text size
Водичот „Мишелин“ (Michelin) ги додели своите први признанија за хотели, давајќи им ја само на 24 објекти во Франција највисоката оценка - три клуча (three „keys“).
На настанот во понеделникот, 8 април, во Париз, истоимената публикација во сопственост на францускиот производител на гуми го откри својот избор од 189 најдобри места за престој во Франција, доделувајќи им еден, два или три амблема со клуч. Компанијата се прослави како критичар за ресторани преку своите годишни награди „ѕвезди“ за ресторани - кои слично имаат систем на наградување од максимум три ѕвезди - и сега прави понатамошен продор во угостителскиот сектор.
Помеѓу француските хотели на кои им е дадено највисоко признание се два во сопственост на врвниот бренд од луксузот ЛВМХ (Moët Hennessy Louis Vuitton / LVMH) - „Шевал Блан Париз“ (Cheval Blanc Paris) и „Шевал Блан Коршевел“ (Cheval Blanc Courchevel) - како и 19 други во главниот град, на Алпите или на брегот на Средоземно Море. Надвор од тие региони, меѓу хотелите со три клуча се најдоа и „Домен ле Крејер“ (Domaine Les Crayeres), „Ле ројал Шампањ“ (Le Royal Champagne) и „Ле сорс де Кодали“ (Les Sources de Caudalie) во винските региони Шампањ и Бордо.
Хотел „Ле Бристол“, Париз
Bloomberg Mercury
„Она што навистина е важно за нас е искуството“, рече во интервју Гвендал Поленек, меѓународен директор на „Мишелин гајд“ (Michelin Guide). „Тоа треба да биде незаборавно и единствено, така што ќе им даде на посетителите увид и чувство за локалниот карактер“.
Тој го наведе „Ерел шато де Версај - Ле гранд контрол“ (Airelles Chateau de Versailles - Le Grand Controle) бидејќи е на парцелата на замокот и вилата Ла Кост (Villa La Coste), имот од 570 хектари во Прованса, затоа што работи како „музеј на отворено“ преку неговата исклучителна архитектура и приватна уметничка колекција, која во моментов вклучува дела од Демиен Хирст, Александар Калдер и Јоко Оно.
Водичот „Мишелин“ влегува на преполн пазар за рангирање во секторот угостителство, што може да биде збунувачки за патниците. Овој потег е дел од долго планираната понуда на компанијата да заземе поголем дел од туристичкиот пазар во време кога глобалните економии и потрошувачките трошења се забавени во споредба со постпандемискиот бум. Одлуката да се започне со Франција ја посочува матичната земја на компанијата како центар на луксузното гостопримство и се совпаѓа со Олимпијадата во Париз.
Bloomberg Mercury
За посетителите на Градот на Светлината, наградите „клучеви“ може да помогнат да се анализираат опциите и да се споредат од далечина. На пример, француската влада на врвните хотели им ја доделува титулата „палата“ од 2010 година како начин да им помогне на потрошувачите да ги идентификуваат хотелите и со традиција и со изобилен модерен луксуз - такви има вкупно 31, најмногу во Париз, на Алпите и на Азурниот Брег.
Иако постои одредено преклопување со носителите на највисокото признание на „Мишелин“, има и забележителни исклучоци како што се „Хотел де Кријон“ (Hôtel de Crillon), „Ројал Монсо“ (Royal Monceau) и „Пенинсула“ (Peninsula), кои од првата церемонија на „Мишелин“ си заминаа со по два клуча. Од 12 париски „палати“, само пет добија по три клуча.
Според официјалното соопштение на „Мишелин“, еден клуч означува дека местото е „посебно“, два го прават „исклучително“, а три „извонредно“.
„Водичот е целосно независен“, рече Поленек, додавајќи дека не зема предвид дали хотелот е дел од синџир или има реноме на ѕвезда, па дури и дали има базен, бања, одреден сооднос меѓу персоналот и гостите или дури климатизација. Се земаат предвид критериуми како локалниот карактер, индивидуалноста, извонредноста во архитектурата и дизајнот на ентериерот, врвната услуга, удобноста и конзистентната вредност за цената. Уште поважно, додаде Поленек, е дека аналитичарите на „Мишелин“ се вработени со полно работно време и ги плаќаат сите сметки за хотелите и патувањата, што е отстапување од начинот на кој се составуваат другите рангирања, како „50-те најдобри хотели во светот“ (World’s 50 Best Hotels) и „Ла лист“ (La Liste).
Bloomberg Mercury
„Ние исто така не се плашиме да кажеме дека ресторанот е навистина добар, но дека патниците треба да спијат на друго место“, рече тој.
Рангирањето на „Мишелин“ за околу 640 француски хотели наведени на неговата страница ќе биде проследено со слични листи во САД и на други места. Ова доаѓа пет години откако компанијата ја купи „Таблет хотелс“ (Tablet Hotels), веб-страница за резервации за бутици и луксузни хотели, за необјавена сума. Интерфејсот на таа страница и базата на податоци сега се користат на страницата „Мишелин гајд“, каде што потрошувачите можат да прелистуваат избор на сместувања - многу со ресторани што се оценети од „Мишелин“ - и да резервираат.
Компанијата добива провизии за резервации, но „во моментов“ нема никакви спонзорски договори со туристичките власти како што има со своите кулинарски водичи. „Не ја исклучуваме можноста за тоа во иднина“, рече Поленек.
Победниците во категоријата со три клуча се:
Бумање, Ле Бо де Прованс (Baumanière, Les Baux-de-Provence)
Шевал Блан Коршевел (Cheval Blanc Courchevel)
Шевал Блан Пари (Cheval Blanc Paris)
Домен ле Крејер, Ремс (Domaine Les Crayères, Reims)
Фор сизонс Жорж V, Париз (Four Seasons George V, Paris)
Фор сизонс Межев (Four Seasons Megeve)
Гран хотел ду Кап Фера, Сан Жан Кап Фера (Grand Hôtel du Cap-Ferrat, Saint-Jean-Cap-Ferrat)
Хотел де Пари Монте Карло (Hôtel de Paris Monte-Carlo)
Хотел ду Кап Еден Рок, Антиб (Hôtel du Cap-Eden-Roc, Antibes)
Хотел ду Кастеле, Кастеле (Hôtel du Castellet, Le Castellet)
Ла Бастид де Горд, Горд (La Bastide de Gordes, Gordes)
Ла резерв Пари (La Réserve Paris)
Ла резерв Раматуел, Сен Тропе (La Reserve Ramatuelle, Saint Tropez)
Ле Бристол Пари (Le Bristol Paris)
Ле Ка-ду палас, Коршевел (Le K2 Palace, Courchevel)
Ле Мурис, Париз (Le Meurice, Paris)
Ле ројал Шампањ, Шампиљон (Le Royal Champagne, Champillon)
Ле сорс де Кодали, во близината на Бордо (Les Sources de Caudalie, Bordeaux)
Плаца Атене, Париз (Plaza Athénée, Paris)
Риц Пари (Ritz Paris)
Сан Џемс Пари (Saint James Paris)
Вила ла Кост, Ле Пу Санта Репарад (Villa La Coste, Le Puy-Sainte-Réparade)
Вилерој, Париз (Villeroy, Paris)
.webp){kind=icon}
