Светот повикува на деескалација на тензиите на Блискиот Исток

Повеќе светски лидери и велесили повикаа на деескалација на настаните на Блискиот Исток откако синоќа Иран го нападна Израел со над 300 проектили и дронови.

Германскиот канцелар Олаф Шолц го осуди нападот врз Израел. Портпаролот на владата Штефен Хебестрајт го соопшти неговиот став по пристигнувањето на Шолц во кинескиот град Чонгкинг.

„Канцеларот Олаф Шолц најостро ги осуди тешките воздушни напади на израелска територија што ги започна режимот во Техеран. Со овој неодговорен и неоправдан напад, Иран ризикува регионален пожар. Во овие тешки часови, Германија стои на страната на Израел. Сега ќе разговараме за понатамошните реакции со нашите партнери и сојузници од Г7““, наведе портпаролот.

Кина соопшти дека сегашната ескалација е резултат на конфликтот во Газа.

„Кина е длабоко загрижена за моменталната ескалација на ситуацијата и ги повикува релевантните страни да задржат смиреност и воздржаност за да се избегне понатамошна ескалација на тензиите. Оваа рунда на ескалација е најновата манифестација на прелевањето на конфликтот во Газа“, наведуваат од тамошното Министерство за надворешни работи.

Оттаму додаваат дека главниот приоритет е ефикасно спроведување на резолуцијата 2728 на Советот за безбедност на ОН и решавање на конфликтот во Газа што е можно поскоро. Кина ја повика меѓународната заедница, особено влијателните земји, да одиграат конструктивна улога во одржувањето на регионалниот мир и стабилност.

Реакција имаше и од Индија, која повика на итна деескалација на непријателствата.

„Сериозно сме загрижени од ескалацијата на непријателствата меѓу Израел и Иран, што ги загрозува мирот и безбедноста во регионот. Повикуваме на итна деескалација, воздржаност, повлекување од насилството и враќање на патот на дипломатијата. Ние внимателно ја следиме ситуацијата што се развива. Од витално значење е безбедноста и стабилноста да се одржуваат во регионот“, се вели во соопштението од Министерството за надворешни работи на Индија.

Во моментов нема коментари за веста. Биди прв да коментира...

Остави коментар