Реномиран американски магазин ги одбра најдобрите хотели во Хрватска

Реномираниот американски магазин за патувања „Конде Наст Травелер“ (Condé Nast Traveler) неодамна состави листа на најдобрите хотели во Хрватска. Магазинот нагласува дека Хрватска некогаш била летно одморалиште на австроунгарските аристократи, а денес стана популарна дестинација за милениумците, љубителите на јахти и семејствата кои бараат авантуристички одмор.

„Хрватска успеа да ја зачува својата природна убавина, а истовремено да се модернизира. Извонредното современо сместување совршено се вклопува со античките урнатини, карпестите хоризонти и волшебните плажи. Го нуди најдоброто од двата света и заслужено е на врвот на сите наши листи со желби“, пишува „Конде Наст Травелер“.

Со цел да се изберат најдобрите хотели во Хрватска, уредниците на магазинот независно го избраа секој хотел и напишаа критики од прва рака. При изборот на хотел, уредниците ги земале предвид и луксузните недвижнини и помалку познатите, автентични и инсајдерски дестинации. Тие секогаш бараат убав дизајн, одлична локација и добра услуга, како и сериозни стандарди за одржливост.

Зори Тајмлес Хотел (Zori Timeless Hotel), Палмижана

Booking.com

Мери Новаковиќ го опишува хотелот Зори Тајмлес на островот Свети Клемент како елегантно одморалиште со четири апартмани. Сопствениците Ива и Ренато Томлиновиќ, по децении водење ресторан за морнари, го создадоа овој хотел со пространи тераси, приватни базени и хидромасажни кади. Внатрешниот и надворешниот дизајн се беспрекорно комбинирани благодарение на архитектите Зринка и Ватрослав Вишковиќ. Готвачот Синиша Јевросимов нуди извонредни јадења кои ја комбинираат хрватската кујна со меѓународни вкусови, а винската листа ги истакнува одличните, но сепак недоволно познати хрватски вина.

Хотел Лемонгарден (Hotel Lemongarden), Брач

Booking.com

Хотелот Лемонгарден во Брач, познат по плажата Златни Рат со бели камчиња, се наоѓа во шармантното рибарско село Сутиван. Магазинот пишува дека овој хотел за возрасни се наоѓа во три внимателно реставрирани камени куќи, а секоја соба има уникатен, елегантен ентериер. Главниот адут на хотелот е бујната градина исполнета со рози, хибискус, палми и стотици миризливи стебла на лимон, кои го опкружуваат идиличниот надворешен базен и терасата на ресторанат, создавајќи чувство на тајно засолниште. Љубовта кон природата може да се види и во храната, бидејќи готвачот Анте Удовичич користи главно локални, органски одгледани состојки, од кои некои се собираат во градината на хотелот.

Сан Канцијан Вилиџ и Хотел (San Canzian Village & Hotel), Бује

Booking.com

Хотелот Сан Канцијан се наоѓа во срцето на Истра, во средновековно село на врвот на полуостровот. Остатоците од венецијанската тврдина од 14 век му даваат на хотелот релаксирачка атмосфера, додека модерните ентериери хармонично го надополнуваат карпестиот пејзаж. Хотелот е совршено лоциран за истражување на околните села, но гостите ќе уживаат и во релаксација покрај бесконечниот базен со поглед на маслинови градини и лозја. Ресторанот Лучијано (Luciano) користи локални органски производи, а винската листа ги нуди најдобрите вина од околните винарии. Уредниците на „Конде Наст“ истакнуваат дека Сан Канцијан е идеален избор за оние кои бараат место за повлекување.

Нинион Бутик Хотел (Ninion Boutique Hotel),  Дубровник

Booking.com

Хотелот Нинион во Дубровник, сместен на работ на варовнички карпи, нуди интимен и луксузен престој со само девет соби. Овој бутик хотел за возрасни, дело на архитектите Нина и Жељко Каталиниќ, се одликува со модерен, минималистички дизајн, внимателно одбран мебел и ѕидови украсени со современа уметност, вклучувајќи дела од нивниот син Иван Каталиниќ, успешен уметник од Виена. Барот на покривот нуди прекрасен поглед на зајдисонцето над Елафитските острови, а хотелот е на само 20 минути возење од раздвижениот Дубровник, што го прави совршено место за одмор по истражувањето на градот, оценуваат уредниците.

Гранд Парк Хотел (Grand Park Hotel), Ровињ

Booking.com

Лоциран во Ровињ, хотелот Гранд Парк се наоѓа помеѓу миризливата борова шума и познатата плажа Мулини, а со кратка прошетка се доаѓа до центарот на градот и локалната марина. Уредниците велат дека хотелот нуди сè што ви треба за удобен престој, од шест ресторани и барови со Мишелин ѕвезди до низа бутици. Дизајниран од познатиот италијански архитект Пјеро Лисони, хотелот посветува големо внимание на деталите. При пријавувањето ќе добиете кожена тетратка која служи и како водич низ историските приказни на Ровињ.

