.webp){kind=icon}
Венеција е првиот град што експериментира со наплата на влезници за туристи. Неодамна беше воведена дневна такса од пет евра за посетителите што не живеат, не работат или не студираат во Венеција. Сите посетители на возраст над 14 години мора однапред да платат такса и да резервираат влез во градот, а доколку не го сторат тоа, може да бидат казнети од 50 до 300 евра. Повеќе информации се понудени на официјалната веб-страница на Венеција.
Ова не е единствената мерка што ја презема италијанската влада на сметка на туристите, со цел да ги балансира желбите и потребите на туристите и жителите во тој град. Уште во 2021 година беше воведена забрана за влез на големи бродови за крстосување во историската лагуна на Венеција за да се спречи пренатрупаноста.
Но тоа не ги спречи посетеноста и заинтересираноста за манифестацијата што се смета за олимпијада во уметничкиот свет, Биеналето во Венеција, за која се продаваат до милион билети и чиј број на посетители во просек е над 4.000 дневно.
Кураторот на годинешното 60-то издание, Адријано Педроса, доаѓа од Бразил и моментално е уметнички директор на Музејот на уметности во Сао Паоло. Тој е првиот куратор од Латинска Америка, а темата што ја избра е „Странци насекаде“ (Stranieri Ovunque). Тој го користи терминот странец за да ги означи сите маргинализирани групи, но и да го привлече вниманието на уметници што можеби биле запоставени во нивните средини за време на нивниот живот. Нивните дела сочинуваат 55 отсто од официјалната листа на уметници. Од нив, 47 се родени во 19 век, а најстар е Елисеу Висконти, роден во Италија во 1866 година, а починал во Бразил во 1944 година. Годинава изложуваат 331 уметник, односно со оглед на тоа што во неколку случаи станува збор за колективна изложба, се проценува дека бројот на уметници достигнува 400 од 69 земји во светот.
Настанот, кој ќе трае до 24 ноември, се одржува во големиот павилјон Џардини и блискиот Арсенал, поморска база и поранешно бродоградилиште што зафаќа повеќе од една петтина од Венеција.
Сите патишта водат до историските палати
Специфика на годинашниот саем кога станува збор за уметноста е тоа што изложбите за кои има најголем интерес се одржуваат во историски палати. Изложбата „Јанус“ е поставена во новиот уметнички центар на милијардерот Николас Бергруен, во палатата „Диедо“ од 18 век, во областа Канареџо. Американскиот милијардер, син на познат трговец со уметнички дела од Германија, кој своевремено се дружел со голем број уметници преку неговата фондација „Бергруен артс енд калчр“ (Berggruen Arts & Culture), вклучувајќи го и Пабло Пикасо, нарачал дела од 11 уметници да бидат изложени во палатата, некои од нив се Урс Фишер, Пјеро Голија, Карстен Холер, Ли Уфан и Хироши Сугимото. Центарот во Венеција, кој ги дополнува центрите во Лос Анџелес и во Пекинг, ја поврзува работата на Институтот на Исток и Запад и обезбедува средина за поттикнување поотворен и поконструктивен интелектуален дијалог меѓу Кина и Западот, која е една од мисиите на овој филантроп, како што е истакнато на официјалната веб-страница.
Основачот на „Керинг“ (Kering), Франсоа Пино, кој се бори да ја задржи луксузната аура на главниот бренд на групацијата, „Гучи“ (Gucci), пред неколку дена отвори музеј во центарот на париската „Комерцијална берза-Пино“ (Bourse de Commerce-Pinault). До 2017 година Пино инвестираше 194 милиони долари во реставрација на зградата што ги зачувала колонадите од 16 век и ерата на француската кралица Катерина де Медичи, а која служела како берзански трговски центар на крајот на 19 век.
На Биеналето колекцијата на Пино е претставена со изложбата „Лиминал“ на Пјер Хјуге. Инаку, еден од брендовите од портфолиото на „Керинг“, „Ботега Венета“ (Bottega Veneta), е одговорен за работната облека наречена „Идиом“ (Idiom), која ја дизајнираше креативниот директор на брендот Матју Блази, во соработка со други уметници. Таа изложба беше поставена во поранешната царинска зграда на Пунта дела Догана, која заедно со палатата „Граси“, која францускиот милијардер ја купи во 2005 година за 29 милиони евра, ги формира изложбените простори на колекцијата на Пино.
Што се однесува на сместувањето, вистинските љубители на уметноста и луксузот ги препорачуваат токму оние простории што се наоѓаат во самите палати. Во палатата „Пападополи“, една од осумте монументални палати на Големиот канал, Аман Венеција (Aman Venice) го персонифицира раскошот на Ла Серенисима. Уметничките рококо-дела се суптилно усогласени со внатрешноста, а приватните градини, реткост во овој пловечки град, нудат поглед кон раскошни ресторани и пространи апартмани. Цената за ноќевање е од 2.500 евра нагоре.
