На плажа во Грција или по патот на Инките - каде на одмор годинава?

Иако деновиве времето е навистина променливо, сепак штом ќе поминат првомајските празници, како по автоматизам почнува да се шири летниот оптимизам, а со тоа и планирањето на годишните одмори. Тврдоглавата инфлација со која се соочуваме веќе подолго време се одразува и на аранжманите за летување, и тоа видливо. Сепак, анализирајќи ги понудите за одмор на повеќе туристички агенции во земјава, заклучокот е дека има аранжмани речиси за сечиј џеб: почнувајќи од еднонеделен одмор во Грција во раното лето за 90 евра по лице со вклучен автобуски превоз и сместување во двокреветни или трикреветни соби, преку кратки или подолги опции за крстосување, до луксузни долги одмори на егзотични локации или необични патувања низ светот.

Ако веќе изборот не е сопствена режија, што доколку сте вешти во планирањето и имате време за тоа може да го направи одморот значително поевтин, тогаш важно е да се знае дека опциите за одмор се толку широки што некои агенции дури креираат и индивидуална понуда според буџетот на клиентите. Освен тоа, секогаш може да заштедите доколку направите резервација преку агенциите многу порано, опција што може да ја намали цената за речиси третина.

Разгледавме многу понуди од македонските туристички агенции и даваме краток преглед на тоа какви аранжмани се нудат, кои се лесно достапните дестинации и по која цена.

Иако е поскапена, Грција и натаму е најевтината опција за одмор

Иако зборуваме за зголемени цени во однос на претходните години, особено на периодот од пред пандемијата, сепак Грција и натаму се чини дека е најевтината опција за летен одмор, каде што може да патувате за најмалку 89 евра за седум ноќевања и вклучен автобуски превоз. Ова е цена по лице, а престојува најчесто е во сместувачки капацитети со двокреветни или трикреветни соби. Секоја друга опција е секако поскапа варијанта доколку се патува на одмор преку агенција.

Грција Depositphotos

 

Веќе од крајот на мај почнуваат некои поевтини летни аранжмани. Искуството на туристичките работници покажува дека од летните дестинации, кај нас најбарана секогаш е Грција, како најблиска дестинација. Меѓутоа, не изостануваат и чартер-програмите што ги има во нашата држава, а се со поволни цени за опцијата со „сė вклучено“ (англ. all inclusive service), како што се Aнталија, Бодрум, Eгипет и Tунис, вели Ана Марија Алексова Малева, оперативна менаџерка на туристичката агенција „Стаф“, која неодамна зборуваше за летните туристички понуди во интервју за „Блумберг Адрија ТВ“.

„За жал, како и сė друго, исто така и во туризмот цените секојдневно растат. Ако одредени аранжмани за хотелите за летни понуди ги имало на пример за 1.000 евра, зборувам за двајца да патуваат една недела со опцијата ‘ол инклузив’, сега цената е околу 1.500 евра, подолу нема. Има секако некои поевтини опции, но за квалитетот на пример што туристите го добивале пред две години за 1.000 евра, сега цената е за околу 50 проценти повисока. И Грција е поскапена, тоа мора да го нагласиме“, вели Алексова Малева, според која, сепак, станува збор за реално покачување со оглед на долгата и тврдоглава инфлација со која се соочува светот.

„На одредени дестинации покачувањата се движат од 15 до 20 проценти, но има одредени дестинации и хотели што имаат поскапување од 50 проценти“, вели Алексова Малева.

„Светот на дланка“ не е само изрека

Понудите на туристичките агенции се многу шаренолики и има сė за сечиј вкус. Покрај стандардните понуди за летување во соседството, сė поприсутни се и рекламите за класично летување покрај плажа, но на подалечни дестинации. Освен тоа, во поново време интерес има и за кружни тури, како и за аранжмани што подразбираат активен одмор и необични патувања, за кои веројатно ретко кој би се одлучил сам да ги организира. Тука комплетно им се препуштаме на понудите од туристичките агенции.

Поевтините понуди подразбираат на пример три-четиридневно патување на Малта или Кипар по цена од околу 350 евра, додека подолг одмор од околу шест или седум дена на овие дестинации би чинел нешто над 500 евра со вклучен авионски превоз и трансфер до и од аеродром, како и сместување, во кое најчесто е вклучен и појадок.