Амфора Хвар Гранд Бич Ресорт (Amfora Hvar Grand Beach Resort), Хвар

Booking.com

Овој хотел на Хвар, еден од најпопуларните хрватски острови, е идеално место за целото семејство. Лоциран во приватен залив, хотелот е на само пет минути пешачење од најблиската плажа каде што се наоѓа ексклузивниот бич клуб „Ле Ба“ (Les Bains). Одморалиштето има неколку квалитетни и достапни ресторани и барови, велат уредниците, вклучувајќи го и популарниот бар во базенот. Со модерен дизајн насекаде, хотелот е одличен избор за родители кои бараат романтично бегство од секојдневието, но со бројни содржини како што се каскадни базени, тобогани и разни активности за децата во текот на денот. Се наоѓа во непосредна близина на градот, за моменти кога се потребни прошетки или дополнителна забава.

Лешиќ Димитри Палас (Lešić Dimitri Palace), Корчула

Booking.com

Како што пишува магазинот, островот Корчула ги потсетува на серијата „Игра на тронови“ (Game of Thrones) поради својата историја и добро сочуваниот амбиент. Тие истакнуваат дека Лешиќ Димитри Палас нашол инспирација во патувањата на Марко Поло, кој наводно е роден таму. Овој хотел, сместен во автентично реставрирана камена палата, нуди пет елегантни апартмани, тематски уредени според приказните за патот на свилата - од Кина до Индија. Гостите таму уживаат во апартманското сместување кое им дава независност, а секој апартман има кујна. Доколку не сакаат да готват, хотелот нуди услуга за готвење со сопствен готвач. Корчула е позната како рај за љубителите на храната, а хотелот има и сопствен  Мишелин ресторан со поглед на недопредното крајбрежје.

Вила Наи 3.3 (Villa Nai 3.3), Дуги Оток

Booking.com

Вилата Наи 3.3, лоцирана на Дуги Оток, е дело на Никола Башиќ, еден од најавангардните хрватски архитекти. Списанието го опишува прекрасниот изглед на вилата како да никнува од земја, како луксузен мравјалник, што го прави престојот таму уникатно искуство. Каменот користен за изградба е од околните ридови, со што се почитува локалното наследство. Со само осум соби распоредени во полукруг и разделени со големи камени ѕидови, Вила Наи успешно ја комбинира дивата природа со контролираниот комфор. Посебните карактеристики вклучуваат бесконечен базен со солена вода со поглед на маслинови градини и два гурмански ресторана кои користат светски познатите маслинови масла од имотот.

Вила Џардино Херитиџ Бутик (Villa Giardino Heritage Boutique), Бол

Booking.com

Вила Џардино во Бол, едно од позатскриените одморалишта на јужниот брег, уредниците на „Конде Наст“ ја опишуваат како нешто од приказните на Френсис Скот Фицџералд. Се вели дека овој бутик хотел е сместен во „колонијална“ вила и зрачи со класичен, софистициран стил, враќајќи ги гостите во златното доба на Медитеранот. Во внатрешноста доминираат бели ѕидови, свежа бела постелнина и ладен камен под. Тој удобен, класичен стил продолжува во заедничките салони, каде што ѕидовите се покриени со уметност, отпечатоци и рефлексии на богатата културна историја на островот.

Маслина Ресорт (Maslina Resort), Хвар

Booking.com

Маслина Ресорт на Хвар нуди одржлив луксуз со акцент на благосостојбата. Одморалиштето го пошумило локалното подрачје и користи одржливи материјали, додека спа тимот обезбедува различни терапевтски третмани како масажи, звучна терапија и билни тоници. Дневните часови за медитација и фитнес дополнително придонесуваат за релаксација и обновување на енергијата. Сместен во Стариот град заштитен од УНЕСКО, Маслина Ресорт го избегнува метежот и вревата на Хвар, нудејќи мирен и безбеден одмор во средина што ја отсликува хармонијата на природата, според  „Конде Наст“.

Спирито Санто Палацо Сторико (Spirito Santo Palazzo Storico), Ровињ

Booking.com

Спирито Санто, лоциран во срцето на Ровињ, е совршен хотел за љубителите на прекрасни дрвени ентериери, нагласува магазинот. Овој рустикален бутик хотел, лоциран на мирна улица, нуди традиционално хрватско сместување со дополнителен луксуз по поприфатлива цена. Зградата некогаш била напуштена, но сопствениците внимателно ја реставрирале користејќи многу од оригиналните материјали и карактеристики, давајќи му на хотелот автентично и приземно чувство. Хотелот има седум соби и неколку апартмани, а е блиску до плажата и центарот на градот. Атриумот Кортил со својот бунар од 19 век обезбедува релаксирачки простор за уживање под ѕвездите, по ден поминат уживајќи во радостите на летото.