Прошетајте низ Милано преку објективот на Скот Шуман

Милано, град во кој модата се прифаќа со иста леснотија како и утринското еспресо, доби нова визуелна посвета. Таа доаѓа во вид на книгата „Сарторијалист: Милано“ (The Sartorialist: Milano) на Скот Шуман, еден од највлијателните современи фотографи на уличната мода. На повеќе од двесте страници, ова издание на издавачката куќа „Ташен“ (Taschen) сумира речиси две децении стилски идентитет на градот што во меѓувреме стана и нов дом на авторот, како и неисцрпен извор на неговата инспирација.

Како „Сарторијалист“ (The Sartorialist) ја промени модната индустрија

Кога во 2005 година Шуман го почна блогот „Сарторијалист“ (The Sartorialist), модната фотографија сè уште се одвиваше главно во студијата и затсценските простори. Наместо фокус на модните писти и едиторијалите, Скот се сврте кон улиците – просторот каде што модата, всушност, и живее. Фотографираше њујорчани додека одеа на работа, на велосипед, во парк и во минување, а неговата едноставна идеја, која ја поврза модата со секојдневниoт живот, многу брзо стана глобален феномен.

Реалните комбинации на облека, спонтаните стилови и несовршените силуети, кои, парадоксално, изгледаа поживо и помодерно од она што се создаваше во студијата, го претворија неговиот блог во глобално мерило за автентичен стил и во претходник на она што подоцна ќе стане естетика на Инстаграм.

Уште по отворањето на блогот следуваа понуди за соработка со брендови како „Гап“ (GAP) и „Барбери“ (Burberry), како и учество во големи кампањи и изложби, но фотографијата на уличниот стил остана неговата основна приказна. Денес делата на Шуман се дел од постојаните поставки во музеи како „Викторија и Алберт“ (Victoria & Albert Museum) во Лондон и „Метрополитен музеј на фотографијата“ во Токио (Tokyo Metropolitan Museum of Photography), додека неговиот профил на Инстаграм го следат околу милион и двесте илјади луѓе.

Taschen

Милано како долгогодишна инспирација

Иако е роден во САД, Шуман последниве години почна да го смета Милано за свој дом. Во едно интервју за италијанските медиуми истакна дека ломбардиската престолнина за него, момче од Индијана опседнато со модата, претставувала идеал. Уште тогаш чувствувал дека овој град, во кој стилот не се следи туку се живее, е центар на сè што го привлекувало, па затоа не е чудно што денес го доживува како своја природна креативна база.

Taschen

Токму тој временски континуитет низ објективот на Скот – најпрво како љубопитен набљудувач, а потоа како локалец – ја гради основата на книгата. Во неа се наоѓаат фотографии снимени во текот на дваесет години, кои покажуваат како се менувал визуелниот идентитет на градот и неговите жители: од постари, отмено облечени миланци во беспрекорни костуми, до млади креативци, студенти и обични минувачи во разиграни, внимателно склопени или целосно спонтани комбинации, кои, како што наведува авторот, најдобро го отсликуваат карактерот на оние што ги носат.

Taschen

На страниците се појавуваат и личности што ја обликувале современата мода, како Миуча Прада, Лучано Барбера и сестрите Соцани, фотографирани на истите улици, во истите кафулиња и на истите рути што секојдневно ги користат жителите и гостите на градот.

Книгата не ги документира само луѓето туку и Милано како архитектонски и културен бисер. Фотографиите на Шуман се создадени на „живи“ градски точки: од Брера (Brera) и галеријата „Виторио Емануеле“ (Galleria Vittorio Emanuele), преку главната железничка станица, па до пазарите и локалните барови, бележејќи детали што ги забележуваат само оние што му пристапуваат на градот со внимание и трпение. Тоа одекнува и во зборовите на Џорџо Армани:

„Милано не  се препушта на површни, минливи познанства“, напиша креаторот во својот последен предговор.

Taschen

За сите што сакаат да го откријат Милано низ објективот на Скот, ова луксузно издание е достапно од првата недела на декември по цена од 60 евра – идеално за љубителите на модата, визуелните уметности и италијанската култура, како и за оние што сакаат да го разберат градот преку неговите луѓе. Или, пак, да им приредат несекојдневен подарок на љубителите на модата и стилот.

Taschen