text size
Пазарот на обврзници вчера беше во фокусот на инвеститорите поради рекордните зголемувања на трошоците за задолжување на економските велесили. Трошоците за долгорочно задолжување на Обединетото Кралство достигнаа 6,02 проценти за првпат по речиси три децении, со што земјата стана првата економија од групата Г7 што плаќа толку висока стапка уште од времето кога беснееше кризата со еврото во 2012 година. Истовремено приносот на 10-годишните американски државни обврзници порасна за четири базични поени, на 5,33 отсто, надминувајќи го врвот од 2007 година. Приносот на 30-годишните американски обврзници исто така е на највисокото ниво од 2002 година.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Ветерните централи во Европа уриваат рекорди - ќе се приклучи ли Македонија на трендот
Ветерната енергија годинава ќе урне уште еден рекорд. Според последните прогнози, до крајот на годината се очекува да бидат инсталирани 24 гигавати нови капацитети од ветерна енергија. Преку нив со струја ќе се снабдуваат 20 милиони европски домаќинства.
Само во првата половина од годината во Европа беа инсталирани 8,8 гигавати нови капацитети за производство на електрична енергија од ветер, што е 30 отсто повеќе во споредба со истиот период лани. Овие турбини можат да произведат доволно електрична енергија за снабдување на околу 7 милиони европски домаќинства и да заменат увоз на фосилни горива еквивалентен на 25 танкери со течен природен гас годишно, пишува во последниот извештај на „Винд Европа“ (Wind Europe).
Колкава грижа носи нивото на пополнетост на европските складишта на гас?
Европските складишта за гас влегуваат во новата грејна сезона со најниско ниво на пополнетост во последните неколку години, што на прв поглед предизвикува страв од повторување на енергетската криза. Сепак, површната споредба со 2022 година може да залаже: германската индустрија денес троши значително помалку гас, а структурата на снабдувањето е променета.
Нивото на пополнетост на подземните складишта за гас во Европската Унија изнесува приближно 71,3 проценти, а во Германија само 57,7 проценти, според податоците на ГИЕ (Gas Infrastructure Europe) од 29 септември 2026 година. Притоа, Германија има околу 142 TWh гас во складиштата, па нејзиното ниско ниво на пополнетост е важно и за европскиот просек, бидејќи таа има најголем капацитет за складирање во ЕУ.
Каматите на хипотекарните кредити во САД се искачија на 7,28 проценти
Каматните стапки за хипотекарните кредити нагло пораснаа до највисокото ниво од ноември 2023 година, дополнително оптоварувајќи го американскиот пазар на недвижности, кој веќе е попречен од високите трошоци за позајмување. Просечната каматна стапка за 30-годишен кредит со фиксна камата се зголеми за 25 базични поени во однос на претходната недела, достигнувајќи 7,28 проценти, соопшти „Фреди Мек“ (Freddie Mac) во четвртокот.
Ова беше најголемиот неделен пораст од октомври 2022 година. Пред една година, стапката изнесуваше 6,34 проценти. Каматните стапки над 7 проценти силно влијаат врз побарувачката на пазарот којшто веќе е отежнат поради цените на домовите кои остануваат блиску до рекордните нивоа.
„Нетфликс“ го менува рецептот за раст: спорт, кино и вештачка интелигенција
„Нетфликс“ не расте со темпото што го посакува раководството, па стриминг-гигантот бара нови начини да го зголеми времето што корисниците го поминуваат на платформата и да привлече повеќе приходи од реклами. „Генерално, не растеме толку брзо колку што сакам и работиме тоа да го забрзаме“, изјави коизвршниот директор на „Нетфликс“, Тед Сарандос, на конференцијата „Блумберг скринтајм“ во Лос Анџелес.
Ангажманот на корисниците во последниот период пораснал за два процента, иако приходите во секој регион се зголемиле со двоцифрена стапка. Компанијата затоа се обидува да ја прошири понудата надвор од своето традиционално јадро - филмовите и телевизиските серии.
Вработените во „Гугл“ се сомневаат во способностите на новиот Џемини 4
„Гугл“ (Google), дел од „Алфабет“ (Alphabet Inc.), почна да го воведува Џемини 4 Аргон, својот долгоочекуван водечки модел на вештачка интелигенција, но компанијата се соочува со внатрешен скептицизам за тоа колку добро функционира во клучни области, како што е програмирањето.
„Гугл“ го претстави моделот во средата пред мала група доверливи партнери за сајбербезбедност и соопшти дека ќе го прошири пристапот по дополнителни тестирања, почнувајќи од претплатниците што плаќаат. Компанијата соопшти дека Џемини 4 постигнал водечки резултати на неколку референтни тестови, меѓу кои и подобар резултат од моделот Астра на „Опен еј-ај“ (OpenAI) на тест што ги мери безбедносните вештини.
.webp){kind=icon}
