.webp){kind=icon}
„Астра Зенека“ (AstraZeneca Plc) се согласи да го купи кинескиот развивач на клеточна терапија „Грасел биотехнолоџис“ (Gracell Biotechnologies Inc.) за дури 1,2 милијарда долари, додека британскиот гигант за лекови ги зајакнува своите облози за медицински иновации во втората по големина економија во светот.
Според договорот, „Астра“ ќе го преземе „Грасел“ со седиште во Шангај за 2 долара по акција, или за една милијарда долари во готовина однапред. Дополнителното купување акции е условено со одредени регулаторни одлуки, што на крајот ќе ја зголеми вредноста на договорот до 1,2 милијарда долари, се наведува во соопштението на компаниите во вторникот.
Аквизицијата ќе ја збогати понудата на „Астра“ со таканаречената CAR-T терапија, која ги модифицира сопствените имунолошки клетки на пациентот за да се бори против ракот. Според соопштението, еден кандидат на кој работи „Грасел“, наречен GC012F, може да биде потенцијален третман против рак на крвта, како што е мултипен миелом и автоимуни болести како лупус.
Договорот дојде откако „Астра“ склучи договор во ноември со кинеската биотехнолошка компанија „Екоген“ (Eccogene Inc.) за заеднички развој на пилула за слабеење, една од најпопуларните класи на лекови, бидејќи се обидува да се бори со „Ново Нордиск“ (Novo Nordisk A/S) и „Ели Лили“ (Eli Lilly & Co.) , две компании што ја предводеа златната треска во индустријата за лекови против дебелина.
Додека Кина е втор по големина пазар на „Астра“, по САД, главниот извршен директор Паскал Сориот претходно изјави дека фирмата сака да ја искористи медицинската иновација на земјата што поттикна многу фармацевтски гиганти од развиените земји да соработуваат со локалните производители на лекови за заеднички да развијат ветувачки лек со блокбастер-потенцијал.
Акциите на „Грасел“ се зголемија за речиси 170 отсто оваа година.
