text size
ЕЦБ ги зголеми каматите за половина поен
Европската централна банка (ЕЦБ) остана на зборот и го спроведе планираното зголемување на каматните стапки за половина поен, но функционерите се необично тивки за она што ќе следува во услови на банкарска бура што го загрози опстанокот на „Кредит Суис“ (Credit Suisse Group AG).
Депозитната стапка е подигната на три отсто, како што официјалните лица означија уште на нивниот последен состанок пред шест недели и како што очекуваа мнозинството економисти, но изостана каква било изјава или насоки што би укажале на идните потези во однос на каматните стапки.
Инаку, ЕЦБ ги намали прогнозите за вкупната инфлација, но ја зголеми процената за базичната во 2023 година.
Дали да инвестирате во акции или во депозити?
Каматите растат, кредитирањето се намалува, банките стануваат сè попретпазливи, а клиентите воздржани. Ова е сублимат на движењата на банкарскиот сектор во земјава по последните потези и на европската и на домашната централна банка за затегнување на монетарната политика. Но затегнувањето не е завршено.
Како да има своевидна тепачка за пари во моментов во Македонија, во која главни актери се државата, банките и Народната банка. Таа е поттикната од заострувањето на монетарната политика во обидот на централната банка да ја спречи високата инфлација и од потребата за „кеш“ на фискалната власт за редовно намирување на долговите, платите и социјалните бенефиции. Народната банка континуирано ја зголемува основната каматна стапка, каматите по кои се задолжува државата уриваат рекорди, а комерцијалните банки влегоа во циклус на зголемување на каматите на депозитите и на кредитите. Анализиравме каде е најисплатливо да се вложат пари во услови на долготрајна висока инфлација, која ја донесе економијата на граница на рецесија.
„Мајкрософт“ го носи четботот на „Опен еј-ај“ во „Офис“
Напорите на „Мајкрософт“ (Microsoft Corp.) да ја промени целата своја линија со технологијата на „Опен еј-ај“ (OpenAI) се проширија на еден од најстарите и најпознати производи на компанијата: нејзините апликации за „Офис“ (Office).
Софтверот, вклучувајќи ги „Ексел“ (Excel), „Пауер поинт“ (PowerPoint), „Аутлук“ (Outlook) и „Ворд“ (Word), ќе започне да ја користи новата платформа за вештачка интелигенција ГПТ-4 (GPT-4) на „Опен еј-ај“, соопшти „Мајкрософт“.
Асистентите со вештачка интелигенција, наречени копилоти (Copilots), ќе може да генерираат цели документи, електронска пошта и слајдови од знаењето што софтверот го стекнал преку скенирање корпоративни датотеки и слушајќи конференциски повици.
На берзите...
Утрово има добро расположение на берзите и индексите се значително навлезени во зелената зона. Индексот S&P 500 порасна за 1,8 отсто, а технолошкиот индекс Nasdaq 100 за 2,7 отсто. Во рамките на азиското тргување, европскиот индекс Euro Stoxx 50 се покачи за 0,7 отсто, додека азиските поголеми берзански индекси се во плус меѓу 1,1 и 1,7 отсто.
Што се однесува до нафтата, таа е на 15-месечен минимум гледано на неделно ниво и покрај тоа што денеска бележи раст. ВТИ за испорака во април утрово се покачи за 0,6 проценти и барел се тргува по цена од 68,79 долари, додека нафтата брент доби исто толкав процент на својата вредност, но барел од оваа нафта чини 75,13 долари.
Еврото ја зголеми својата вредност во однос на американскиот долар за 0,4 проценти. Курсот на овие две валути сега изнесува 1,0650 долар за едно евро.
Златото порасна за 0,6 отсто, со што цената на една унца од овој благороден метал е 1.931,95 долар.
Позитивата е присутна и на криптопазарот, каде што најголемиот токен, биткоинот, порасна за 4,2 отсто, на 25.788,32 долари, а етерот ја зголеми својата вредност за 2,7 отсто, искачувајќи се на 1.703,82 долари.
Денеска читајте...
Становите на море чинат како во Карпош. Куќи во Неа Плагија, Неа Мудања, Каликратија, апартмани во Солун, хотели на грчките плажи по цени слични како во Скопје. Заинтересираноста на Македонците за купување недвижности на море се зголемува, особено што цените за квадратен метар на Халкидики не се многу различни од тие во скопските населби.
Цените на недвижностите во земјава лани се зголемија за над 20 отсто, но од последниот квартал е забележано стабилизирање на цените. Додека ние купуваме станови во Солун и Криопиги, гастарбајтерите се најчесто тие што купуваат кај нас.
„Купувавме“ и монтажна куќа во Македонија и излезе дека ниту тие не се толку евтини. За изградба се плаќа во просек од 300 до 500 евра по квадратен метар, не земајќи ги предвид трошоците за земјиштето, бетонската плоча, како и обезбедувањето довод, одвод и приклучок за струја. Тоа е обврска на купувачот, исто како и покуќнината и сето преостанато внатрешно уредување, бидејќи куќата се добива со врати, прозорци, олуци, покрив, ламинат и плочки (некогаш и санитарии).
.webp){kind=icon}
