Познатата американска онлајн агенција за патувања „Експидија“ (Expedia) објави листа со трендови кои ќе бидат најпопуларни меѓу туристите во годината која само што почна. Списокот кој го базираат на искуства од корисниците покажува дека масовниот туризам ќе се одбегнува како никогаш досега и луѓето ќе се фокусираат на ЈОМО-патувања (од англиски: Joy of missing out), а тоа значи радост да не мора да се биде постојано присутен и во тек со сѐ. Овој концепт на патување ќе ја одбележи 2025-та и според проценките на платформата за приватни сместувања „Врбо“ (Vrbo).
ЈОМО-патниците бараат погодности какви што постојат и во хотелите со пет ѕвезди, само што наместо популарни туристички места преферираат помалку познати дестинации. Тие најчесто инсистираат на сместувања кои вклучуваат базен, мирни градини, хидромасажни кади или спа-центри, со впечатливи пејзажи за опуштање и бегство од секојдневието. Во ваквиот тип на одмор гледаат шанса за подобрување на менталното здравје и дури 62 отсто од нив сметаат дека ЈОМО-патувањата им помогнале во намалувањето на стресот. Речиси половина од нив се изјасниле дека истите им ја зајакнале поврзаноста со саканите луѓе.
Најпопуларните понуди за ЈОМО-патувања вклучуваат куќи на плажа во мирно опкружување, изолирани викендици покрај езеро и осамени планински вили. Такви уникатни простори отцепени од гужвата се изнајмуваат и кај нас. Атрактивни вили сѐ почесто се градат токму во руралните средини, а стотина такви, кои освен опуштеност овозможуваат и одредено чувство на гламур, се достапни во понудата на Кајак.мк, најголемата онлајн платформа кај нас која нуди алтернативно сместување.
Уникатен амбиент во Оморани/ Извор: Кајак.мк
„Предноста на овие престои е спокојот. Секој што работи напорно, секојдневно се соочува со милион предизвици, комуницира со огромен број клиенти и едноставно бара мир. На ваквите локации туристите ги полнат батериите и се исклучуваат од секојдневието. Како предност мораме да го потенцираме и чистиот воздух кој, за жал, станува сериозен проблем во поголемите градови. Најголемата предност е посветеноста кон најблиските. Динамичното темпо на живеење се’ повеќе не’ отуѓува, па туристите сакаат да поминат спокоен викенд со семејството или пријателите“, велат од „Кајак.мк“.
Уникатни сместувања на места за кои немате слушнато
Во моментов на платформата се достапни над илјада уникатни сместувања во македонски села или на планински подрачја за кои досега повеќето немаат ни слушнато. Изборот е голем, од луксузни комплекси, викендички и дрвени куќарки, до отцепени вили во дивината и екокуќи без електрична енергија.
Од Кајак.мк раскажуваат дека домаќините сѐ почесто се соочуваат со предизвикот како да ја зачуваат автентичноста и овие дестинации да останат „скриено богатство“, а сепак да имаат оддржлив бизнис. Најчестото решение за кое се одлучуваат е повисока цена на понудата која, на некој начин, ги селектира гостите.
Најскапите две вили огласени на платформата се изградени на падините на Шар планина. Вила со сауна и отворено џакузи во селото Једоарце чини 220 евра од ден, а за едно ноќевање во планинска вила со базен во Отуње на 810 метри надморска височина ќе треба да одвоите 169 евра.
Атрактивна вила во селото Отуње / Извор - Кајак.мк
Вакви уникатни сместувања има и на другиот крај од земјава. Едно такво е она во Црвулево, село на 400 метри надморска височина кое брои само пет жители каде може да се сместите во луксузен етно комплекс. Понудата вклучува руска бања и џакузи под отворено небо кое може да се користи и на минусни температури, а еден апартман за четворица со појадок се изнајмува за 160 евра од ноќ.
Од Кајак.мк објаснуваат дека цените зависат од атрактивноста на дестинацијата и годишното време, но и од квалитетот на објектот и инвестицијата што е вложена. Сепак, не треба да се изостави и фактот дека овие цени се за сместувања кои не се на масовно атрактивни дестинации како Охрид и Скопје.
Освен сместувања на локации што се достапни со возила, на платформата можат да се најдат и атрактивни „скривалишта“ на кои мора да се пристигне пеш. Целта им е да ги мотивираат луѓето да бидат што поактивни во природа и да го вреднуваат здравиот начин на живеење.
„Во последно време доста атрактивни за резервација се и дрвените куќички кои се идеални за парови кои сакаат апсолутна приватност. Тука ќе ги споменеме оние во околината на Крушевска корија, во туристичките населби Абланица и Суви Лаки и на планината Влаина“, инфомираат од платформата.
Нагласуваат дека на сите овие места луксузот е релативна категорија. За едни тоа се приватноста, тишината и спокојот што го нудат, за други, пак, тоа е вечерата со локални намирници, изучувањето на одредени вештини како резбарство и сликање и разговорот со мештаните кој им овозможува да ја доживеат дестинацијата на начин на кој локалното население живее.
Во топ-места кои треба да се посетат во 2025-та од Кајак.мк ги истакнуваат и селото Дрен во близина на Демир Капија, како и излетничкото место Михајлово каде неодамна се отвори нов скијачки центар.
.webp){kind=icon}
