Седум луксузни хотели во Италија што треба да ги посетите летово

Италија се продава сама по себе: галерија по галерија на ренесансни ремек-дела, лесни залачиња „качио е пепе“, поглед на брегот што изгледа уште подобро со чаша шприц во рака. Околу 458 милиони ноќевања забележале патниците привлечени од таквите мали волшепства во 2024 година, уривајќи рекорд во туризмот и правејќи ја Италија втората најпосетена земја во Европа, веднаш зад Шпанија.

„Се шегувам дека Италија секогаш е на врвот на мојата листа на желби“, вели Кристијан Клерк, извршен директор на АРЦ (Auberge Resorts Collection), познат американски бренд на луксузни хотели, кој неодамна го отвори својот прв хотел во Италија, сместен во ридовите на Тоскана надвор од Фиренца. „Имам чувство дека сите некако се поврзани со Италија. Ако ги сакате убавината, културата и храната, веројатно постојано ќе се враќате, исто како и јас“.

Тој постојан интерес објаснува зошто секоја година нови луксузни хотели ги подигаат стандардите на хедонистичкото уживање во стилот „ла долче вита“. А во 2025 година новите објекти се толку импресивни што дури и класичните бастиони на луксузот во Италија мораат да го подигнат нивото на услугата.

Ако сте како Клерк и Италија е на врвот на вашата листа на дестинации, еве седум нови и обновени хотели што вреди да се резервираат летово.

Collegio alla Querce

„Колеџо ала Куерче“ - Овој урбан ресорт го нуди најдоброто од двата света: оддалечен е само 15 минути возење од катедралата на Брунелески во центарот на Фиренца, но се наоѓа доволно далеку за да обезбеди чувство на мирно тосканско прибежиште. Дури 83 соби и апартмани се сместени во комплексот на згради од 16 век, кои некогаш биле училиште за елитата на Фиренца (оттука и името), потоа капела, па театар. Сега повторно е место за социјални собири, со лозници покриени со перголи што го ладат базенот и придушено осветлен бар во некогашната канцеларија на директорот на училиштето.

Полиците во собите се украсени со керамика изработена по нарачка од локални занаетчии, во согласност со елегантната палета на земјени тонови. А бидејќи луксузот денес подразбира ексклузивни доживувања, гостите можат да уживаат во часови за приготвување паста со готвачите на хотелот, дегустации на вино и приватни тури на галеријата „Академија“ (Accademia) надвор од работното време. Цените на собите се околу 1.000 евра.

Поглед од „Колеџо ала Куерче“ во Фиренца Извор: Collegio alla Querce

 

Vista Ostuni

„Виста Остуни“ - Во јули Остуни – село во регионот Пуља познато по средновековната архитектура и кривулестите камени улици – ќе го добие својот прв престижен хотел во палата од 14 век, веднаш надвор од центарот на градот. Пространите апартмани (почнувајќи од 60 квадратни метри) нудат поглед на морето или на познатите бели градби на Остуни. (Поради посебната архитектура од варовник, Италијанците го нарекуваат La Perla Bianca – „Бисерот на белината“.)

Познатиот италијански готвач Андреа Бертон од миланскиот ресторан „Бертон“ со ѕвезда на „Мишелин“ ќе отвори ресторан со врвна кујна на приземјето, додека на покривот ќе има бар со поглед на питомата природа. За гостите што сакаат да истражуваат, приватен превоз ќе ги вози до плажите оддалечени 15 минути возење, а лесно може да се организира и излет до селото Алберобело, познато по триаголните куќи трули. Цените на собите се околу 1.400 евра.

Рендер од „Виста Остуни“ Извор: Vista Ostuni

 

Orient Express La Minerva

„Ориент експрес ла Минерва“ - Рим моментално доживува процут на луксузни хотели, а најновата и најимпресивна едиција во оваа категорија е  „Ориент експрес ла Минерва“, сместен во срцето на историскиот центар, на 10 минути возење од станицата Остјенсе. Близината на станицата е клучна бидејќи хотелот е близнак на новиот луксузен воз „Ориент експрес“, кој го поврзува Рим со Сицилија и Венеција, нудејќи патувања инспирирани од стилот арт-деко од 1990-тите. Самиот хотел го следи тој стил со раскошни детали како мермерни мијалници во форма на школки во 93 соби. Најдобрите апартмани имаат насликани тавани и спектакуларен поглед на Пантеонот. Цените на собите се околу 1.000 евра.

