Какво виски пијат Македонците?

Триесет и седум бренда на виски со вкупно 73 етикети беа претставени на јубилејното петто издание на „Скопје виски фест“ (Skopje Whiskey Fest) што се одржа на почетокот на минатиот месец во хотелот „Мериот“. На трите фестивалски дена присуствуваа 2.300 гости, а 12-годишното шкотско виски „мекалан реар каск“ (The Macallan Rare Cask) беше најскапото послужено по цена од 2.400 денари за дегустација.

„Според податоците извадени од нашиот систем ‘Бипоеј’ (BePay), годинава се испиле 5.028 чаши. Станува збор за регистрирани дегустации, со можност вистинската бројка да е за околу една третина поголема поради дополнителни дегустации од дистрибутери што не се официјално евидентирани“, појаснуваат од „Ботега евенти“, кои традиционално се организатори на настанот.

Косопственички на компанијата се Ивана Новакова Куновска и Марија Зекмановска Митреска, кои во разговор за „Блумберг Адрија“ велат дека овие податоци јасно покажуваат дека сè повеќе македонски љубители на пијалаци ги откриваат сложеноста и рафинираноста на вискито, кое отсекогаш било симбол за престиж и префинет вкус.

„Просечната потрошувачка по посетител годинава изнесуваше околу 570 денари во кредити, со тоа што оваа година дистрибутерите значително ги намалија цените и нудеа дегустации на вискија од 100-150 кредити и премиум вискија веќе од 200-250 кредити, што ја направи понудата поразновидна и поприфатлива“, вели Митреска.

Скопје виски фест

Расте интересот кај женската публика

Сингл малтовите сѐ уште се најбарани на домашниот пазар, а на изборот на виски кај Македонците најмногу влијаат вкусот, цената и брендот, при што одлуката дополнително се обликува од трендовите и личните преференции на различните групи потрошувачи.

Поради помалата достапност, јапонските вискија и годинава биле меѓу најатрактивните, но Куновска истакнува дека секогаш најпосетувани се штандовите на оние брендови чии презентери се најподготвени и имаат да раскажат најдобра приказна.

„‘Синатра селект’ (Sinatra Select) беше најиновативната етикета претставена оваа година, а ‘Џек Даниелс’ (Jack Daniels) имаше и најмногу дегустации по брендови како збирна бројка. Следен на оваа листа е ‘Мекалан’ (Macallan) со трите понудени етикети, но најмногу дегустации по единечни етикети имаа јапонскоиот ‘Хибики’ (Hibiki) и кентаки бурбонот ‘Бафало трејс’ (Baffalo Trace)“, информира таа за последното издание.

За публиката на фестивалот вели дека е мешана. Влезници еднакво купуваат и страсни познавачи и урбани ентузијасти, кои бараат нови искуства, со сè поголемо учество на женската публика. Процентот мажи/жени според нивната процена сега е 60/40. Таа истакнува дека редовни гости им се и луѓето од бизнис-заедницата и секторот хорека, најчесто поканети од изложувачите.

Скопје виски фест

„Организациски се залагаме секое презентирано виски да биде рамномерно застапено, на унифицирани изложбени штандови, соодветно и прецизно претставено во информативната брошура. Продажбата на одредени брендови на виски на рафтовите драстично се зголемува по деновите на фестивалот, информација што ја добиваме од различни алкотеки што не биле присутни како учесници на настанот“, вели Куновска.

Правила на однесување и погрешни навики

Експертите често нагласуваат дека дегустацијата на виски е строго поставен процес. Чашата треба да се држи под агол од 45 степени, често наспроти бела заднина, за да се добие јасен поглед низ пијалакот. Носот треба да биде над работ на почетокот на чашата, а потоа постепено да се навлегува подлабоко во неа, за да се опфати целата арома. Препорачуваат вискито да се дегустира со мали голтки на почетокот, а потоа во поголеми количества. Целта на првичната дегустација е да се процени текстурата, додека со последователните дегустации се анализираат вкусот и мирисот. Во втората дегустација се одредуваат примарните пет вкуса што се регистрираат со јазикот: солен, сладок, кисел, горчлив и месесто-солен вкус (умами). Другите „вкусови“ се ароми што се препознаваат на задниот дел од носниот канал.

Скопје виски фест

 

Недоразбирања или погрешни навики кај потрошувачите се јавуваат не само при консумирањето на вискито туку и при сервирањето и перцепцијата на квалитетот.

„Вискито најдобро се дегустира без лед, но за да се отворат аромите може да му се додадат неколку капки вода. Најчестата грешка ја прават посетителите кога веднаш преминуваат на дегустација на поскапи и повеќегодишни вискија. Затоа создадовме и еден интересен кодекс со правила на однесување, кој го истакнуваме секоја година како содржина пред фестивалот“, вели Митреска.

Нашите соговорнички се едногласни дека македонската виски-сцена полека но сигурно се обликува и дека само со континуирана едукација и со споделување  искуства може да се создаде уште пожива и подинамична заедница.

„Сѐ уште ги средуваме впечатоците од јубилејниот фестивал. За следните изданија планираме малку да го поместиме курсот, но ќе го задржиме истиот концепт на едукација и забава, покажувајќи поголема зрелост и познавање“, порачуваат тие.