Два нови ултралуксузни хотели во Рим. Не се знае кој е подобар

Рим, град што веќе подолго време се бори со пренатрупаност, очекува дополнителни 30 милиони посетители за време на католичкиот јубилеј годинава. Истовремено, низа нови хотели со пет ѕвезди се натпреваруваат да го привлечат вниманието на посетителите.

Меѓу реномираните брендови што неодамна се појавија во Вечниот Град, двата што предизвикаа најголемо внимание се хотелите „Ромео Рома“ (Romeo Hotel Roma) и „Булгари Рома“ (Bvlgari Hotel Roma). И покрај сличните поволни локации во близината на „Пјаца дел пополо“ (Piazza del Popolo), хотелите нудат драматично различни визии за современото угостителство. „Блумберг“ престојуваше во двата — еве ги нашите забелешки.

Ромео Рома

Десетгодишното целосно реновирање на историската палата беше иницирано од познатата архитектка Заха Хадид. Нејзините архитектонски проекти со карактеристични кривулести футуристички линии изгледаат како да се преземени од вселенски брод. Сепак, Хадид почина во 2016 година, а сопственикот на хотелот, неаполскиот бизнисмен Алфредо Ромео (по кого е именуван хотелот), ангажира друг архитект да го заврши проектот во соработка со нејзиното студио. Како резултат, ентериерот на палатата има структура со закривени, асиметрични форми што излегуваат од ѕидовите, брановидни шари на подовите и многу површински елементи што дејствуваат недоволно усогласени со целокупниот дизајн.

Овие наизглед дополнителни карактеристики вклучуваат воден ѕид од подот до плафонот во лобито, кој свети во променливи бои на виножитото; какофонија на скулптури и слики на ѕидовите на лобито, рецепцијата и заедничките простории; како и толку многу ултраретко, ултраскапо дрво макасар абоновина (драматично дрво со темнокафени и црни пруги од Индонезија) што ќе се запрашате дали останало нешто од овие дрвја во светот.

Гостите можат да пливаат над римските урнатини. Фото: Хотел „Ромео Рома“

 

Булгари

Обликуван со темелно реновирање огромна зграда од времето на Мусолини, изведено од италијанската фирма АЦПВ (ACPV Architects). Резултатот: ентериер преплавен со повеќебоен мермер и светло дрво. Брендирањето на „Булгари“ (Bvlgari) е доволно присутно преку врамени скици на нивниот накит на ѕидовите, книги за дизајн на полиците, ќебиња со логото на креветите, доволно за да не остави сомнеж каде престојувате, но и да не се чувствувате како случајно да сте влегле во продавница за накит.

Сличен суптилен пристап е применет во создавањето на чувството за локација. За разлика од хотелот „Булгари“ во Милано, кој ја имитира естетиката на градот преку умерени ентериери, тука има доволно сјај за да знаете дека сте во Рим. Различни мермери се присутни на подовите и ѕидовите; теписите се раскошни, но со малку застарени жолти бои; завесите се темноцрвени како воловска крв – вистинска експлозија на бои што би ги нашле во која било од историските палати на градот.

Соба во хотелот „Булгари“. Фото: Булгари Рома

 

Соби

Хотелот „Ромео Рома“ има вкупно 74 соби и во центарот на секоја се наоѓа двострана структура обложена со дрвен фурнир, која служи како преграда. Свртена кон креветот, структурата има огледало што се претвора во ТВ со притискање  копче, така што можете да лежите и да гледате Нетфликс или да уживате во панорамскиот поглед на себе (и евентуалниот сопатник). Од другата страна на структурата е бањата, со одвоен туш и тоалет зад стаклени врати. Во многу аспекти, оваа преграда е чудо на дизајнот и паметно, естетски пријатно решение за разграничување на просторот во мало опкружување. Сепак, бањата што не е отворена кон спалната соба е попријатно решение, бидејќи понекогаш (всушност, секогаш) сакате овие две простории да бидат одвоени.

Иако отворениот орман изгледа како да нема доволно простор за гардероба, централната структура вклучува паметно скриени фиоки. Убавите детали вклучуваат декоративен камин, кој како да излегува од дрвените ѕидови. Големите прозорци гледаат кон дворот, што кога е потопло време овозможува одличен поглед на минувачите.

Но креветот, чија скулптурална дрвена подлога завршува со широка основа, најмногу го оддава препознатливиот стил на Хадид.

Бања во хотелот „Булгари“. Фото: Булгари Рома

Хотелот „Булгари“ се одликува со примена на дрво и мермер во 114 гостински соби на кои не се штедело. Тука има голем број мали детали што се надеваме дека ќе ги најдеме во луксузни хотели, но ретко ги наоѓаме. Главните прекинувачи за светлата, завесите и приклучоците се наоѓаат во вдлабнати ноќни ормани, така што каблите и приклучоците се паметно скриени. Мебелот е со премиум дизајн, но не толку компликуван за да изгледа застарено за неколку години, а вратите се толку цврсти што бучавата од ходникот или каква било бучава едноставно не слушате. За тишината придонесува и локацијата на хотелот: зградата гледа кон мавзолејот на царот Август, што значи дека нема да има бучни соседи во скоро време.

