Осум парфеми што мирисаат толку добро што би посакале да ги изедете

Постојат парфеми што мирисаат на цвеќе, чиста облека или свежо искосена трева, а потоа тука се и оние што ве потсетуваат на слаткарница или на сопствената кујна. Гурманските парфеми си поигруваат токму со таа граница меѓу мирисот и вкусот - во нивните шишенца се наоѓаат состојки што вообичаено ги очекуваме во десерти, шолја кафе или чај. Ванила, какао, ф’стаци, мед, костен, карамела и егзотични зачини уште од деведесеттите години се дел од луксузните парфемски формулации, а парфимерите од нив создаваат композиции што истовремено се познати, заводливи и неочекувани. Сега таа граница се поместува и кон зеленчукот, како што е, на пример, цвеклото.

Заедничко им е тоа што можат да бидат подеднакво привлечни во шишенце парфем како и во омилено јадење. И долго траат, па оваа инвестиција долго ќе ви служи. Еве осум понови парфеми што со задоволство би ги виделе на нашата полица оваа есен и зима.

Колонска вода „Скарлет битрут“ на „Џо Мелоун“ 

Jo Malone London

При создавањето на лимитираната колекција „Веџис“ (Veggies) на брендот „Џо Мелоун Лондон“ (Jo Malone London), Селин Ру, глобална директорка за мириси, нашла инспирација во љубовта кон градините и зеленчуковите градини. По посетата на некои од најубавите градини со зеленчук и градски градини низ Велика Британија, ја привлекла неочекуваната убавина на цвеклото, кое го опишува како „скапоцен камен“, и решила да го претвори во елегантен мирис што може да се носи. Покрај тоа, црната рибизла внесува примамлива овошна сладост, додека пачулито му дава софистицираност и длабочина. (Околу 75 евра/30 мл)

Парфем „Пекато Нобиле“ на „Каролина Херера“

Carolina Herrera

„Пекато Нобиле“ е инспириран од спомените од детството на основачката на брендот Каролина Херера и од заедничките десерти во скриен ресторан во њујоршката населба Литл Итали. Инаку, славната дизајнерка уште во 2018 година го напушти брендот, чиј парфемски оддел работи во рамките на компанијата „Пуиг“ (Puig). Во првата половина на 2026 година брендот забележа двоцифрен раст на приходите, надминувајќи го вкупниот раст од 4,4 отсто на матичната компанија „Пуиг“.

Мирисот ги спојува ф’стаците, какаото и скапоценото агарово дрво , создавајќи интересна рамнотежа меѓу слатките и солените тонови.

Ф’стакот има долга историја што води до Блискиот Исток и Централна Азија, каде што се одгледува илјадници години. Денес е неизоставен во баклавата, алвата, сладоледот, кремовите и колачите, но и во солените јадења. Во парфемот е особено интересен затоа што внесува јаткаста, кремаста и благо слатка нота, па мирисот лесно потсетува на сладолед или кремаст десерт од ф’стаци/Depositphotos

 

Помислете на сладолед од ф’стаци, кремасти десерти и темно чоколадо, додека агаровото дрво додава длабока, дрвенеста и чадлива нота. Токму контрастот меѓу сладоста и солените, дрвенести тонови му дава на парфемот софистициран карактер. (Околу 260 евра/100 мл)

Парфем „Тобако Чоколат“ на „Том Форд“

Tom Ford

Сензуалноста е длабоко вкоренета во ДНК на брендот, па не изненадува што најновиот „Тобако Чоколат“ е богат, амбрен гурмански мирис со раскошен карактер.

Ги спојува тутунот и темното чоколадо, со блага медна сладост. Парфимерката Даниела Андрие, која стои зад композицијата, го опишува како мирис што ги издигнува гурманските ноти на ново ниво. Во неговото срце е ексклузивниот акорд „чад од какао“, создаден со заедничка дестилација на бавно печени листови тутун и чисто темно чоколадо. (Околу 165 евра/30 мл)

„Реплика Лост Идн“ на „Мезон Маржела“ (Maison Margiela Replica Lost Eden)

Maison Margiela Prais

„Лост Идн“ е сладок гурмански мирис инспириран од забранетото овошје и митската Рајска градина. Композицијата се отвора со нота на кандирано црвено јаболко, која внесува сочна, благо киселкава сладост, а потоа ја ублажува кадифената ванила во срцето на мирисот.

Во основата е агаровото дрво, кое додава темна и чадлива нота и ѝ дава на композицијата посериозен, пософистициран карактер.

