Хотелот „Белмонд Ципријани“ со 94 соби има богата историја. Отворен е во 1950-тите од страна на креаторот Белини, со бар што и денес е легендарен. Има отворен базен со олимписка големина веднаш до каналот Сан Џорџо Маџоре, кој очигледно е резултат на забуна помеѓу стапките и метрите за време на изградбата. Неодамна беше прогласен за најдобар хотел во светот на новата листа што на објектите им дава композитна оценка врз основа на информации собрани од широк спектар извори.
Листата наречена „Топ 1.000 најдобри хотели во светот“ ја состави француската компанија „Ла лист“. Рангирањето не е резултат на оценките на жирито, кое лично ги посетува објектите, туку компилација на оценки од клиенти на веб-страниците за резервации, објавени рецензии од туристички списанија, глобални и локални медиуми и туристички водичи. Тоа има сличен формат и методологија на оние што оваа компанија ги користи за да ја креира истоимената глобална листа на ресторани, по која е и најпозната.
Хелен Пиетрини, извршна директорка на „Ла лист“, вели дека забележала празнина на пазарот за ресурс што ќе ги обединува различните критики на едно место, низ кое патниците ќе можат да пребаруваат за да ја поттикнат својата фантазија.
„Луѓето сакаат да бидат инспирирани од хотели рангирани од најдобрите до – не најлошите, туку сите прекрасни хотели во светот“, изјави таа во едно интервју. „Тие сакаат да видат подолг список на одлични места на кои треба да одат, а не нужно најскапи. „Одржливоста и уникатноста се поважни за некои потрошувачи отколку луксузот“, додава таа, што е делумно и причина поради која беа избрани и истакнати некои специфични хотели.
„Ла лист“ се придружува на долгиот список на различни ранг-листи и туристички водичи - иако малку од нив се занимаваат само со хотели. Другите ранг-листи, на пример, нудат увид во најдобрите светски дестинации, ресторани, барови и авиокомпании. Дури и „Мишелин“ започна како туристички водич, рангирајќи ги рестораните за патниците што крстосуваат низ Европа.
Но „Ла лист“ наскоро ќе добие важна конкуренција: во септември, „50 бест“ ќе ја објави својата инаугуративна ранг-листа на хотели за да ги дополни своите влијателни листи на најдобрите светски ресторани и барови. (Пиетрини порано работела во „50 бест“.)
Публикациите обично заработуваат пари преку спонзорства со брендови за храна или за пијалаци, кредитни картички и компании што се занимаваат со патувања. Водичот „Мишелин“, „50 бест“ и други исто така земаат пари од општините, државите или туристичките агенции што се финансираат од јавни фондови, кои сакаат да ја промовираат и да ѝ дадат кредибилитет на својата локална гастрономска сцена. „’Ла лист’ сè уште нема владини спонзори, но не се противи на таквата идеја“, вели Пиетрини. Во една од покреативните употреби на своето рангирање, „Ла лист“ има глобално партнерство со „Хјундаи“, кој ги вградува познатите ресторани во својот џипиес-систем за навигација и ги означува со симбол на готвачка капа.
Хотелите што ги избра „Ла лист“ во голема мера тежнеат кон луксуз, со најмалку 80 објекти под брендот „Фор сизнс“, кои се појавуваат во првите 1.600 од над 5.000 што ќе бидат достапни на апликацијата. Најголем дел од нив се во САД, а потоа во Италија, Франција и во Велика Британија. „Пенинсула Чикаго“ е најдобриот американски хотел на листата, уште еден пример за градски хотели што сами по себе ги надминуваат одморалиштата.
Листата исто така вклучува повеќе европски хотели во главните градови за кои почесто се пишува и кои имаат повеќе посетители од некои во јужноамериканските области или во пооддалечените градови. „Во иднина компанијата би можела да додаде подостапни хотели или куќи за гости на проширениот список“, вели Пиетрини.