Сè на сè, собите се доволно елегантни за да го почувствувате стилот, но доволно интимни за дизајнерските детали брзо да станат незабележливи, идеална комбинација за патници на кои луксузот им е норма, а не опсесија.

Храна

Кога станува збор за храната, хотелот „Ромео Рома“ има две главни ресторански опции. Ресторанот „Ил Кортиле“, кој го зазема задниот двор и затворената колонада од столбови, исто така е обложен со макасар абоновина. Менијата нудат лесни хотелски специјалитети со римски влијанија на пасти, салати и предјадења, а кога временските услови го дозволуваат тоа, ветуваат освежување на отворено за гостите што се одмораат покрај базенот со стаклено дно, кој лебди над античките римски ископини.

„Ил кафе“ во хотелот „Булгари“. Фото: Булгари Рома

 

Но главната атракција на хотелот е раскошниот ресторан каде што шефува ѕвездата готвач Ален Дукасе под името „Ил ристоранте Ален Дукасе“. Маси поставени пред отворената кујна и тим врвни готвачи во беспрекорни бели мантили создаваат театарска атмосфера. Не е особено римски, но тешко е да се оспори квалитетот на храната. Дегустациското мени од 300 евра вклучува инвентивни јадења, кои кулминираат со извонредни десерти. Мојот омилен беше креација со чоколадо и кафе, со сладолед послужен во лушпа од џиновски грав. Услугата е исклучително професионална, неформална и извонредна, а винската карта (со дополнителна цена) носи исто толку пријатни изненадувања како и менито, со мали производители од Бордо и Бургундија во комбинација со помалку познати опции, како десертно вино од Корзика.

Во хотелот „Булгари“ има и две кафулиња, на приземјето („Ил кафе“) и на покривот („Ла тераца“), кои станаа места за „да се види и да се биде виден“ меѓу римските локалци што се мешаат со хотелските гости. Во „Ил кафе“, на менито се безбедно непровокативни, беспрекорно приготвени класици на италијанската кујна: брускети со печена артичока, клуб-сендвич, тартар бифтек и слично.

Дневна соба во апартман на хотелот „Булгари“. Фото: Булгари Рома

 

На петтиот кат на хотелот, каде што се наоѓаат „Булгари бар“ и „Ил ристоранте Нико Ромито“, менито и услугата се беспрекорни. Достапно е дегустациско мени (од 160 евра по лице), како и еднакво привлечно а ла карт мени. Дури и стандардните јадења како супа од артичока или шпагети со домати се толку внимателно приготвени што се сигурно уживање, особено ако успеете да најдете маса на една од зелените тераси што го опкружуваат ресторанот. И тука, како и во остатокот од хотелот, услугата е токму онаква каква што би сакале: ведра, дискретна и секогаш достапна кога е потребно.

Заклучок

Хотелот „Ромео Рома“ ги исполнува очекувањата на многу нивоа. Персоналот? Извонреден. Храната? Одлична. Креветите? Меки (или барем душеците се меки). Тушот е како порој, пешкирите луксузни, а локацијата неколку чекори од „Пјаца дел пополо“, што е исполнување на сонот на секој гостин на главниот град на Италија.

Сепак, има особености што другите хотели од тој ранг ги немаат. На пример, џакузи -када сместена точно зад зглавјето на мојот кревет, до која може да се стигне само со качување по неколку мазно лакирани скали. Или одлуката во многу соби да се изложат слики на безлични жени со суптилен еротски призвук, дело на постмодерниот уметник Марк Костаби, кој врвот на кариерата го достигна во доцните 1980-ти, а чии дела денес може да се најдат во „Парк вест галери“ (Park West Gallery), најпозната по аукциите на крузери. Или коњ за нишање во игротеката покрај лобито, кој, за време на мојата посета, беше поставен веднаш до острата мермерна рамка. За некого овие карактеристики може да бидат одбивни; за друг верувам дека ќе бидат привлечни. Секој хотел тврди дека е уникатен, овој навистина е.

Поглед од терасата на хотелот „Булгари“. Фото: Булгари Рома

 

Хотелот „Булгари“ успева да балансира препознатлив дизајн и дискретен луксуз. Ова е голем хотел, но во него секој рецепционер го знае вашето име, чии соби изгледаат пространо, но не претерано, и каде што секој потенцијален извор на непријатност е разгледан и решен. Накратко, многу добар хотел, чиј шарм е осмислено да се стопи во луксузната нота на животот на неговите богати гости. За некои патници ќе се изгледа како незабележливо продолжение на нивното удобно секојдневие, за други дискретниот шарм на хотелот ќе претставува одмор сам по себе.

Во моментов нема коментари за веста. Биди прв да коментира...

Остави коментар