Рани корисници го напуштаат гугл-пребарувањето за четботови со ВИ

Метју Берман, додека планирал кампување, се сетил дека слушнал дека ако поставите шатор на автомобил наместо на земја, полесно ќе избегнете средба со животни. Берман порано таквите тврдења ги проверувал на пребарувачот Гугл. Сега за тоа го користел четботот Перплексити (Perplexity). 

На Берман му се допаѓа тоа што Перплексити, кој се рекламира како систем за давање одговори поткрепен од  вештачка интелигенција (ВИ), дава кратки одговори на неговите прашања наместо низа линкови (иако со одговорите често доаѓаат и цитати што упатуваат на релевантни извори). „Станува збор за времето што се троши за добивање одговор“, вели Берман, кој го основал технолошкиот стартап „Сонар“ (Sonar) за да им помогне на претпријатијата да управуваат со текстуални пораки, а сега се занимава со правење видеосодржини и пишува билтен за вештачка интелигенција. 

Тој оценува дека алатките за пребарување со ВИ го навеле да го намали пребарувањето на Гугл за повеќе од 90 проценти. „Можете да потрошите многу време во пребарување на Гугл отворајќи линкови и навистина е фрустрирачки кога не го наоѓате веднаш она што го сакате“, вели тој. „А веројатноста да добиете точен одговор веќе при првиот обид на Перплексити или ЧетГПТ е исклучително голема“. Берман во врска со кампувањето одлучил дека не вреди да се мачи со поставување на шаторот на покривот на автомобилот, иако така би се заштитил подобро од предатори. 

Сè уште доста мал број луѓе се насочуваат кон четботови наместо кон традиционалните пребарувачи кога бараат совет како да избегнат мечка или некоја друга информација. Перплексити во март соопшти дека има 15 милиони корисници, додека Гугл има милијарди. Меѓутоа, од постапките на раните корисници често може да се види кои технолошки навики ќе станат вообичаени. Раните корисници, исто така, можат да го обликуваат тоа однесување така што ќе ги следат и други корисници, а и можат да им помогнат на компаниите да ги креираат своите производи. Тоа објаснува зошто два водечки оператора во пребарувањето, „Гугл“, кој е дел од „Алфабет“ (Alphabet Inc), и „Мајкрософт“ (Microsoft Corp), ставаат поголем акцент на вештачката интелигенција во своите производи.

Depositphotos

 

 

Влоговите се големи кога станува збор за интернетот. Пребарувањето на Гугл во потрага по информации е многу раширена практика и многу сајтови и компании се приспособени на таа навика. Некои четботови имаат реклами, додека „Опен еј-ај“ (OpenAI) размислува за тоа да воведе реклами на ЧетГПТ (ChatGPT) во иднина. Сепак останува нејасно каква улога ќе има рекламирањето во ерата на интернетот со вештачка интелигенција. Една можност е голем број луѓе да почнат да плаќаат за пребарување на интернет. Стотици илјади луѓе се претплатиле на Перплексити про (Perplexity Pro четбот). „Опен еј-ај“ нуди претплата на ЧетГПТ плус, кој исто така нуди можност за пребарување. Двете компании ја наплаќаат таа услуга по 20 долари месечно. 

Главното прашање е како „Гугл“ ќе се приспособи на сето тоа. Оваа компанија ги интегрира своите одговори од ВИ во пребарувањето преку функцијата „еј-ај овервјуз“ (AI Overviews) и наведува дека корисниците се позадоволни од резултатите до кои се дошло преку ВИ отколку од резултатите без таа функција. Извршниот директор на „Гугл“, Сундар Пичаи, во октомври рече дека функцијата „овервјуз“ има и до милијарда корисници месечно и дека е во процес на проширување на повеќе од сто земји. 

Сепак, „Гугл“ се наоѓа во незгодна положба. Додека стартапите почнуваат од нула, оваа компанија мора да размислува за тоа како додавањето на функциите со ВИ може да влијае на нејзините исклучително профитабилни операции за пребарување. Покрај тоа, „Гугл“ се соочува со оваа нова закана по својот главен бизнис во моментот кога обвинителите на САД бараат да се воведат нови ограничувања во врска со начинот на кој компанијата користи вештачка интелигенција, поради што, како што тврдат оттаму, можеби ќе мораат да ги намалат инвестициите во оваа технологија. 