Накратко, замислете кандирано јаболко и ванила или карамелизирано јаболко, слатки и кремасти десерти. Морам да додадам дека, ако сте љубител на гурмански парфеми, нема да погрешите ни со нешто постариот „Реплика Бај д Фајрплејс“ (Maison Margiela Replica By the Fireplace), кој, како што навестува и самото име, ја доловува топлината на каминот среде зима - пријатното, сензуално чувство на вечерите поминати покрај оган.

Пред компирот и пченката да станат широко распространети, костенот во некои делови од светот бил толку важен што се користел како замена за брашно, а од него се правеле леб, каши и колачи. А сега и парфеми/Depositphotos

Особено се издвојува печениот костен, чиј мирис е доловен со комбинација од нота на костен и масло од црвено бобичесто овошје. Ванилата додава сладост. Потсетува на печени костени, топли зимски десерти и слатка ванила. Го додавам и „Реплика Кофи Брејк“ (Maison Margiela Replica Coffee Break) - кафеи ванила, што потсетуваат на кремасто лате или капучино што се пие некаде на пријатно и топло место. (Околу 200 евра/100 мл)

„Фјучр Меморис“ на „Биредо“ (Byredo Future Memories)

Byredo

Новиот мирис спојува сочна црна рибизла, различни видови ванила, путер од ирис и нежен цвет од портокал, создавајќи кремаст, овошен и софистициран мирис.

Иако ова е новитет, мене многу поинтересен ми е нивниот гурмански парфем „Илевент Аур“ (Byredo Eleventh Hour), во кој главната улога ја има бан тимур, зачин од Непал познат и како непалски сечуански бибер. Во кулинарството се користи во сосови, кари и јадења од зеленчук и месо, а на парфемот му дава цитрусна, зачинска нота. Тука се и дивата смоква, и румот, па потсетува на спој од ванила, бадеми и карамела. Инаку, тонката, односно зрното тонка, е семе од плодот на тропското дрво Dipteryx odorata, кое потекнува од Јужна Америка.

Слатки залчиња, мирисни инспирации/Depositphotos

Во парфемите е многу популарна затоа што има топол, сладок и кремаст мирис, кој потсетува на комбинација од ванила, бадеми, карамела и благ цимет. Во кулинарството се користи како зачин, најчесто во десерти, кремови, чоколадо, сладолед и колачи, а може да се изренда слично како мускатно оревче. (170 евра/50 мл)

Парфем „Курки“ на „Мезон Франсис Куркџијан“ 

Maison Francis Kurkdjian

„Курки“ - прекарот на парфимерот Франсис Куркџијан - е најслаткиот парфем во колекцијата на нишниот бренд. Со изразени ноти на бонбони, парфемот претставува вистинско враќање во детството и шарените слатки.

Во кремаст и примамлив облак од бел мошус, парфемот спојува овошни ноти што потсетуваат на тути-фрути бонбони. Композицијата е замислена како покана да го разбудиме детето во себе. Доволно волшебен да нè поведе во светот на соништата, а доволно безгрижен да се осмелиме да ги оствариме, „Курки“ се промовира како гурмански парфем за возрасни што се осмелуваат да сонуваат како деца. (135 евра/35 мл)

„Маневрите на баронесата“ на „Пенхалигонс“ (Penhaligon’s The Manoeuvres of the Baroness)

Penhaligon’s 

Новиот парфем на „Пенхалигонс“ внесува гурманска нота преку кремот Шантили, односно мирисна интерпретација на шлаг со ванила. Цветот од портокал додава мекост што потсетува на нежни цитрусни десерти, додека италијанската мандарина внесува свежина. Резултатот е пософистицирана верзија на гурмански мирис - повеќе наликува на кремаст десерт со цитрусна нота отколку на класичен сладок парфем. Замислете шлаг со ванила, цитрусни десерти, мандарини... (275 евра/75 мл)

Depositphotos

Depositphotos

Le Labo Thé Matcha 26

Le Labo

И за крај - куќата чиј секој мирисен чекор го следам. Овој мирис не е инспириран само од мачата како состојка, туку и од атмосферата на самиот чај во јапонската култура: замислен е како миг на интроспекција и враќање кон себе. Композицијата спојува акорд на мача со кремаста смоква, додека мекиот ветивер и кедровото дрво со изразена текстура му даваат длабочина, а горчливиот портокал внесува свежина.

Благо слатка и речиси јадлива димензија, на која горчливиот портокал ѝ дава контраст. Резултатот повеќе наликува на елегантен мирис на чаен ритуал отколку на класичен сладок гурмански парфем. Многу шик и доказ дека најсилното оружје понекогаш доаѓа во мали шишенца. (93 евра/15 мл)