Откако Норвешка минатиот викенд испадна од Светското првенство по поразот од Англија, 25-годишниот голгетер Ерлинг Халанд може барем да најде утеха во својата импресивна колекција чанти од престижниот бренд „Хернес“ (Hermes) и други дизајнерски куќи. И не е осамен во тоа.
Фудбалери како Вирџил ван Дајк, кој носеше чанта „Шанел“ (Chanel) од дебитантската колекција на Матје Блази, и Џуд Белингем, амбасадор на „Луј Витон“ (Louis Vuitton) со склоност кон неговите модели со препознатлив монограм, направија машката чанта од некогаш исмеван моден додаток да стане многу посакуван статусен симбол. Како што продажбата на профитабилната кожена галантерија во последните три години забави, машката чанта би можела да ѝ помогне на индустријата за лични луксузни производи вредна 400 милијарди долари да излезе од актуелната криза.
Можеби ниту еден предмет не го прикажува подемот и падот на ерата на раскош во последните шест години подобро од рачната чанта. Пред околу четвртина век, „It-bag“ стана врвен статусен симбол за жените, додека модели како „фенди бегет“ (Fendi Baguette), „баленсијага сити“ (Balenciaga City) и „диор седл“ (Dior Saddle) стекнаа култен статус. Сепак, во последните години малку кој модел успеа да ја поттикне фантазијата на купувачите на истиот начин. Истовремено, цените вртоглаво пораснаа - просечната цена на луксузните чанти е за 60 отсто повисока во однос на 2019 година, според зборовите на Лоран Василеску, аналитичар во БНП (BNP Paribas SA).
Прочитај повеќе
Дали е подобро да се купуваат луксузни брендови на аеродромите?
Иако повеќето патници низ терминалите минуваат набрзина, аеродромите ширум светот незабележливо стануваат елитни модни дестинации што на најмудрите купувачи им нудат пристап до ретки парчиња по поповолни цени.
28.06.2026
Италијански стил на две тркала: како „веспата“ стана глобална икона
„Веспата“, со повеќе од 20 милиони произведени примероци и присуство на сите клучни пазари, веќе осум децении е глобална лајфстајл икона. Еве кои се купувачите, а кои обожавателите во нашиот регион.
16.05.2026
„Одемар пиге нео фрејм“ со цена од 71.000 долари може да биде најпосакуваниот часовник во 2026 година
Меѓу големиот број часовници претставени на годишниот елитен настан на швајцарскиот производител, еден исклучително едноставен историски стил ги воодушеви сите.
14.02.2026
Пет работи што ги бараат купувачите на луксузни производи
Колку е помал кругот на луѓе кои го препознаваат и ценат вашиот избор, толку подобро. Тогаш припаѓате на елитна група, вели Жан-Марк Мансвелт, извршен директор на брендот за кожни производи на ЛВМХ, „Берлути“.
22.11.2025
Колекцијата на Халанд, за која се проценува дека вреди речиси еден милион фунти (1,3 милиони долари), вклучува лимитирано издание на повеќеслојната ХАЦ (Haut a Courroies / HAC) биркин чанта, како и ретка ХАЦ чанта со мотив од патување и планински пејзаж. Секоја од нив на пазарот за препродажба вреди околу 50.000 долари, а вистинска среќа е ако некогаш успеете да ја најдете во некоја продавница на „Хермес“ (Hermes International SCA). Во такво опкружување, накитот изгледа како поисплатлива набавка. Кога на тоа ќе се додаде конкуренцијата од половните чанти, како и подостапните линии како брендот „Коуч“ (Coach) на компанијата „Тапестри“ (Tapestry Inc.), бројот на продадени премиум чанти со цена над 500 долари во малопродажба опаѓа уште од 2022 година, наведува Василеску.
Забавената продажба на чанти ги намали приходите и негативно влијаеше врз профитот на луксузната индустрија. Кај водечките брендови, бруто маржата на чанти - разликата меѓу трошоците за производство и малопродажната цена - надминува 80 отсто, вели Марио Ортели, извршен директор на консултантската компанија „Ортели“ (Ortelli & Co).
Затоа продажбата на поголем број чанти за мажи би можела да го ублажи падот на продажбата и профитот. Мажите во 2025 година сочинувале само една четвртина од глобалниот пазар на луксузни чанти, според податоците на „Бејн“ (Bain & Co). Тој пазарен удел веројатно го одразува фактот дека многу мажи во Азија веќе се навикнати да носат луксузни чанти, како и дека некои луксузни модели, како ранците на „Прада“ (Prada SpA), првенствено се наменети за машка публика. Сепак, таа практика сè уште не станала дел од мејнстримот на Западот, што претставува очигледна можност за луксузните брендови. Со оглед на тоа што фудбалерите сè почесто ги покажуваат своите престижни чанти, веднаш откако кошаркарот на Њујорк Никс, Тајлер Колек, носеше „марго“ (Margaux) модел од американската куќа „Роу“ (The Row), а победникот на Вимблдон и амбасадор на „Гучи“ (Gucci), Јаник Синер, носеше ексклузивни чанти од италијанската модна куќа, тоа наскоро би можело да се промени.
