Лек на „Астра Зенека“ постигна голем успех во третманот на рак на бабулето

Лекот „имфинзи“ (Imfinzi) на „Астра Зенека“ (AstraZeneca Plc) им го продолжил животот на пациенти со рак на мочниот меур, што потенцијално отвора нов пазар за него.

Кај пациенти со мускулно-инвазивен рак на мочниот меур, „имфинзи“ го намалува ризикот од повторување на болеста за 32 отсто кога се дава покрај стандардната терапија, според анализа на студија во доцна фаза. Лекот исто така го намалува ризикот од смрт за една четвртина во комбинација со тековните третмани како хемотерапија и хирургија, според студијата во која учествувале 1.063 пациенти.

Ова е првпат имунотерапевтски лек значително да го подобри целокупното преживување кај пациенти со овој тип на рак на мочниот меур. Новите податоци би можеле да ја променат терапијата ако лекот добие одобрение. Моментално постои само еден имунотерапевтски лек одобрен за пациенти по операција на мочниот меур, „опдиво“ (Opdivo) на „Бристол Мајерс“ (Bristol Myers Squibb Co).

Други податоци за ефикасноста на „имфинзи“ кај рак на црниот дроб исто така беа претставени во понеделникот. Испитувањето покажа продолжување на животниот век од пет години кај пациенти што примиле „имфинзи“ во комбинација со „имџудо“ (Imjudo) на „Астра“ за одреден тип на рак на црниот дроб. Истражувачите откриле дека лековите го намалиле ризикот од смрт за 24 отсто во споредба со земањето „нексавар“ (Nexavar) на „Бајер“ (Bayer AG).

Акциите на „Астра“ пораснаа за 0,7 отсто во раното тргување во Лондон, дополнително зголемувајќи ги добивките од над 12 отсто годинава.

„Моментално, по добивањето хемотерапија и операција, околу половина од пациентите со мускулно-инвазивен рак на мочниот меур имаат рецидив“, изјави во интервју Сузан Галбрајт, извршна потпретседателка на онкологијата во „Астра Зенека“ (AstraZeneca). Податоците покажуваат дека тие пациенти „имаат шанса за нормален живот со години“, рече Галбрајт, опишувајќи го режимот на третман како „трансформативен“.

Податоците претставуваат поддршка за „Астра“ откако акциите на британската фармацевтска компанија го забележаа најлошиот пад во последните 14 месеци. Тоа следуваше по разочарувачкото ажурирање за експерименталниот лек за рак на белите дробови со партнерот „Даичи Санкјо“ (Daiichi Sankyo Co).

„Податоците не се совршени“

Извршниот директор Паскал Сорио изјави дека иако податоците не се „совршени“ како што би сакала „Астра“, тие сепак носат „силен сет на резултати“. За време на неговиот мандат, Сорио ја зголеми фокусираноста на „Астра“ на онкологијата - облог што се исплати, со серија успешни третмани, вклучувајќи го и „имфинзи“.

Резултатите од студијата за рак на мочниот меур беа претставени во неделата на Конгресот на Европското друштво за медицинска онкологија во Барселона, во сесија посветена на испитувања со потенцијал да ја променат клиничката пракса. Тие исто така беа објавени во „Њу Ингланд журнал“ (New England Journal of Medicine).

„Имфинзи“ веќе е одобрен за повеќе други видови рак, вклучувајќи рак на белите дробови, жолчните патишта и црниот дроб. Лекот донесе над 1,1 милијарда долари во последниот квартал, што го прави вториот најголем онколошки производ на „Астра“.

Амбицијата на „Астра“ со „имфинзи“ да ја промени клиничката пракса во третманот на рак на мочниот меур „може да стане реалност врз основа на квалитетот на податоците“ објавени на конференцијата, напиша во белешка аналитичарот на „Блумберг интелиџенс“ (Bloomberg Intelligence) Сем Фазели. Тоа ја става „Астра“ во позиција да го надмине „опдиво“, со можност за приходи што „можат да надминат милијарда долари, но тоа ќе зависи од идните податоци од конкурентите како 'Мерк'“, рече Фазели.

„’Астра’ има четири студии што го испитуваат ’имфинзи’ за различни типови на рак на мочниот меур, при што комбинираниот пазар за сите тие е блокбастер можност за бизнис“, изјави во интервју Дејв Фредриксон, извршен потпретседател на онколошката бизнис-единица „Астра“.

Во студијата за рак на мочниот меур, една група пациенти го примале стандардниот третман, кој вклучува хемотерапија и потоа операција. Другата група го примала стандардниот третман, но со „имфинзи“ и пред и по операцијата.

Во моментов нема коментари за веста. Биди прв да коментира...

Остави коментар