Дубаи веќе не е синоним за одмор за побогатите. Аранжман од пет дена во Дубаи, најголемиот и најнаселен град во Обединетите Арапски Емирати, кој се наоѓа на југоисточниот брег на Персискиот Залив, сега е достапен по цена од околу 600 евра со вклучена виза, летови, трансфери, сместување во хотел со појадок, екскурзии и автобуски тури низ стариот град и некои трговски центри.

Дубаи Bloomberg Mercury

 

Истиот период (пет дена) во Андалузија, најголемата шпанска автономна покраина со преубави градови и живописни села, чини речиси 1.000 евра. Секако, овие цени се различни во зависност од периодот за кој ќе се одлучите да патувате. Ние во ова наше сиже ги наведуваме почетните, поточно најниските цени што може да се најдат на интернет-страниците на македонските туристички агенции. Притоа, важно е да се напомене дека во тие цени се вклучени сместување (најчесто со континентален појадок), авионски билети, авионски такси и трансфер на релацијата аеродром-сместувачки капацитети и обратно. Но особено е важно да се обрне внимание на еден многу значаен детаљ: често кај аранжманите за пократки патувања се нудат авионски билети што вклучуваат единствено рачен багаж, што значи дека за поголем куфер ќе мора да се доплати.

Шест ноќевања во Египет со чартер-лет и сместување во хотел е задоволство за кое ќе треба да одвоите најмалку 590 евра, а доколку услугата е „ол инклузив“, цената може да надмине и 1.000 евра. Истата опција во Тунис е на располагање за најмалку 930 евра. Притоа, убаво е да се внимава и ако може да се уплати за патувањето порано за да се добие попуст, кој некогаш достигнува и до 30 проценти. А кога станува збор за патувања од околу 1.000 евра по лице, верувам ќе се согласите дека попустот во таков случај воопшто не е наивен и вреди да се направат напори за да се искористи таквата можност.

Исто така е важно да се има предвид дека некои од туристичките агенции креираат понуди за патување според желбите, посакуваните термини и расположливите буџети на клиентите, што е добредојдена опција за тие со префинет вкус.

Кога сме кај интересните понуди, достапни се е седумдневни крстосувања од Грција до Хрватска, Италија и назад за цена од 780 евра по лице. Ова вклучува сместување во внатрешна кабина и полн пансион, како и можност за избор на дополнителни екскурзии вклучени во цената. Таксите се исто така платени, а за подобар избор на кабина за сместување или за интернет-услуга се доплаќа.

Шест ноќевања во бисерот на Медитеранот, Анталија, се достапни по цена од 480 евра, а пет ноќи во романтичниот Париз може да чинат 800 евра.

Секако дека има и други интересни понуди за Македонците, особено кога станува збор за необични патувања. За 800 евра може да летувате осум дена на најголемиот остров во Средоземно Море, Сицилија, но на повеќе локации со вклучен авионски превоз, локален трансфер и сместување во хотели.

Најзападната земја на континентална Европа, Португалија, е достапна за 1.150 евра со десетдневни аранжмани во Лисабон и Порто.

Занзибар Фото: „Џангл трајб“

 

Четвртиот по големина остров во светот, африкански Мадагаскар, е уште една од интересните понуди за одмор, достапна за 2.400 евра, но за период од 17 дена. Додека десет дена во тиркизниот Занзибар, корален остров што е синоним за рај или хедонизам, е авантура за која треба да се одвојат најмалку 1.250 евра.

Ниту посета на Малдиви, кои се синоним за луксуз, веќе не чини цело богатство. Одмор во овој т.н. рај на Земјата за период од 10 дена чини 1.400 евра.

Виетнам и Камбоџа се достапни за тури од по 12 дена за 1.750 евра, додека 11 дена во Јапонија чинат 2.100 евра. За истата цена се нуди и кружна тура во Јапонија и Јужна Кореја. Притоа треба да се има предвид дека за влез во некои од овие држави е потребна виза, која претставува дополнителен трошок. 

Тура низ Тајланд, која ги вклучува главниот град Бангкок и најголемиот и најпосетуван тајландски остров Пукет, познат како бисер на Андаманско Море, е задоволство во времетраење од десет дена за кое треба да се одвои буџет од 1.400 евра за сместување со појадок и превоз.

Сингапур, Бали и Куала Лумпур Фото: „Џангл трајб“

 

Комбинираната тура што ги опфаќа Сингапур, Бали и Куала Лумпур е достапна по цена од 1.800 евра за 13 дена. „Патување во три прекрасни земји во Азија - модерната утопија Сингапур, неверојатните храмови на Јава и плажите на магичниот Бали, до посебната Малезија, односно нејзиниот главен град Куала Лумпур“, вака е описот на оваа авантура на интернет-страницата на „Џангл трајб“ (Jungle Tribe), туристичката агенција што нуди многу различни невообичаени аранжмани за патување и одмор.