На луѓето што користат четботови понекогаш само искуството им е попривлечно од одговорите што ги добиваат. Ребека Шомеи, шефица на комуникации во ВИ-инкубаторот „Аутшифт“ (Outshift) на компанијата „Циско“ (Cisco Systems Inc), сака да ја користи гласовната интеракција што ја нуди „Опен еј-ај“, а која им овозможува на корисниците да разговараат со асистент со ВИ. Кога ја користела оваа алатка за да се распраша за болките во грбот што ги трпела нејзината сестра, смирувачки глас со британски акцент ѝ објаснил неколку можни причини пред да ја посоветува да побара совет од лекар. „Дејствуваше со сочувство додека одговараше и поставуваше прашања за подобро разбирање на проблемот, што традиционалните пребарувачи не би можеле“, вели таа. 

Кога Шомеи го прашала ЧетГПТ да ѝ препорача добри патеки за пешачење во Пало Алто, Калифорнија, апликацијата генерирала мапа, која, сепак, била неточна. Тоа би претставувало сериозен проблем за Шомеи ако не ги забележела грешките пред да се упати таму. Страсните корисници на ВИ-пребарување се свесни дека четботовите можат да генерираат неточни одговори, а таа појава кај четботовите се нарекува халуцинирање. Тие, исто така, велат дека секогаш ги проверуваат добиените резултати на Гугл и преку други извори. „Гледам на тоа како на нешто што го подготвил стажист, а јас потоа внимателно го прегледувам“, вели Џон Бејли, нерезидентен виш соработник на Американскиот институт за претприемаштво (American Enterprise Institute  - AEI), аналитички центар од Вашингтон.

Depositphotos

 

Луѓето можат да наидат на погрешни информации и на Гугл. Меѓутоа, многу корисници на интернет се повеќе навикнати да го проценуваат кредибилитетот на некој сајт отколку на четбот што звучи самоуверено. Иако Перплексити и „Опен еј-ај“ настојуваат да го решат тоа прашање така што прикажуваат линкови до своите извори, тоа не е доследна практика меѓу ВИ-апликациите. Исто така, не е јасно дали постои решение за поширокиот проблем со халуцинациите на четботовите. Раните корисници можеби имаат доволно трпение да користат услуга што повремено дава неточен одговор, дури и ако плаќаат за тоа. Тоа, сепак, не мора да важи за корисниците што не се многу авантуристички расположени, а не треба да се заборави дека цената на Гугл е тешко да се надмине.

Во жешкото столче: Сундар Пичаи, извршен директор на „Алфабет“

Луѓето што го водат пребарувачот „Гугл срч“ (Google Search) ќе мораат во новата година пред сè да се обидат да ја задржат предноста во однос на сè поголемиот број стартапи. Тоа како да не е доволно тешка задача за Сундар Пичаи, па тука се и грижите поради намерата на регулаторите да го остават овој технолошки гигант без неговиот голем дел.

Лансирањето на ЧетГПТ од компанијата „Опен еј-ај“ на крајот на 2022 година доведе до подем на нова класа модели на вештачка интелигенција што можат да им одговорат на прашањата на корисниците во форма на разговор и поттикна трка во Силициумската Долина за да се редефинира пребарувањето. Стартапи како Перплексити, Каги (Kagi) и Ју.ком (You.com), се обидуваат да го победат Гугл користејќи мали тимови фокусирани на преобликување на интернет-пребарувањето.

Depositphotos

 

Во меѓувреме, „Опен еј-ај“ продолжува да додава уште функции за пребарување на ЧетГПТ. „Гугл“ сè уште има силна позиција на пазарот, но за првпат во скоро време се чини дека таа се клати. Пичаи и неговиот тим воведоа вештачка интелигенција во пребарувачот и ги намалија трошоците за обезбедување одговори генерирани преку неа. Успехот на „Гугл клауд“ (Google Cloud), кој конечно носи профит по повеќегодишни инвестиции, го смири Волстрит во последните неколку квартали. Инвеститорите, сепак, сè уште се грижат дека Гугл можеби нема повеќе да биде во центарот на дигиталниот свет.

Грижите на „Алфабет“ поради антимонополските прописи ќе бидат во фокусот во 2025 година. Судот во САД во 2024 година утврди дека компанијата има монопол во областа на пребарувањето, а властите настојуваат да ја принудат компанијата да го продаде интернет-прелистувачот „Гугл хром“ (Google Chrome).

Таквата казна сигурно би го повредила Пичаи, кој ја стекна својата репутација развивајќи го овој производ. Компанијата исто така чека пресуда во друг антимонополски случај насочен кон нејзините активности поврзани со онлајн рекламирање. Неизбежниот бран на жалби од армијата адвокати на „Алфабет“ веројатно ќе ја одложи примената на правните лекови што ќе ги одреди судот. Меѓутоа, ако нешто покажаа претходните антимонополски битки што ги водеше оваа индустрија, тоа е дека вистинската цена на сето тоа е губење на фокусот.