По низата потреси, денеска конечно позитивно расположение на берзите

Фјучерсите на американските и европските акции напредуваа заедно со азиските акции утрово, откако пакетот за спас на банката „Фрст рипаблик“ (First Republic Bank) ја смири загриженоста за финансиската стабилност.

Индексите пораснаа во Хонгконг, Јапонија и Австралија поради закрепнувањето на банкарските акции. И покрај тоа, азискиот мерач на капиталот е на пат да оствари втора неделна загуба по неодамнешните турбуленции во банкарскиот сектор.

Технолошките акции беа меѓу најдобрите утрово, при што технолошкиот индекс порасна за околу четири проценти. Акциите на „Баиду“ (Baidu Inc) се искачија за околу 15 отсто, зголемувајќи го позитивното расположение откако брокерите ја тестираа нејзината штотуку претставена услуга, слична на ЧетГПТ (ChatGPT) и ѝ дадоа прелиминарно одобрение.

 

 

Потезите во Азија го следат индексот S&P 500, кој вчера го забележа најголемиот еднодневен напредок од јануари, бидејќи најголемите американски кредитори се согласија да придонесат со 30 милијарди долари во депозити во банката „Фрст рипаблик“. Тоа ги ублажи шпекулациите дека банката би можела да биде следната што ќе пропадне по двата колапса од висок профил што се случија минатата недела и ја поведоа новата криза. Веста за банката „Фрст рипаблик“ дојде откако швајцарските регулатори ја стабилизираа „Кредит Суис“ (Credit Suisse Group AG), намалувајќи ги грижите дека проблемите кај европскиот заемодавец ќе доведат до каскадна криза во тој регион.

Трговците што во средата главно се откажаа од облозите за деветтото по ред зголемување на каматните стапки на ФЕД следната недела, сепак ги зголемија шансите на околу 80 отсто за покачување на каматите од четвртина поен.

Доларот ослабна во однос на сите свои конкуренти од групата 10, при што австралиските и норвешките валути ги предводат добивките.

Пазарите исто така го анализираат зголемувањето на каматната стапка од 50 базични поени од страна на Европската централна банка (ЕЦБ), како и коментарите на претседателот на ЕЦБ дека се предвидува инфлацијата да остане премногу висока долго време. Покачувањето на каматните стапки од ЕЦБ всушност ги зголеми облозите за раст на каматите и од страна на Федералните резерви (ФЕД) следната недела.

Златото порасна за 0,6 отсто, со што цената на една унца од овој благороден метал е 1.931,95 долар.

Позитивата е присутна и на криптопазарот, каде што најголемиот токен, биткоинот, порасна за 4,2 отсто, на 25.788,32 долари, а етерот ја зголеми својата вредност за 2,7 проценти, искачувајќи се на 1.703,82 долари.