Оттаму во разговор за „Блумберг Адрија“ посочуваат дека поаѓањето за најголемиот број тури најчесто е од Скопје, иако има некои исклучоци, на пример Индија, за каде што се поаѓа од Белград, но секако дека од туристичката агенција стојат на располагање за сите детали и организација во врска со таквите тури, чие поаѓање не е директно достапно од Скопје.

Нивното искуство покажува дека генерално налето најатрактивни дестинации за одмор се Занзибар, Куба, Малдиви, Сингапур, Бали, Куала Лумпур, додека наесен и напролет ѕвезди се Јапонија, Јужна Кореја и Виетнам. 

„Има дефинитивно голем пораст на патници што се одлучуваат да патуваат на овие необични тури, и тоа пораст значително се забележува од ноември досега, а да не споредуваме со претходно“, велат од туристичката агенција.

Дел од нивната понуда е и одмор од 12 дена на Куба, во главниот град Хавана и најпознатото летувалиште Варадеро, што може да се искуси за 1.650 евра. По нешто пониска цена, од околу 1.500 евра, може да се направи резервација од десет дена на Сејшели, скриениот бисер на Индиски Океан или, пак, 12 дена во Мексико.

Намибија - сафари Фото: „Џангл трајб“

 

Сафари во срцето на Африка - Кенија, за Македонците преку туристичките агенции сега е достапно по цена од 1.700 евра за 11 дена. Освен тоа, 15 дена на сафари во Намибија е одмор од 15 дена што ќе чини 2.200 евра плус трошоци за виза, но сите излети во рамките на патувањето се вклучени во цената.

Исто толкав период минат во егзотичните Јордан и Кипар како комбинирана тура чини 1.150 евра, додека Патот на свилата во магичната земја во Централна Азија - Узбекистан, е задоволство што трае девет дена и чини 1.800 евра.

Доколку одвоите меѓу 1.100 и 1.700 евра за одмор исполнет со многу авантури и посета на невообичаени места, тогаш изборот може да биде аранжман од 13 дена во Шри Ланка и на Малдиви, или одмор од 15 дена во кралското Мароко, кое се смета за порта на Африка кон Европа. Овие опции вклучуваат сместување во хотели со појадок и, секако, превоз.

Соло-патници – нов авантуристички тренд

Доколку се пријавите како соло-патник, потребна е доплата за еднокреветна соба како и каде било во светот, посочуваат од „Џангл трајб“. Со цел да се избегне тој трошок, туристичката агенција нуди опција да се ангажира за да спои двајца соло-патници, па на нејзината интернет-страница, како и на социјалните мрежи, постојано стои објава за кои аранжмани се бараат партнери за патувањето.

„Има доста соло-патници што не можат да најдат партнер за патување и ја користат програмата што ја нудиме за такви големи патувања“, велат од „Џангл трајб“.

Перу, Боливија, Чиле, Аргентина Фото: „Џангл трајб“

 

Ако сте од тие што уживаат во сосема поинакви и алтернативни, но активни одмори, тогаш кружна долга тура со посета на Перу, Боливија, Чиле и Аргентина во времетраење од 25 дена (достапна како опција во периодот октомври-ноември) чини 3.750 евра, со вклучен превоз и хотелско сместување главно со појадок, иако некаде е и полн пансион.

Еден од аранжманите, кој според нашите соговорници е доста атрактивен и за повозрасната генерација, е 20-дневна туристичка тура во Индија и Непал, која чини 1.350 евра. За поширока кружна тура за поголемите истражувачи, која ги опфаќа Кина, Тибет, базниот камп на Еверест (Everest Base Camp), Непал и Индија, разбирливо, ќе треба да се одвои значително повисок износ, речиси 4.000 евра. Оваа авантура трае 19 дена, со комплетно платен превоз и хотелско сместување со вклучен континентален појадок.

Светот одамна го напушти клишето дека летниот одмор подразбира престој на едно место и седење по цел ден на плажа. Променети се дури и дефинициите за тоа што всушност значи одмор.

Издвоивме многу од изобилството идеи за патување. Ваше е да ја понесете храброста со себе и да им се препуштите на авантурите. Направете паметен избор и уживајте.

 

Во моментов нема коментари за веста. Биди прв да коментира...

Остави коментар