Состанок на ОБСЕ: Блинкен си замина, Лавров пристигна во Скопје

Во Скопје вечерва се одржа неформална вечера на министрите за надворешни работи кои учествуваат на 30. Министерски совет на Организацијата за безбедност и соработка во Европа – ОБСЕ, чиј домаќин е шефот на дипломатијата на Северна Македонија и претседавач на ОБСЕ Бујар Османи.

На вечерата присуствуваат министри за надворешни работи на САД, на ЕУ, на земјите членки на ЕУ, Велика Британија, на земјите партнери од Медитеранот, Блискиот Исток и од Азија.

На најголемиот политичко-дипломатски настан што се случил во државава од осамостојувањето, ќе учествуваат 76 делегации од 57 земји членки и држави партнери на Организацијата.

На Министерскиот состанок се очекуваат одлуки за изборот на претседавач за 2024 година, за што на подготвителниот состанок на амбасадори на 57-те земји членки неделава во Виена е постигнат консензус тоа да биде Малта, а треба да се одлучува и за буџетот, како и за именувања за клучните позиции во институциите на ОБСЕ.

Средба Борел - Ковачевски/МИА

Претседавањето на Северна Македонија со ОБСЕ сериозно придонесе кон зајакнато позиционирање на земјава во меѓународни рамки како конструктивен актер за стабилност и соработка, констатираа вечерва на состанокот премиерот Димитар Ковачевски и потпретседателот на Европската комисија и висок претставник на Европска Унија за надворешни работи и безбедносна политика, Жозеп Борел.

Високиот претставник на Европската Унија, Жозеп Борел го поздрави успешното претседавање на Северна Македонија со ОБСЕ и се заблагодари што Северна Македонија е целосно усогласена со надворешната и безбедносната политика на Европската Унијата.

Воедно, ја поздрави непоколебливата поддршка што Северна Македонија ѝ ја дава на Украина.

Прва посета на Блинкен на Македонија

Претседателот на Владата на Република Северна Македонија, Димитар Ковачевски попладнево во Скопје се сретна со американскиот државен секретар Ентони Блинкен при што била реафирмирана американската поддршка за членство на земјава во ЕУ, придонесот како НАТО-сојузник, а била поздравено и успешното претседавање со ОБСЕ.

„САД високо го ценат придонесот на Република Северна Македонија како НАТО сојузник, но и во регионален контекст како фактор на стабилност на Западен Балкан. Државниот секретар посочи дека САД ќе продолжат да ја поддржуваат Северна Македонија во нејзините следни чекори кои треба да го обезбедат членството во ЕУ и искажа голема почит за храбрите и државнички одлуки кои Владата ги презема за исполнување на таа цел, се посочува во соопштението од Владата.

Блинкен на состанокот на министерскиот совет на ОБСЕ во Скопје/МИА

„Завршивте исклучително добра работа, успеавте да ја проширите мисијата на ОБСЕ и покрај значителните пречки, порача американскиот државен секретар Ентони Блинкен на средбата попладнево во Скопје со министерот за надворешни работи и претседавач на ОБСЕ Бујар Османи.

„Прекрасно е да се биде тука, прекрасно е да се биде во Северна Македонија, прекрасно е да се биде со сите наши колеги. Доаѓам од НАТО, што е соодветно бидејќи Северна Македонија е силен сојузник и партнер на САД и на сите наши сојузници во Алијансата, и тоа секојдневно го гледаме. Морам да ви кажам колку сме благодарни на вашето претседавање со ОБСЕ во многу тежок период. Завршивте исклучително добра работа, успеавте да ја проширите мисијата на ОБСЕ и покрај значителните пречки. Знам дека бевте подготвени да продолжите, но мило ми е што Малта ја преземе палката“, рече Блинкен.

Средба Блинкен - Османи/МИА

Како што соопштија од МНР, на оваа прва посета на државен секретар на САД на Северна Македонија во фокусот на разговорите беа актуелните меѓународни случувања, со посебен фокус на состојбите во Украина. При тоа соговорниците упатија силна осуда за руската воена агресија и цврста поддршка за украинскиот народ.

Средбата на министерот Османи со државниот секретар Блинкен, се подвлекува, е од историски карактер бидејќи станува збор за прва посета на Државен секретар на САД на Министерството за надворешни работи на Северна Македонија. Блинкен вечерва од Скопје замина за Израел.

Блинкен вечерва замина за Израел

„Посетата е уште една потврда за новиот однос меѓу двете дипломатии што започна минатата година кога Османи и Блинкен заеднички го лансираа Стратешкиот дијалог меѓу Северна Македонија и САД, во Вашингтон“, се наведува во соопштението од МНР.

Борел: Лавров ќе чуе зошто Русија е осудена и излирана

Министерскиот состанок во Скопје го одбележува токму присуството на првите дипломати на САД и Руската Федерација Ентони Блинкен и Сергеј Лавров. Двајцата се разминаа. Блинкен вечерва отпатува за Израел, а Лавров малку по неговото заминување, нешто пред полноќ пристигна на скопскиот аеродром.

Потпретседателот на Европската комисија и висок претставник на ЕУ за надворешни работи и безбедносна политика Жозеп Борел вечерва изјави дека министерскиот состанок на ОБСЕ во Скопје ќе биде добра прилика министерот за надворешни работи на Русија Сергеј Лавров, да чуе директно од учесниците зошто Русија е осудена и изолирана, а потоа ќе може да се врати во Кремљ и да пренесе дека ЕУ и ОБСЕ остануваат обединети во осудувањето на агресивното и незаконско однесување на Русија.

„Јас сфаќам дека некои земји учеснички не беа воодушевени од вашата одлука да присуствува министерот Лавров. Ги сфаќам затоа што со незаконската војна на Русија против Украина таа ги поткопува истите начела на ОБСЕ и ги нарушува законите и поради тоа се соочува со меѓународни санкции и со меѓународна изолација. А сепак вашата одлука да дозволите Лавров да учествува е во согласност со нашата заедничка цел да го одржиме мултилатерализмот жив и Лавров треба повторно да слушне од сите зошто ја осудуваме Русија и зошто ја изолираме. Ова е добра прилика за него да чуе директно од учесниците на овој состанок зошто Русија е осудена и изолирана, а потоа ќе може да се врати во Кремљ и да му каже на господарот на Кремљ дека ЕУ и ОБСЕ остануваат обединети во осудувањето на агресивното и незаконско однесување на Русија. Тоа ќе биде навистина многу корисно од оваа гледна точка“, рече Борел по билатералната средба со премиерот Димитар Ковачевски.

Полска денеска соопшти дека нема да присуствува на состанокот на ОБСЕ во Скопје поради тоа што е поканет рускиот министер за надворешни работи Сергеј Лавров. Претходно учеството го откажаа Украина и балтичките земји.

Во моментов нема коментари за веста. Биди прв да коментира...

Остави коментар