„Ориент експрес ла Миневра“, нов хотел во срцето на Рим Извор: Orient Express La Minerva

 

Vetera Matera

„Ветера Матера“ - Матера, на југот на Италија, беше популарна дестинација за еднодневни екскурзии благодарение на своите куќи саси – пештерски домови издлабени во карпа, од кои некои датираат уште од палеолитот. Сепак, малку посетители остануваа прекуноќ поради недостигот од врвни хотели. Тоа ќе се промени во април, кога ќе се отвори „Ветера“. Неговите 23 соби се издлабени во саси, вклучувајќи и спа-зона со базени направени во карпата. Посетителите можат да ги истражуваат тесните улици и камените градби прикажани во филмот за Бонд „Нема време за умирање“ (No Time to Die), а потоа да уживаат во коктел во отворениот бар. Цените на собите се околу 500 евра.

Соба во карпа во хотелот „Ветера Матера“ Извор: Vetera Matera

 

Ancora Cortina

„Анкора Кортина“ - Доломитите никогаш не биле попопуларни, особено пред Зимските олимписки игри 2026 во Милано и Кортина. Американците одамна го претпочитааат овој регион во летно време, поради пешачењето, а не скијањето, бидејќи тогаш попладневната светлина им дава на планините единствен розов сјај. Меѓу новите отворања е и повеќегодишната обнова на култниот хотел „Роза Алпина“ (Rosa Alpina) на брендот „Аман“ (Aman), чиј назив потекнува од карактеристичниот планински сјај. Сепак, ние повеќе го претпочитаме „Анкора Кортина“, верзијата на омилениот хотел „Борго Егнација“ (Borgo Egnazia) во Пуља. Кога ќе се отвори во мај, неговите 38 соби ќе го носат впечатливиот дизајнерски потпис на Вики Чарлс, поранешна шефица на дизајн во „Сохо хаус“ (Soho House). Особено е значајно што хотелот е целосно обновен, а се наоѓа на местото на стариот хотел, кој бил темел на историската Кортина уште од 1826 година, во самиот центар на градот. Цените на собите започнуваат од 800 евра.

 

Lake Como Edition

„Лејк Комо едишн“ - Кога во јануари пишувавме за „Лејк Комо едишн“ како еден од најочекуваните европски хотели за 2025 година, рековме: „Кога еднаш ќе го видите неговиот пловечки базен над езерото Комо, можеби нема ни да ја забележите величествената зграда на хотелот со 142 соби“. Хотелот се наоѓа во обновена вила од 19 век и нуди погледи на планините Белаџо. Со препознатливиот „едишн“ стил – придушени светлосни ефекти и модерни ресторани – ова е наедно и првиот луксузен хотел во Комо што може да се резервира со поени „мериот бонвој“ (Marriott Bonvoy). Датумот на отворање и цените сè уште не се потврдени.

Рендер од „Лејк Комо едишн“ Извор: Lake Como Edition

Splendido, a Belmond Hotel

„Сплендидо, Белмонд хотел“ - Легендарниот хотел „Сплендидо“ во Портофино, сместен на рид со поглед на Лигурско Море, им бил омилено одредиште на славните личности како Елизабет Тејлор. Годинава, по повеќегодишна обнова под надзор на дизајнерот Мартин Брудницки, ќе стане уште поексклузивен. Гостите ќе уживаат во диџеј-сесии покрај базенот и италијански специјалитети на терасата на „Сплендидо грил“. А бидејќи „Белмонд“ е дел од луксузната групација ЛВМХ (LVMH), хотелот ќе има и спа „Диор“ со кабинети за масажа на отворено, додека го слушате звукот на брановите. Цените на собите започнуваат од 2.400 евра.

Базен со поглед, хотелот „Сплендидо“ во Портофино Извор: Belmond