„Берклис“ и „ХСБЦ“: Изјавите на Ворш ја зголемуваат привлечноста на обврзниците поврзани со инфлацијата

„Берклис“ (Barclays Plc) и „ХСБЦ“ (HSBC Holdings Plc) сметаат дека загриженоста дека Федералните резерви (Фед) доцнат со справувањето со инфлацијата им дава на инвеститорите дополнителна причина да купуваат обврзници што нудат заштита од забрзување на растот на цените.

Приносите на американските државни обврзници со долг рок на достасување минатата недела достигнаа највисоко ниво во речиси две децении, откако претседателот на Фед, Кевин Ворш, одби да каже како креаторите на монетарната политика ќе ја стават инфлацијата под контрола, поттикнувајќи стравувања дека централната банка би можела да реагира предоцна – иако тој постојано нагласува дека е решен да го ограничи растот на цените.

На тоа се надоврзаа и големите осцилации на пазарот на нафта, како и загриженоста за владините трошоци. Во исто време, стапките на инфлацискиот праг на рентабилност (breakeven rates), кои ги мерат очекувањата за инфлацијата, се блиску до најниското ниво во последната година.

„Очекувам пазарот да вгради поголем инфлациски ризик во кривата на принос, по она што инвеститорите го протолкуваа како 'гулабско задржување' на каматните стапки со сомнителен кредибилитет“, изјави Џон Хил, раководител за стратегија на американскиот пазар на инфлација во „Берклис“. „Тоа би значело пошироки инфлациски прагови на рентабилност и подобри резултати на обврзниците поврзани со инфлацијата во однос на конвенционалните обврзници.“

По состанокот на Фед, Дираџ Нарула од „ХСБЦ“ ја повтори препораката за купување американски обврзници со долг рок на достасување што обезбедуваат заштита од растот на цените, повикувајќи се на загриженоста околу „долгорочната посветеност на американската централна банка на контролата на инфлацијата“.

Стравувањата од инфлација не се засилија по обновувањето на конфликтот меѓу САД и Иран

Десетгодишни инфлациски очекувања

Bloomberg

Иако индексот на Блумберг што ги следи обврзниците поврзани со инфлацијата порасна за 0,3 отсто од почетокот на годинава, тоа сепак е подобар резултат од падот од 0,7 отсто на индексот на конвенционални државни обврзници во истиот период.

Обврзниците поврзани со инфлацијата ги штитат инвеститорите така што исплаќаат принос што се приспособува нагоре според стапката на инфлација. Таканаречениот реален принос - кој не го вклучува тоа приспособување - моментално изнесува 2,93 отсто за 30-годишните американски државни обврзници заштитени од инфлација (Treasury Inflation-Protected Securities – TIPS), откако во петокот достигна 3,04 отсто, највисоко ниво од 2008 година.

„Нудат вредност“

„И понатаму сметаме дека обврзниците поврзани со инфлацијата нудат вредност при сегашните реални приноси“, изјави Хорхе Гарајо од „Сосиете женерал“ (Societe Generale SA). Веројатноста за сеопфатен мир на Блискиот Исток е „многу мала“, рече тој, а ниските инфлациски прагови на рентабилност покажуваат дека пазарот е „премногу самоуверен“ во врска со можноста повисоките цени на енергијата да се прелеат врз цените и платите.

Освен тоа, Кевин Кидни ги зголеми вложувањата на „ТПИ“ (True Potential Investments LLC) во државни обврзници поврзани со инфлацијата на околу 20 отсто од вкупните инвестиции на компанијата во инструменти со фиксен приход. Тој стравува дека централните банки, а особено Федералните резерви на САД, се подготвени да прифатат побрз раст на цените.

„Веруваме дека централните банки се подготвени да толерираат повисоко ниво на инфлација отколку што јавно комуницираат“, изјави Кидни.

Стефан Купман, виш макроекономски стратег во „Рабобанк“, тоа го објаснува поинаку.

„Инвестицискиот аргумент за обврзниците поврзани со инфлацијата не е само дека инфлацијата ќе остане над два отсто“, рече тој. „Туку дека два отсто сè повеќе би можеле да станат долна граница, наместо горна.“