишта.

„Вбројувањето на листата нè прави горди“, вели Винсент Билијар, генерален директор на парискиот дворец Hôtel de Crillon од синџирот Rosewood, кој оваа година се најде на 15-то место. Тоа исто така е важно за маркетингот: „Имаме плакета за хотелот, тоа го наведуваме во секоја порака што ја испраќаме, а ќе биде и насекаде на Инстаграм.“

За потрошувачите, листата може да биде само потврда на нивните веќе постоечки листи на хотели кои сакаат да ги посетат. Доколку првичните цели на листата на World’s 50 Best, според нивните вработени, беа да се откријат нови места и да се иницира медиумско внимание, овогодишната листа ја зацврстува важноста на првото над второто.

Кога беше прашана дали е задоволна со географската разновидност на минатогодишната листа, или загрижена поради нејзините недостатоци, Ема Слајт, директорка на содржина на World’s 50 Best Bars and Hotels, едноставно одговори дека „има само 50 места што можеме да ги истакнеме.“ На прашањето дали постои интерес за прилагодување на системот за гласање за да биде пофер, таа одговори дека World’s 50 Best не е „арбитражна листа, туку одраз на моменталната состојба во туристичката индустрија.“

Таа додава дека компанијата создава содржини преку целата година кои не се поврзани со листата „50 најдобри“ за да им даде видливост на одлични хотели кои не успеале да влезат на листата, преку нивната Discovery платформа, иако таа платформа главно истакнува хотели, ресторани и барови во поголемите градови, а не на оддалечени локации.

Во продолжение, ова е целата листа на 50 најдобри хотели:

1. Capella Bangkok (Најдобар хотел во Азија)

2. Passalacqua, езеро Комо, Италија (Награда за најдобар бутик-хотел)

3. Rosewood, Хонгконг

4. Cheval Blanc, Париз

5. The Upper House, Хонгконг

6. Raffles, Сингапур

7. Aman, Токио

8. Soneva Fushi, Малдиви (Посебна награда за најдобра хотелска плажа)

9. Atlantis the Royal, Дубаи (Награда за најголемо подобрување)

10. Nihi Sumba

11. Claridge’s, Лондон

12. Mandarin Oriental, Бангкок

13. Raffles London at the OWO, Лондон (Најдобар новитет на листата)

14. Four Seasons, на реката Чао Фраја во Бангкок

15. Hôtel de Crillon, Париз

16. Chablé Yucatan, Мексико (Најдобар хотел во Северна Америка)

17. Hotel du Cap-Eden-Roc, Франција

18. Belmond Maroma, Мекско (Награда за еко-хотел)

19. Four Seasons, Фиренца

20. Borgo Santandrea, Италија

21. Desa Potato Head, Бали

22. Bulgari, Токио (Награда за најдобар нов хотел)

23. The Lana, Дубаи

24. Rosewood São Paulo (Најдобар хотел во Јужна Америка)

25. The Calile, Бризбејн (Најдобар хотел во Окејанија)

26. The Siam, Бангкок

27. Park Hyatt, Кјото

28. Mount Nelson, Кејптаун (Најдобар хотел во Африја)

29. One & Only Mandarina, Мексико

30. The Carlyle, Њујорк

31. La Mamounia, Мароко

32. Four Seasons, Мадрид

33. Capella Singapore

34. Four Seasons Surf Club, Мајами

35. Hotel Bel-Air, Лос Анџелес

36. Eden Rock, Сент Барт

37. Aman, Њујорк

38. Royal Mansour, Мароко (Награда за уметност во угостителството)

39. Amangalla, Шриланка

40. Le Bristol, Париз

41. Gleneagles, Шкотска

42. Castello di Reschio, Италија

43. Suján Jawai, Индија

44. Singita Kruger National Park, Јужноафриканска Република

45. Six Senses Zighy Bay, Оман

46. The Connaught, Лондон

47. The Brando, Француска Полинезија

48. Hotel Esencia, Мексико

49. The Tasman, Австралија

50. Kokomo Private Island, Фиџи

Во моментов нема коментари за веста. Биди прв да коментира...

Остави коментар