„Хермес“ слабее во Кина: Луксузниот гигант се соочува со нов проблем

Акциите на „Хермес“ (Hermès International SCA), компанијата позната по легендарната чанта „Биркин“, паднаа за дури 11 отсто во Париз, на најниско ниво од јануари 2023 година, што повторно го отвори прашањето колку „Хермес“ е изложен на забавувањето на кинескиот пазар на луксузни производи.

Продажбата на производите од кожа, без влијанието на промените на девизните курсеви, порасна за 10,2 отсто во вториот квартал, соопшти „Хермес“ во средата. Иако овој резултат покажа поголема отпорност на компанијата во споредба со конкурентите, сепак беше под процената на аналитичарите од 10,7 отсто.

„Недостигот од раст во Кина и натаму претставува причина за загриженост“, наведоа аналитичарите на „Џеферис“, предводени од Џејмс Грзиниќ.

Индустријата за луксузни производи се соочува со притисоци од повеќе страни. Кинеските потрошувачи ја намалуваат потрошувачката, инфлацијата ги прави повнимателни при купувањето, додека војната на Блискиот Исток влијае врз побарувачката во важни центри за купување луксузни производи, како Дубаи, но и врз туристичките патувања во Европа.

Кина, која со години беше еден од главните двигатели на растот на секторот за луксузни производи, сè уште не е целосно закрепната, им изјави на новинарите извршниот претседател на „Хермес“, Аксел Дима, за време на конференцискиот повик.

Бутик на „Хермес“ на улицата Њу Бонд во центарот на Лондон/ Jose Sarmento Matos/Getty Images Europe

„Гледам стабилизација на кинескиот пазар, но сè уште не гледам вистинско закрепнување“, рече тој, додавајќи дека „Хермес“ и натаму бележи раст во Кина, но со побавно темпо отколку во претходните години.

„Хермес“ е повеќе изложен на Кина отколку многу негови конкуренти. Регионот што ја опфаќа Кина генерирал околу 43 отсто од приходите на компанијата во првата половина од годината. За споредба, Азија без Јапонија учествувала со 29 отсто во приходите на „ЛВМХ“ (LVMH) во истиот период.

Вкупните приходи на „Хермес“ во вториот квартал пораснале за 6,7 отсто, без влијанието на промените на девизните курсеви, на околу 4,1 милијарда евра, соопшти компанијата. Резултатот ги надмина очекувањата на аналитичарите, кои прогнозираа раст од 6,51 отсто.

Растот во последните три месеци го предводеше американскиот пазар, каде што приходите се зголемија за 13,7 отсто. Франција, една од најважните туристички дестинации, забележа раст од 6,2 отсто, додека регионот што го опфаќа Блискиот Исток оствари подобар резултат отколку во претходниот период, иако и натаму остана во минус. Тој регион „покажа исклучителна отпорност во нестабилното геополитичко опкружување“, соопшти „Хермес“.

Одделот за производи од кожа е најважниот извор на приходи за компанијата/Jose Sarmento Matos/Getty Images Europe

 

Судирот на Блискиот Исток и повлекувањето на купувачите кои сакаат луксузни производи, но се почувствителни на цените, ја погодија целата индустрија. Сепак, „Хермес“ покажа отпорност благодарение на долгите листи на чекање за неговите производи, особено за чантите „Кели“ и „Биркин“, како и на деловниот модел што ја ограничува достапноста на најбараните производи за да ја поттикне побарувачката и да ги одржи високите цени.

Извештајот на „Хермес“ следуваше по главно разочарувачките резултати на пазарниот лидер „ЛВМХ“ (LVMH Moët Hennessy Louis Vuitton), како и на компаниите „Барбери“ (Burberry Group) и „Монклер“ (Moncler). Овие брендови имаат поголема изложеност на модата и производите од кожа. Наспроти тоа, силните резултати на „Ришмон“ (Richemont), потпомогнати од неговите брендови за накит „Картие“ (Cartier) и „Ван Клиф енд Арпелс“ (Van Cleef & Arpels), покажаа дека потрошувачите и натаму се подготвени да издвојат големи суми за луксуз, но дека при купувањето станале многу попребирливи.

Некои аналитичари го поставија прашањето дали „Хермес“ треба да го преземе тешкиот, но неопходен чекор и да го намали производството на производи од кожа за да ја зачува ексклузивноста и вредноста на својот бренд.

Одговарајќи на тоа прашање, Дима рече дека производството на „Хермес“ природно е ограничено поради недостигот од квалификувани занаетчии, но и поради достапноста на квалитетна кожа, дел од синџирот на снабдување што во меѓувреме станал поиндустријализиран.

„Ако не најдам доволно квалитетна кожа, нема да произведувам“, рече тој.

Компанијата планира до 2030 година во Франција да отвора по една нова фабрика за производи од кожа секоја година. По тој период, Дима рече дека веќе му се обраќаат различни региони кои сакаат токму на нивната територија „Хермес“ да отвори производствен погон.