Американските сили го бранеа Израел, Бајден го осуди нападот

По синоќешниот напад на Иран врз територијата на Израел телефонски разговораа американскиот претседател Џо Бајден и израелскиот премиер Бенјамин Нетанјаху по што Белата куќа соопшти дека за поддршка на одбраната на Израел, американската војска преместила авиони и разурнувачи за одбрана од балистички проектили во регионот во текот на изминатата недела.

„Благодарение на овие распоредувања и извонредната вештина на нашите војници, му помогнавме на Израел да ги собори речиси сите дронови и проектили што пристигнаа“, се наведува во соопштението.

Во разговорот со Нетанјаху, Бајден ја потврдил посветеноста на Америка во одржувањето на безбедноста на Израел.

„Му кажав дека Израел покажа извонреден капацитет да се брани и да ги порази дури и нападите без преседан - испраќајќи јасна порака до своите непријатели дека не можат ефективно да ја загрозат безбедноста на Израел“, рекол Бајден.

Бајден најавил дека ќе ги свика лидерите на Г7 за да координираат обединет дипломатски одговор на дрскиот напад на Иран.

„Мојот тим ќе се ангажира со нивните колеги од целиот регион. И ние ќе останеме во близок контакт со лидерите на Израел. И иако денес не видовме напади врз нашите сили или објекти, ќе останеме будни на сите закани и нема да се двоумиме да ги преземеме сите неопходни активности за заштита на нашиот народ“, навел Бајден.

Американскиот секретар за одбрана Лојд Остин изјави дека американските сили за време на нападот на Иран „пресретнале десетици проектили и беспилотни летала на пат кон Израел, лансирани од Иран, Ирак, Сирија и Јемен“.

„Не бараме конфликт со Иран, но нема да се двоумиме да дејствуваме за да ги заштитиме нашите сили и да ја поддржиме одбраната на Израел“, соопшти Остин.