Најпрестижните модни додатоци летово се со потпис на луксузни хотели

Пред неколку недели бев на одмор во Грција, на островот Миконос, кога забележав турист во неговите триесетти години, како носи две торби. Едната беше од брендот „Диор“ (Dior), а другата беше кафеава торба од хотелот „Фор сизонс аситир палас“ (Four Seasons Astir Palace) во Атина. Веднаш почнав да сметам: „Диор“ торбата чини околу 3.000 долари, што е приближно колку и два дена престој во „Фор сизонс“ хотелот, на врвот од летната сезона.

Подоцна истиот ден, жената до мене во барот на брегот во „Мала Венеција“ носеше капа од „Хотел ду кап еден рок“ (Hotel du Cap-Eden-Roc), луксузен ресорт на југот на Франција, оддалечен 2.000 километри од Грција.

По враќањето во Лондон, почнав да забележувам хотелски брендиран материјал дури и во метрото. Меѓу сите дизајнерски ранци и торби од книжарницата „Даунт“ (Daunt), патниците исто така носеа торби од „Уан енд онли“ (One&Only) и „Њут“ (The Newt) во Сомерсет.

Носењето рекламни торби од омилените хотели одеднаш стана најновиот моден тренд. Луксузните хотели сè повеќе вложуваат во брендирани сувенири. Без разлика дали станува збор за брендирана розова и зелена најлонска торба од 218 долари од „Беверли Хилс хотел“ (Beverly Hills Hotel), капа од 88 долари од „Бристол“ (Le Bristol) од Париз, или дури свилени пижами од 770 долари од хотелот „Пеинсула“ (Peninsula) во Лондон.

Ова е привлечен извор на дополнителни приходи, но според Барбара Чарнецки, вонреден професор на „Саут бенк бизнис скул“ (South Bank Business School) во Лондон, исто така е и паметен маркетинг потег. „Ги тера потрошувачите да се чувствуваат како да стануваат дел од клубот ако купат производ што го брендирал луксузен хотел.“

Со други зборови, овие модерни додатоци функционираат исто како маичка купена на концерт од вашиот омилен бенд: ве потсетуваат на добро поминатото време, додека истовремено укажуваат на вредноста на статусниот симбол. Долго откако инстаграм-сториите од епскиот летен одмор во Европа ќе избледат, овие парчиња ќе продолжат да кажуваат на сите дека сте престојувале во врвен хотел или барем сте купиле маичка со неговото име.

Во последната деценија, модните инфлуенсери минаа низ различни „кор“ (англ. core) трендови. Нормкор (Normcore) беше реакција против максимализмот и брендираните етикети на брзата мода. Гропкор (Gorpcore) црпеше инспирација од спортска, утилитарна облека, внесувајќи го духот на природата. А кој би можел да го заборави минатогодишниот Барбикор (Barbiecore) во боја на розова мастика?

Сега, новиот популарен тренд може да го наречеме Ресорткор (Resortcore).

„Аман ресортс“ (Aman Resorts), кој многумина го сметаат за најлуксузната хотелска компанија во светот, објавува податоци дека нивната е-commerce продажба е удвоена во последната година. Меѓу другото, нивната онлајн продавница нуди торба со монограм „А“ за 2.700 долари. Хотелот „Мандарин ориентал“ (Mandarin Oriental) нуди памучна и кожена торба со логото на хотелот за 166 долари. Хотелот „Иден“ (Eden) во Рим продава рачно изработена жолта платнена торба инспирирана од градот за 450 евра.

„Брендираната роба е статусен симбол за многу луѓе, зависно од тоа дали се работи за хотел на високо ниво или претставува значајна дестинација“, вели Леора Ланц, вонреден професор на Факултетот за хотелски менаџмент на Универзитетот во Бостон. Таа вели дека хотелските производи имаат некаков вид „ако знаеш, знаеш“ квалитет, особено за миленијалците и припадниците на генерацијата зед.

Џенифер Алфано, стилистка од Њујорк која пишува за „Флер индекс“ (The Flair Index), се согласува со горенаведеното. „Нашите сувенири сега се поинакви“, вели таа. „Потешко е да се најдат уникатни работи додека патувате, сè станува малку обично. Ова е начин да донесете нешто дома што не може да го најдете на друго место.“

Секако, хотелите со години продаваат брендирана роба во своите продавници. Но, неодамнешниот пораст на е-commerce делумно беше поттикнат од долготрајните затворања за време на пандемијата, кога сите бараа начини да се поврзат со гостите кои не можеа лично да ги посетат.