Палатата „Венарт“ (Palazzo Venart), 10 минути од мостот „Риалто“ и далеку од класичните туристички маршрути, крие градина со приватно пристаниште на Големиот канал и гламурозен ресторан, со две ѕвезди на „Мишелин“. Секоја соба ја раскажува приказната за благородната историја на градот преку префинет мебел и луксузни детали, кои елегантно го реинтерпретираат духот на златниот 18 век. Раскошните ентериери им оддаваат почит на патниците, поетите, уметничките дела и древните традиции, а цените започнуваат од 700 евра по ноќ, па нагоре.
Ако сте инспирирани од Олимписките игри ова лето, хотелот „Белмонд Ципријани“ (Belmond Hotel Cipriani) е единствениот што нуди олимписки базен во цела Венеција. Тој нуди различни видови сместување со поглед на градината, лагуната и плоштадот „Свети Марко“, потоа ресторанот „Оро“ со ѕвезда на „Мишелин“ и спа-третмани во велнес-центарот „Казанова“, а цената за ноќевање е од 2.200 евра.
Хотелот „Даниели“, со поглед на Големиот канал на Рива дела Скиавони, е палата стара шест века, чие романтично опкружување, богата култура и историја се овековечени во голем број филмски продукции. Цената за ноќевање е 1.200 евра.
Подостапна опција е хотелот „Буцинторо“ (Hotel Bucintoro) со четири ѕвезди и со исклучителни оценки на „Трип адвајзор“ (Trip Advisor), на само неколку минути оддалеченост од Биеналето и плоштадот, каде што цената на соба дневно започнува од 300 евра. Сместен на Големиот канал, хотелот „Касагредо“ (Ca'Sagredo) е палата од 15 век што изгледа како музеј, со раскошен ентериер украсен со ремек-дела на венецијанските сликари Николо Бамбини и Џамбатиста Тиеполо, а цените на собите започнуваат од 250 евра. За истата цена можете да престојувате во „Сина центурион“ (Sina Centurion Palace), бутик-хотел со пет ѕвездички на неколку минути од базиликата „Санта Марија дела Салуте“ (Santa Maria della Salute), Пунта дела Догана и познатиот музеј „Гугенхајм“.
Ако имате дополнителен ден и сакате да го избегнете метежот
Откријте помалку познати скапоцени камења во помирни населби и споредни улици до историски цркви, работилници за гондоли и повеќе од тоа, на приватна тура што чини 85 евра. Или, ако сте уметнички вешти, можете да изберете да направите своја карневалска маска што ќе ја носите дома. Часовите ги одржува мајстор, па можете да научите за венецијанските карневалски традиции и посебните техники што се усовршувале во Венеција со текот на годините. Овој настан се нуди на „Трип адвајзор“ за 69 евра.
Доколку сакате да избегате од градскиот метеж, не пропуштајте ги блиските острови. Тука е Мурано, остров познат по своите работилници за стакло, кои произведуваат сè, од стакло и накит до шарени лустери, на кои им е посветена цела изложба на годинашниот фестивал „1912-1930 Мурано глас и Венециското биенале“ во Ле станце дел Ветро. Изложбата со 135 експонати дава маестрален увид во најстариот венецијански занает.
„Хајат центрик мурано“ (Hyatt Centric Murano Venice) е поранешна фабрика за стакло, која е претворена во модерен објект, а хотелот, кој нуди и бесплатен превоз до аеродромот „Марко Поло“, ги има најдобрите оценки од пребарувачот во Мурано. Цената започнува од 270 евра за ноќевање.
Потоа, само кратко возење со траект ве носи на островот Бурано, познат по сложената тантела и шарените куќи. „Каза Бурано“ (Casa Burano) е хотелски комплекс од пет куќи, лоциран во срцето на островот, дизајниран со помош на локални компании, кои нудат автентично искуство од животот во Бурано, неговата боја и уникатност.
Во соработка со имотот Вениса, тие нудат и искуства за дегустација на вино што ќе ви ја раскажат приказната за лозјето Мацорбо и симболичното вино на венециската лагуна, кое е со многу мало производство, но е суштината на автохтоната култура и нејзините лозарски и занаетчиски традиции. Постојат четири опции за овие тури, од 45 до 180 евра по лице. Самиот ресторан „Вениса“ има обична и зелена ѕвезда на „Мишелин“ и нуди искуство за јадење на брод што плови низ лагуната од Венеција или Алтина до островот Мацорбо. Ова искуство чини од 220 евра по лице за мени од седум и повеќе деликатеси. Buon appetito!