Покрај официјалната листа, постои и почесна листа за која гласале вработените во„ Ла лист“, од кои не се барало да ги посетат имотите, туку да го користат сопственото расудување за да ги забележат трендовите, да ги споредат изворите и да разговараат со своите контакти во индустријата. Беа доделени четири хотелски награди за етика и одржливост, вклучувајќи ги „Бамбу Инда“ во Бали и „Сикс сенс Шахарут“ во Израел. Наградите за нови објекти што се отворени минатата година ги добија „Атлантис ројал“ во Дубаи, „Пенинсула“ во Истанбул, „Капела“ во Сиднеј и други.
„Хотелите што се нови или неодамна претрпеле големо реновирање може брзо да се појават на листата“, вели Пиетрини. Таа го истакна „Шевал блан“ во Париз, кој беше отворен во 2021 година и беше меѓу оние со најдобра оценка - пет.
На листата на најдобри хотели, системот на бодување резултираше со голем број нерешени резултати, со 20 хотели што го делат местото број 5. Меѓу нив се хотелот „Булгари“ во Дубаи, „Роузвуд“ во Лондон, хотелот „Бакара“ во Њујорк и „Бањан три мајакоба“ во Мексико - сите со 98 од 100 поени. А речиси 200 хотели добија оценка 10. (На пример, 37 се на 10-то место со 95,5 поени.)
„Апсолутно е точно дека хотелите се помалку поларизирани од рестораните“, вели Пиетрини. „Интерно коментиравме дека резултатите се многу, многу блиску еден до друг во хотелската база на податоци, малку повеќе отколку во ресторанската“.
Но еден хотел се истакна како единствен бр. 1, вели Пиетрини, повеќепати излегуваше на врвот на листата додека го тестираа и нагодуваа алгоритмот: хотелот „Ципријани“. Тој за влакно ги надминал хотелите што се изедначени за бр. 2, со резултат 99,75, надминувајќи ги преостанатите со 99,5.
Пиетрини го посетила хотелот за да се увери. „Сосема разбирам зошто едногласно е оценет позитивно од сите извори“, рече таа. „Тој е легендарен, култен хотел. Навистина можете да ја почувствувате историјата во секој детаљ на ова здание. Тој е хотел со приказна“.
Издвојуваме еден поглед на најдобрите хотели, според „Ла лист“:
Белмонд хотел Ципријани
Локација: Венеција, Италија
Резултат: 99,75
Место: 1
Валдорф Асторија Лос Кабос Педрегал
Локација: Кабо Сан Лукас, Мексико
Резултат: 99,5
Место: 2 (изедначено)
Пенинсула Чикаго
Локација: Чикаго, САД
Резултат: 99,5
Место: 2 (изедначено)
Шевал Блан Сент-Барт Исле де Франс
Локација: Свети Вартоломеј, Франција
Резултат: 99,5
Место: 2 (изедначено)
Ермитаж Беверли Хилс
Локација: Беверли Хилс, САД
Резултат: 99
Место: 3 (изедначено)
Савој
Локација: Лондон, Велика Британија
Резултат: 99
Место: 3 (изедначено)
Ла резерв Париз
Локација: Париз, Франција
Резултат: 99
Место: 3 (изедначено)
Ле Мурис
Локација: Париз, Франција
Резултат: 99
Место: 3 (изедначено)
Ил Сан Пјетро ди Позитано
Локација: Позитано, Италија
Резултат: 99
Место: 3 (изедначено)
Оберој Удајвилас, Удајпур
Локација: Удајпур, Индија
Резултат: 99
Место: 3 (изедначено)
Парк-хотел Вицнау
Локација: Вицнау, Швајцарија
Резултат: 99
Место: 3 (изедначено)
Пенинсула Шангај
Локација: Шангај, Кина
Резултат: 99
Место: 3 (изедначено)
.webp){kind=icon}
