„Стратеџи“ објави нереализиран профит од 14 милијарди долари во вториот квартал

Компанијата „Стратеџи“ на Мајкл Сејлор забележа нереализирана добивка од 14,05 милијарди долари во вториот квартал поради закрепнувањето на цената на биткоинот и неодамнешната сметководствена промена.

Нереализираната добивка беше делумно компензирана со поврзан трошок за одложен данок од 4,04 милијарди долари, соопшти компанијата во поднесеното барање до Комисијата за хартии од вредност на САД во понеделникот. Од април ова е првата недела кога компанијата, порано позната како „Мајкростратеџи“, не купила дополнителни токени. „Стратеџи“ поседува околу 65 милијарди долари во биткоин, што ја прави најголем корпоративен сопственик на криптовалутата.

Сејлор го трансформираше некогаш неуспешниот производител на софтвер за претпријатија во водечки застапник на биткоин со висок левериџ преку продажба на обични и преференцијални акции и понуди на долгови. Вчера компанијата исто така објави проширување на програмата за продажба на пазарот за третата рунда преференцијални акции што започна да ги продава годинава за да помогне во финансирањето на купувањето биткоин. „Стратеџи“ стекна околу 6,8 милијарди долари биткоини во трите месеци заклучно со 30 јуни.

Иако кварталните резултати на „Стратеџи“ веројатно ќе ја сместат во одбрана група со компании како „Амазон“ и „ЏП Морган Чејс“, чии оперативни профити се очекува да надминат 10 милијарди долари во последниот квартал, се очекува компанијата да објави само околу 112,8 милиони долари приходи од својот бизнис со софтвер, според аналитичарите анкетирани од „Блумберг њуз“. Се очекува компанијата во август да ги објави резултатите за вториот квартал.

Акциите на „Стратеџи“ скокнаа за над 3.300 проценти откако Сејлор во средината на 2020 година почна да купува биткоини како заштита од инфлација. Биткоинот во истиот период порасна за околу 1.000 проценти, додека индексот S&P 500 се зголеми за околу 115 отсто. Акциите во вториот квартал пораснаа за 40 проценти, додека индексот S&P се искачи за 11 отсто.

Bloomberg

 

Во првиот квартал „Стратеџи“ усвои сметководствена промена што бара вреднување на биткоинот на фирмата по пазарната цена. „Стратеџи“ и другите корпоративни купувачи на биткоин сега ги препознаваат нереализираните промени што често предизвикуваат големи осцилации во заработката. „Стратеџи“ објави рекордна загуба од 4,2 милијарди долари во првиот квартал, кога биткоинот падна за 12 отсто.

Пред сметководствената промена, „Стратеџи“ ги класифицираше своите биткоини слично на нематеријални средства како патенти или трговски марки. Таа ознака ја принуди „Стратеџи“ трајно да ја намали вредноста на своите богатства кога цената на биткоинот ќе паднеше под претходната сметководствена вредност. Добивките можеа да се признаат само кога се продаваа токени.

Во моментов нема коментари за веста. Биди прв да коментира...

Остави коментар