„Картие“ е „Ролекс“ за генерацијата зед, благодарение на Тејлор Свифт

Кога Тејлор Свифт ја објави својата свршувачка со Тревис Келс не беше само огромниот дијамантски прстен тоа што предизвика воодушевување кај обожавателите. За љубителите на часовници, вистински шок беше реткиот часовник „картие“ (Cartier) од злато и дијаманти што го носеше. Суперѕвездата, носејќи го укинатиот модел „сантос демоизел“ (Santos Demoiselle), го зацврсти статусот на овој бренд како најпосакуван меѓу генерацијата зед, истовремено потресувајќи го пазарот на часовници. „Картие“ ja води транзицијата кон помали елегантни модели, рушејќи ја децениската доминација на големите спортски часовници и помагајќи ѝ на компанијата сопственик, луксузниот конгломерат „ЦФ Ришемон“ (Cie Financiere Richemont SA), годинава да ги надмине најголемите играчи во индустријата, вклучувајќи го и „Ролекс“ (Rolex).

Моментот на објавата за свршувачката на Тејлор Свифт со Тревис Келс, професионален играч на американски фудбал, кој игра за Kansas City Chiefs во НФЛ (NFL). Фотографиите предизвикаа експлозија на пребарувања за повлечениот модел на часовникот што го носеше музичката ѕвезда | Bloomberg

Додека богатите млади жени редеа белезици на зглобовите, Сирил Вињерон, извршен директор на „Картие“ од 2016 година до лани, ја трансформираше оваа легендарна куќа. Тој одлучи да се оддалечи од комплексните часовничарски механизми и се фокусираше на традицијата на „Картие“ на необични, но премиум изработени модели.

Вистинскиот потег се случи во 2017 година, кога одново го популаризира „пантер“ (Panthere). Кампањата режирана од Софија Копола, со млада жена во Лос Анџелес и во ритамот на песната „I Feel Love“ на Дона Самер, совршено го фати духот на генерацијата зед. „Картие“ ги повика и сопствениците на стари модели „пантер“ да ги однесат на бесплатен сервис и да добијат двегодишна гаранција. Така, многу жени ги обновија часовниците што со години биле оставени настрана – и им ги подарија на ќерките и внуките, создавајќи нова генерација обожаватели.

Вињерон не застана на „пантер“. Една година подоцна го популаризира „сантос де картие“ (Santos De Cartier), во кампања со Џејк Гиленхол, и продолжи да освежува други култни линии – „тенк“ (Tank), „биноар“ (Baignoire) – проширувајќи ги дури и во мини-верзии.

Променетата природа на луксузот исто така придонесе за успехот на „Картие“. Како што цените на чантите експлодираа, потрошувачите, а особено помладите купувачи, се префрлија на накит. Една од предностите на „Ришемон“, кој го поседува и „Ван Клиф и Арплс“ (Van Cleef & Arpels), е одржувањето пристапни влезни цени, што се пренесува и на часовниците. Мини челичен „пантер“ чини околу 3.500 фунти (4.600 долари), приближно како многу дизајнерски чанти. Часовниците „картие“  се широко достапни, иако за некои модели постојат листи за чекање. Дијамантските верзии, какви што носи Свифт, се особено популарни.

Генерацијата зед ја руши ерата на хиперголемите часовници. Тие се префрлаат на помали златни часовници со винтиџ изглед | Bloomberg

Сето ова го постави „Картие“ на врвот на листата на желби на генерацијата зед. Младите купувачи преминуваат од големите спортски часовници, предводени од „Ролекс“, на помали, претежно златни модели во винтиџ стил. Таков стил не носат само жените, кои понекогаш ги користат како белезици, туку и мажите, како амбасадорот на „Картие“, актерот Тимоти Шаламе. Брендот не ги дели своите часовници по пол, но се проценува дека околу 55 отсто од продажбата оди кај мажи, а 45 отсто кај жени, наведува „Лакс консалт“ (LuxeConsult).

Според платформата „Хроно 24“ (Chrono24) за трговија со часовници, уделот на „Картие“ во парите што генерацијата зед ги троши на таа платформа скокнал на 6,8 отсто во првата половина на годинава, од 1,7 отсто во 2018 година. Меѓу сите старосни групи, уделот пораснал на 5,4 отсто од 2,9 отсто во 2018 година.

Цените на секундарниот пазар за часовниците „картие“ пораснале за десет проценти помеѓу март и октомври, според „Сабдајл“ (Subdial). Оваа британска платформа сè почесто добива барања за моделите „пантер“ - нешто што не се случувало пред две или три години - што веројатно ја одразува нивната популарност меѓу инфлуенсерите и на Тикток.

Cartier доминира кај младите. Но интересот може да биде под притисок | Bloomberg

Растот е сепак уште поимпресивен за новите модели. „Картие“ е дел од дивизијата за накит „Ришемон“, па не се објавуваат поединечни резултати за часовниците. Но, ВЕР (Vontobel Equity Research) проценува дека продажбата на часовниците „картие“ пораснала за 15 отсто од јануари до септември – надминувајќи ги „Ролекс“, кој се проценува дека имал раст од високи едноцифрени проценти, и пошироката швајцарска индустрија за часовници, чија продажба опаднала.

Продажбата на часовниците „картие“ годинава може да достигне 3,6 милијарди евра, проценуваат аналитичарите на „Морган Стенли“ (Morgan Stanley), престигнувајќи ги така другите производители на часовници во рамките на „Ришемон“ првпат во последните 20 години.

 

Rolex останува гигант на пазарот. Но Cartier брзо надоаѓа | Bloomberg Mercury

Може ли популарноста на „Картие“ кај генерацијата зед да потрае?

Брендот годинава ќе произведе околу 715.000 часовници – значително помалку од 1,2 милион на „Ролекс“, според „Вонтобел“ (Vontobel). Значи, има голем простор за раст, особено во Кина, каде што „Картие“ сè повеќе одекнува помеѓу купувачите.

Сепак, цените на секундарниот пазар се во благ пад во последниот месец, додека „Хроно 24“ бележи помал пад на побарувачката за елегантни часовници во Азија и Северна Америка. Младите купувачи во САД се соочуваат со инфлација, обновување на отплатата на студентските кредити и послаб пазар на трудот.

Конкурентите го забележуваат растот на „Картие“. „Ролекс“ пред две години издаде нова колекција елегантни часовници — моделот 1908. Во челичните верзии експериментира и со разиграни бројчаници како што се ф’стак зелена или лаванда, вклучувајќи и помали димензии. „Ролекс“ го укина 26-милиметарскиот „леди дејтџаст“ (Lady Datejust) во 2015 година, бидејќи часовниците во тоа време стануваа поголеми. Но овој модел, со аристократска естетика сличен на „пантер“, повторно се појавува на Тикток и се препродава по повисоки цени. Негово обновено издание би било паметен начин за „Ролекс“ да се натпреварува со трендот.

„Ришемон“ има длабока архива на наследство од „Картие“, кое новиот извршен директор Луис Ферла може да продолжи да го користи. Постојат и модели од други часовничарски куќи на „Ришемон“ што можат да ги покријат евентуалните падови во побарувачката. „Жежер Лекултр“ (Jaeger-LeCoultre) го популаризира „реверсо“ (Reverso), кој еднакво добро им стои и на мажи и на жени, додека „Пијаже“ (Piaget) го претстави асиметричниот „сиксти“ (Sixtie).