.webp){kind=icon}
Во рамките на Глобалната недела на парите, преку акцијата „Одблиску со гувернерот на Народната банка“, гувернерката Анита Ангеловска-Бежоска ги отвори вратите на својот кабинет за дел од студентите на Економскиот факултет при УКИМ, кои имаа можност одблиску да се запознаат со работата и активностите на централната банка.
Kако што соопштуваат оттаму, гувернерката порачала дека само личности што се добро едуцирани за начинот на управување со финансиите може да бидат независни и да придонесат кон развојот на нашата економија и општество.
На средбата, гувернерката одговорила на повеќе прашања на студентите, меѓу кои и за тоа што презема Народната банка за подобрување на финансиската писменост и инклузијата на младите заради нивна подготовка за активно вклучување на пазарот на работна сила.
„Во овие тешки времиња, при неколку последователни кризи, практиката покажа дека битките се водат со знаења. Ме радува тоа што, како студенти што го завршуваат високото образование, го гледате сопствениот развој во нашата земја. Без вас, младите, нема иднина, а вратите на Народната банка, како носечка институција во земјава, се секогаш отворени за млади кадри што сакаат да се надградуваат, да научат, да ги прошират видиците. Народната банка настојува да регрутира млади и перспективни високообразовани кадри, со потенцијал за аналитичка и истражувачка работа и со желба за професионален напредок. Тоа за нашата институција значи вложување во иднината, и во кадровска и во мотивациска смисла“, им порача гувернерката Ангеловска-Бежоска на студентите.
Таа им се заблагодари на студентите за интересот да се запознаат со работата на централната банка и за желбата да ги споделат своите идеи заради градење подобра иднина во која активно ќе бидат вклучени и младите.
