Минатата година беше дарежлива кога станува збор за отворање хотели во Европа. Ричард Бренсон ги претстави својот широк крајбрежен имот „Сон Буњола“ на шпанскиот остров Мајорка и трансформацијата на Канцеларијата на старата војна во Лондон, вредна 1,4 милијарда фунти (1,8 милијарда долари).
Годинава ветува дека ќе биде исто толку интересна.
Лондон ќе продолжи да биде во центарот на вниманието со најновото деби на „Мејбурн“ (Maybourne Hotel Group), сопственик на луксузната икона „Клериџ хотел“ (Claridge’s Hotel). Наречен „Емори“, тој нуди апартмани во Најтсбриџ, со ресторан во кој главен готвач е Жан-Жорж Вонгерихтен. Цените на апартманите започнуваат од 2.000 фунти за ноќ, што го прави „Емори“ едно од најскапите места за престој во Лондон. „Мандарин Ориентал груп“ (Mandarin Oriental Group) исто така ќе го отвори својот втор имот во Лондон, на елитниот плоштад „Хановер“, во срцето на Мејфер.
На други места во Европа, „Розвуд“ штотуку отвори хотел во Минхен, град што немал големо луксузно отворање со децении, а добропознатиот хотелски бренд се упати и кон Амстердам, каде што реновираше историска зграда што некогаш била палата на правдата во градот. Едно од најзначајните отворања во Грција не е на Санторини или Миконос, туку на тивките брегови на малиот остров Фолегандрос. Хотел „Гундари“ ќе има спа-центар под земја, на карпа со поглед на море.
Издвојуваме седум места што со нетрпение очекуваме да се отворат во Европа годинава, рангирани според очекуваните датуми на отворање – иако тие датуми се предмет на промена.
„Емори“ (Emory)
Кога: април
Каде: Најтсбриџ, Лондон, Обединетото Кралство
Најновиот проект на групацијата „Мејбурн“ е можеби најамбициозниот. „Емори“ ќе се состои од 60 апартмани, а секој кат ќе има различен познат дизајнер како Андре Фу, Реми Тесиер и Пјер-Ив Рошон. Готвач е Жан-Жорж Вонгерихтен, кој за првпат го носи својот бренд од Њујорк во Лондон. Хотелот ќе има и четирикатна бања и тераса на покривот со поглед од 360 степени кон Хајд Парк. Цените започнуваат од 2.000 фунти.
„Уан енд онли“ (One&Only Kea Island)
Кога: мај
Каде: островот Кеа, Грција
Ова луксузно одморалиште на плажа од 65 хектари се наоѓа на помалку познатиот остров Кеа на архипелагот Киклади, на само еден час возење со ферибот од Атина или 15 минути со хеликоптер. Секој апартман од бел камен, од кој најмалиот ќе биде 75 квадратни метри, има приватен базен и двор. Кеа е позната по своите песочни плажи – некарпестиот тип што често го среќаваме во Грција – и ненадминатите услови за нуркање. Ако претпочитате да се релаксирате со коктел покрај базенот, хотелот ќе додаде клуб на плажа на забавната сцена на островот во лето. Ова лето, Kea може да ги предизвика „Амазон“ (Amanzoe) и „Фор сизонс“ (Four Seasons Astir Palace) како најстилски хотел во Грција. Цените за собите ќе почнуваат од 1.750 евра, додека во летната сезона се очекува почетната цена да биде 2.750 евра.
Depositphotos
„Вајсрој“ (Viceroy at Ombria Algarve)
Кога: јуни
Каде: Алгарве, Португалија
Хотелскиот бренд „Вајсрој“ со седиште во Лос Анџелес е познат по своите елегантни имоти на урбани локации како Чикаго, заедно со одморалиштата на места како Св. Луција и Ривиера Маја. Наскоро доаѓа во трендовскиот јужен дел на Португалија, со луксузно селско одморалиште со 76 соби далеку од популарните плажи. Новоизградениот објект ќе биде уреден во стилот на традиционалното село Алгарве – бели ѕидови со покриви со ќерамиди, улици со калдрма и насади со цитрус. Ќе има осум ресторани и барови, терен за голф со 18 дупки, велосипедски и пешачки патеки за гости што сакаат други активности на отворено. Хотелот прифаќа резервации од средината на јуни, а цените почнуваат од 425 евра и достигнуваат до 535 евра во екот на летната сезона.
„Коринтија“ (Corinthia Rome)
Кога: напролет
Каде: Рим, Италија
„Коринтија“ стана постојан објект на лондонската гостопримливост со пет ѕвезди кога беше отворен во 2011 година во историска зграда од почетокот на 20 век, во близината на Вајтхол. Сега брендот ги има истите амбиции за Вечниот Град со трансформацијата на поранешната зграда на централната банка на Италија на плоштадот во центарот на градот. Покрај 60 елегантно дизајнирани соби, „Коринтија“ во Рим ќе има ресторан на италијанскиот готвач и ТВ-ѕвезда Карло Крака, тераса со еден од најдобрите погледи на градот и спа-центар, кој ќе се натпреварува со импресивниот велнес-проект во Лондон. Цените на собите започнуваат од 1.100 евра за ноќ.
„Колеџо ала Кверс“ (Collegio alla Querce, Auberge Resorts Collection)
Кога: летоска
Каде: Фиренца, Италија
Секогаш популарната Фиренца добива урбана оаза со атмосфера на селско домаќинство. Се состои од група згради од 16 век што некогаш биле стара капела, театар и училиште. „Колеџо ала Кверс“ ќе има 35-метарски надворешен базен со бар-услуга, градина на тераса во барокен стил и внатрешна градина со лимони и камин. Љубителите на вино од регионот ќе ја ценат областа за дегустација и екскурзии до лозјата Кианти во близината на градот. Хотелот ќе има 81 соба и еден голем апартман од 209 квадратни метри. Цената на собите сè уште не е достапна.
„Хотел ду Кувент“ (Hotel du Couvent)
Кога: летоска
Каде: Ница, Франција
Како што сугерира името, овој хотел со 88 соби некогаш бил манастир изграден во 17 век во стариот дел на Ница. Градините со тераса ќе им понудат на гостите бегство од прометните улици со калдрма, а менијата ќе вклучуваат производи што се одгледуваат таму. Гостите ќе можат да се релаксираат во термалните бањи инспирирани од Рим. Собите нудат поглед на барокните згради на тесните улички што се протегаат до Средоземно Море. Овој хотел, иако ќе биде помалку спектакуларна опција во споредба со многуте грандиозни хотели на брегот на познатата француска ривиера, нема да биде ништо помалку луксузен. Цената на собите сè уште не е достапна.
„Розвуд“ (Rosewood Amsterdam)
Кога: до крајот на годината
Каде: Амстердам, Холандија
Амстердам не е град познат по одлични хотели, со неколку исклучоци. Ќе се истакне објектот на хотелскиот бренд „Розвуд“. Зградата на поранешната палата на правдата, која го претставуваше главниот суд на градот речиси два века, сега станува урбан рај со 133 соби, три ресторани, затворен базен и, како почит на историјата, библиотека полна со правни книги. „Розвуд“ во Амстердам ќе гледа на познатиот Принсенграхт. Ќе биде оддалечен 10 минути пеш од „Ријксмузеум“ (Rijksmuseum) и блиску до многу продавници, кафулиња и вински барови во девет улици. Цената на собите сè уште не е достапна.
.webp){kind=icon}
Во моментов нема коментари за веста. Биди прв да коментира...