Американските Федерални резерви (Фед) соопштија во средата дека ја задржуваат каматната стапка непроменета, четврти пат по ред, и продолжуваат да го следат влијанието на војната меѓу САД и Израел врз зголемувањето на цените. Федералните резерви објавија кратка и едноставна изјава, по желбата на новиот претседател Кевин Ворш, централната банка на САД да зборува помалку.
Претседателот Доналд Трамп долго време се обидуваше да изврши притисок врз поранешниот претседател на Фед, Џером Пауел, да ги намали каматните стапки. Тоа не му успеа. Но, Трамп минатата година вети дека следниот лидер на централната банка ќе биде „некој што верува во пониски каматни стапки, и тоа за многу пониски“.
Сепак, Трамп не доби намалување на стапката на овој состанок.
Добро утро, ви пишува Игор Петровски од дигиталната редакција на „Блумберг Адрија“. Ова се петте вести што ги издвоивме за почеток на денот:
Златниот Меси стана опсесија: сликичките на „Панини“ покренаа „мини економија“ во Аргентина
Додека Лионел Меси се подготвуваше да излезе на теренот за првиот натпревар од неговото шесто и последно Светско првенство во фудбал, Аргентинците бркаа поинаков трофеј: неговата недостижна златна сликичка. Овогодинешниот албум на „Панини“ има простор за 980 сликички, а италијанскиот производител нуди 20 дополнителни ретки колекционерски сликички со најпопуларните играчи, секоја достапна во виолетова, бронзена, сребрена и златна боја.
Илјадници деца и возрасни се собираат секој викенд пред првенството во „Парк Ривадавија“ (Parque Rivadavia), историски парк во центарот на Буенос Аирес, каде што колекционерите разменуваат поштенски марки, монети, а сега и сликички „Панини“ за да ги наполнат своите албуми со ликовите на сите играчи што ги претставуваат 48-те екипи што се натпреваруваат на Светското првенство.
Дали Јутјуб стана нов регрутен центар на Холивуд?
Во последните години сѐ поголем број автори од Јутјуб постигнуваат забележителни успеси во кината, особено во хорор-жанрот. Филмот „Опсесија“ (Obsession) на режисерот Кари Баркер од мај наваму бележи невообичаен пат на киноблагајните, остварувајќи поголеми приходи во вториот и третиот викенд од прикажувањето благодарение на препораките од публиката.
Гледани како целина, овие примери покажуваат дека Јутјуб повеќе не е само платформа на која младите автори ја претставуваат својата работа. Тој стана своевидна дигитална филмска академија што наградува многу од вештините клучни за успех на жанровскиот филм: оригинални идеи, ефикасно раскажување и способност вниманието на публиката да се освои речиси веднаш.
Анализа: зошто осигурителниот пазар има пад од 4,4 отсто во првиот квартал
После неколку последователни години на континуиран раст, домашниот осигурителен пазар забележува пад во првите три месеци годинава, покажуваат податоците од Агенцијата за супервизија на осигурувањето (АСО). Во првиот квартал, бруто полисираната премија (БПП), односно вредноста на сите договорени полиси кај осигурителните компании е помала за 4,38 отсто во однос на истиот период лани, и изнесува 4,7 милијарди денари (околу 76,5 милиони евра).
За падот на целиот осигурителен сектор всушност најмногу придонесува неживотното осигурување, коешто сочинува скоро 82 отсто од целиот пазар и каде што има пад на БПП од 7,49 отсто, на 62,6 милиони евра. Кај неживотното осигурување, пад од 37,2 отсто има кај осигурувањето на имот, во чии рамки, кај осигурувањето од пожар и други опасности има пад од цели 51,34 отсто.
Конкуренција на менувачкиот пазар: Колку можете да заштедите ако прошетате неколку километри?
Во периодот пред летните одмори живнува прометот во менувачниците во Македонија бидејќи граѓаните вообичаено купуваат претежно евра, но и други девизи за да располагаат со готовина при патувањата, без оглед на тоа што и во странство се повеќе се употребуваат и платежни картички.
При тоа, некои внимаваат, но други не толку на девизниот курс по кој се купуваат евра во различни менувачници. Нашето истражување покажа дека вреди да се поминат неколку километри повеќе од една до друга менувачница, бидејќи конкуренцијата ги тера да нудат различни девизни курсеви.
Кои се најчестите причини за исклучување на компаниите од котација на Македонската берза?
Во последниве години, Македонската берза, слично како и другите регионални пазари на капитал, се соочува со намалување на бројот на котирани компании. За разлика од поразвиените пазари, каде што често се случуваат исклучувања од берзата поради одлуки на сопствениците да се повлечат поради високи трошоци или ниска ликвидност, на македонскиот пазар преовладува малку поинаков модел: голем број компании исчезнуваат од берзата поради стечај.
Најчеста причина за исклучување од Македонската берза во последните пет години беше отворањето на стечајна постапка. Компании како што се „Бетон“ од Скопје, „Сковин“, „Идевелоп“, „РЖ Институт“ и „Карбо Нова“ од Крива Паланка ја напуштија берзата на овој начин.
.webp){kind=icon}