Но, кога гостите повторно почнаа да ги полнат хотелите при крајот на пандемијата, трендот се трансформираше од обичен сувенир во начин за истакнување.

Стефани Фејр, поранешна претседателка на Британскиот совет за мода, вели дека видела како сè повеќе луксузни брендови се шират на партнерства со хотелиерството. „Луѓето сакаа да ги вложат своите пари во патувања и искуства по ковид“, вели таа. „Така, претставниците на водечките модни брендови и луксузните хотели размислуваа како да го искористат тоа.“

Компанијата која произведува луксузна спортска облека „Оливија фон Хале“ (Olivia von Halle) неодамна лансираше колекција со хотелот „Пенинсула“ која вклучува свилени пижами од 620 фунти со испечатен панорамски поглед на Хајд Парк. Американскиот моден бренд „Фрејм“ (Frame) се здружи со „Риц Париз“ (Ritz Pariz), а неодамна сопругата на Џастин Бибер, манекенката Хејли Бибер, беше видена како ја носи нивната капа.

Depositphotos

Модниот бренд „Пејпер Лондон“ (Paper London) во јули се здружи со „Фор сисознс Хемпшир“ (Four Seasons Hampshire), продавајќи артикли како стилски дуксери за 150 фунти и торби кои се вклопуваат во шик селската атмосфера на ресортот. „Иако ова беше наш прв обид во светот на брендирани хотелски производи, неколку парчиња од колекцијата се распродадоа во првите неколку дена“, вели Филипа Такереј, основач и извршен директор на „Пејпер Лондон“.

Луксузниот хотел со пет ѕвезди „Бристол“ во Париз исто така годинава ја лансира својата прва линија на облека. Во колекцијата се вклучени хеланки од 150 евра украсени со грбот на хотелот и комплет маици.

Валентина де Сантис, италијанска хотелјерка и сопственичка на прочуените хотели „Пасалаква“ (Passalacqua) и „Гранд хотел Тремецо“ (Grand Hotel Tremezzo) на езерото Комо, започна соработка со модниот дизајнер Емилио Викстед и италијанскиот луксузен бренд „Брикс“ (Brics). На нејзината е-commerce страница „Сенс оф лејк“ (Sense of Lake), де Сантис продава парчиња инспирирани од градините и брегот на езерото Комо, како што е рачен багаж од 550 евра со старински принт од фасадата на хотелот на предната страна. Таа ја прошири линијата на производи за помалку од една година откако ја освои наградата за најдобар хотел во светот на листата на 50 најдобри хотели за 2023 година.

„Создадовме бутици за продажба на сувенири, како ветување за нашите гости дека можат да понесат единствени спомени со себе, и за секој што сака да почне да сонува за езерото Комо“, вели Де Сантис. „Ова партнерство има смисла“, вели Стефани Фејр. „'Пасалаква' говори за сè што е убаво и рафинирано во врска со италијанскиот начин на живот на езерото Комо, а Емилио Викстед се обраќа на истата публика. Ова е совршена соработка од овој аспект“, додава таа.

Дури постои и растечки пазар за половни брендирани производи. Кетрин Хјуи ја води продавницата „Алабстер Џоунс“ (Alabaster Jones), која продава винтиџ подметачи за чаши од хотелот „Риц Лондон“ (Ritz London) за 250 долари и торби од „Беверли Хилс хотел“. Таа вели дека интересот за хотелски сувенири значително пораснал од кога го започнала својот бизнис во 2017 година. „Правиме истражување на пазарот и заклучокот е дека многу од овие хотели се исклучително популарни“, вели таа. „Овие парчиња се одлични за започнување бизнис.“

Стефани Фејр мисли дека овој тренд ќе продолжи, додека модните брендови се обидуваат да стигнат до својата публика таму каде што таа е, а за многу од тие клиенти, местото каде што биле ова лето се некои од овие луксузни хотели. „Модата е една од тие категории што постојано се преплетува“, вели Фејр. „Без разлика дали станува збор за спорт, музика, а сега се пренесува и во сферата на спомените од патувањата и хотелите.“

Во моментов нема коментари за веста. Биди прв да коментира...

Остави коментар