Кризата во луксузот дојде и до „Долче и Габана“: Брендот размислува за продажба на имот

„Долче и Габана“ (Dolce & Gabbana) преговара со кредиторите за можна продажба на недвижности во Милано, во рамки на напорите да ја зголеми ликвидноста и да ги рефинансира долговите, велат извори запознаени со ситуацијата.

Компанијата разгледува продажба на одредени недвижности, вклучувајќи и оние во центарот на Милано, а потоа нивно повторно изнајмување за да ослободи парични средства, изјавија извори кои побараа да останат анонимни бидејќи не се овластени јавно да зборуваат. Одлуките за тоа кои точно згради ќе бидат продадени сè уште не се донесени, наведуваат изворите.

Модниот бренд познат по естетиката инспирирана од Медитеранот во април потврди дека преговара со банкарските кредитори. „Блумберг њуз“ тогаш објави дека кредиторите бараат дополнителен прилив на свеж капитал во рамки на пошироко рефинансирање на долг од околу 450 милиони евра, како и дека продажбата на недвижности е една од можните опции.

Една од недвижностите за продажба | Bloomberg

 

„Долче и Габана“ поседува неколку деловни згради групирани во миланската населба Порта Венеција, кои ги користи како канцеларии и изложбени простори. Тие недвижности би можеле да претставуваат извор на дополнителна вредност: закупот на деловен простор во централниот деловен дел на градот стабилно расте и достигнал годишна цена од 820 евра по квадратен метар во првиот квартал, додека малопродажните простори се најскапи во Италија, според извештајот Маркетбит (Marketbeat) на компанијата КВ (Cushman & Wakefield)..

Италијанската модна куќа соработува со „Ротшилд“ како финансиски советник, според извори запознаени со ситуацијата, кои побараа да останат анонимни бидејќи не се овластени јавно да зборуваат за ова прашање. | Bloomberg

Неодамнешното продолжување на договорот за лиценца меѓу „Долче и Габана“ и производителот на очила ЕЛ (EssilorLuxottica) до 2050 година вреди дури 150 милиони евра и исто така ќе придонесе за дополнителна ликвидност, наведуваат изворите.

Претставниците на компанијата „Долче и Габана“ одбија да коментираат. Претставникот на компанијата ЕЛ не бил веднаш достапен за коментар. Претставникот на компанијата „Ротшилд“ (Rothschild & Co.), која ја советува „Долче и Габана“, исто така одбил да коментира.

Пад на луксузниот сектор

„Долче и Габана“ во последните месеци ја промени структурата на управување додека се соочува со пад во луксузниот сектор  - дополнително влошен со војната во Иран  - што влијаеше врз заработката и го отежна исполнувањето на условите поврзани со долговите.

Коосновачот Стефано Габана (63), оваа година се повлече од функцијата претседател на компанијата. Тој разгледува опции за својот удел од околу 40 отсто во фирмата. Оставката нема влијание врз неговата креативна работа, соопшти компанијата во април.

Стефано Габана (лево) и Доменико Долче Vittorio Zunino Celotto/Getty Images

Модната куќа исто така го именуваше поранешниот директор на „Гучи“ (Gucci), Стефано Кантино, за заеднички извршен директор, заедно со Алфонсо Долче, братот на коосновачот Доменико.

Габана и Доменико Долче ја основаа компанијата во 1985 година и набрзо ја изградија во еден од најпрепознатливите модни брендови во светот. Иако парот се раздели пред повеќе од 20 години, тие останаа деловни партнери и заедно ја поседуваат холдинг-компанијата која контролира 80 отсто од фирмата.

Преостанатиот дел од сопственоста одделно го поседуваат Доменико, Алфонсо и нивната сестра Доротеа.