text size
Македонија е земјата од каде што доаѓа новиот заменик-генерален секретар на НАТО - Радмила Шекеринска. Назначувањето на оваа функција од страна на генералниот секретар Марк Руте е круна на нејзините кариерни достигнувања досега, особено ако се земат предвид активностите во евроинтегративниот процес и фактот што во текот на нејзиното водење на Министерството за одбрана земјава стана 30-та членка на НАТО.
Шекеринска беше вицепремиерка за евроинтеграции (2002-2006), а подоцна стана првата жена со функција министер за одбрана (2017-2022) и притоа на позицијата беше најдолго од осамостојувањето на земјава. Таа ги водеше целокупните реформи во одбраната и вооружените сили. За време на нејзиниот мандат министерството три последователни години важеше за најтранспарентна институција во земјава, а се најде и на втората позиција на индексот за интегритет на одбраната на „Транспаренси интернешнел“.
Образованието го стекнала во Македонија и во САД, а сега предава Институции на ЕУ на универзитетот „Американ колеџ“ во Скопје.
Во нејзиното политичко дејствување има четири пратенички мандати. Шекеринска е единствената личност што била дел од преговорите за трите клучни договори што го обликуваа демократскиот пат на земјава: Охридскиот, Преспанскиот и Пржинскиот договор.
Во 2018 година Франција ја одликува со Орден за истакнати граѓански заслуги, а во 2005 година ја доби титулата млад глобален лидер од страна на Светскиот економски форум за нејзините достигнувања и посветеност во областа на европската интеграција на Западен Балкан.
Во 2009 и 2012 година беше шефица на набљудувачката мисија на ОБСЕ/ОДИХР за претседателските и парламентарните избори во Киргистан и во Ерменија.
.webp){kind=icon}