Луксузните брендови, предводени од компанијата ЛВМХ (LVMH Moet Hennessy Louis Vuitton SE), сè повеќе инвестираат во спортот за да се поврзат со нови заедници на потрошувачи. Поради тоа, спортистите станаа модни инфлуенсери, од кои се очекува да ги промовираат своите спонзори за спортска опрема и на теренот и надвор од него. Сепак, патувањата до натпреварите и назад им даваат можност да го покажат сопствениот стил, иако некои, како Килијан Мбапе, имаат договори и со луксузни модни куќи, конкретно во неговиот случај со ЛВМХ и „Диор“ (Dior). Кај НБА играчите, патот од влезот во салата до соблекувалната практично стана модна писта пред почетокот на натпреварот.
И додека луксузните производи им овозможуваат на оние што ги носат да го покажат своето богатство, мажите имаат релативно малку можности за тоа. Часовниците и понатаму се основен избор, но накитот станува сè попопуларен, па некои мажи, како бејзбол играчот Мигел Рохас, носат ѓердани и нараквици од брендот „Ван Клиф и Арпелс“ (Van Cleef & Arpels).
За да ги поттикнат мажите да купуваат чанти, луксузните компании ќе мора да ги приспособат своите стратегии. Иако Мбапе е виден со мала чанта од „Диор“ преку рамото, повеќето фудбалски ѕвезди носат поголеми модели, веројатно затоа што во практика служат како исклучително луксузни спортски чанти. Освен тоа, изгледаат помалку како традиционални женски чанти.
Последните неколку години беа одбележани со подемот на микро-чантите. Со намалувањето на димензиите на чантите, модните куќи успеаја да понудат поевтини производи без отворено намалување на цените. Сепак, се чини дека мини-чантите го достигнаа својот врв. Компаниите сега посветуваат повеќе внимание на поголемите модели, и за мажи и за жени, ми рече Клаудија Д’Арпицио, која го води глобалниот оддел за мода и луксуз во „Бејн“.
„Шанел“ предничи благодарение на предимензионираните модели на Блази. Но и другите модни куќи би требало да тргнат по тој пат, особено „Хермес“. За време на Светското првенство, Халанд му донесе на „Хермес“ медиумска вредност на брендот од 8,8 милиони долари, далеку повеќе од другите луксузни компании што ги следи „Лаунчметрикс“ (Launchmetrics), фирма специјализирана за анализа на социјални мрежи и други медиумски спомнувања.
Вредност на брендираните добра што ги поседуваат фудбалерите | Launchmetrics
Лука Солка, аналитичар во „Бернштајн“ (Bernstein), утврдил дека помалите модели на „Хермес“ на пазарот за препродажба се продаваат со најголеми повеќекратни износи во однос на малопродажната цена, што ја одразува нивната популарност, особено меѓу азиските потрошувачи. Неофицијалните податоци покажуваат дека поголемите чанти од „Хермес“ уште потешко се набавуваат во нивните продавници, бидејќи компанијата се обидува да го задоволи интересот за микро-модели.
Сепак, пребарувањата за поголеми „биркин“ чанти на платформата за препродажба „Рилрил“ (The RealReal Inc.) и платформата за следење цени „Секондсенс“ (Secondsense) се зголемиле од почетокот на Светското првенство. „Хермес“ би требало да го прераспредели производството за повеќе мажи да можат да се угледаат на своите омилени фудбалски ѕвезди. Дополнителна предност на преминувањето од мини кон макси модели е тоа што луксузните брендови на тој начин нудат поголема вредност за парите - производите стануваат пофункционални и сестрани. Иако поголемите чанти се потешки, тие можат секојдневно да се користат за носење лаптоп, можеби наместо деловна актовка, или спортска опрема. Исто така можат да послужат како чанта за кратки патувања, со што се намалува трошокот по едно користење.
Како што мажите ќе се чувствуваат сè попријатно носејќи чанти, веројатно ќе експериментираат и со различни стилови. Музичарот Хари Стајлс редовно носеше помали „гучи“ чанти додека неговиот пријател Алесандро Микеле беше креативен директор на модната куќа во сопственост на компанијата „Керинг“ (Kering SA). Во поново време е виден и со чанта од „Шанел“ со леопард дезен. Сепак, големите чанти се добро место за почеток.
Светското првенство наскоро ќе падне во заборав. Луксузната индустрија сега мора да се погрижи вниманието и евентуалниот раст на продажбата што ги предизвикаа машките „биркин“ чанти на Халанд да траат долго откако ќе биде одигран последниот натпревар.
.webp){kind=icon}
