Со наближувањето на март полека истекува рокот во кој требаше да се реши дали и за колку ќе се зголеми минималната плата во Македонија. За таа цел прашуваме до каде е процесот на преговори меѓу надлежните, работодавците и синдикатите околу оваа проблематика и дали е можно минималецот да остане на сегашното ниво.
Откако од Европската унија стигна веста дека исплатата од парите од Планот за раст ќе се одложи за втората половина од годинава анализираме дали тоа може да ги замрси плановите на Владата во однос на новите задолжувања кои се неопходни за враќање на старите долгови и покривање на буџетскиот дефицит.
Во собраниска процедура влезе предлог-законот за измена на Законот за заштита на потрошувачите кој предвидува можност цените во малопродажбата да бидат напишани/испечатени на амбалажата на производите и да се објавуваат на дневна основа на интернет за да се овозможи транспаретност и избегнување на манипулации од страна на трговците. Истражуваме какви се искуствата во други земји во однос на транспаретноста за цените и заштитата на потрошувачите.
Во време на значителни демографски промени и стареење на населението анализираме каква перспектива од бизнис аспект имаат домовите за нега на стари лица, каква е сегашната состојба, што нуди државата, а што приватниот сектор.
Под лупа ги ставаме трговските односи на Македонија со Украина и Русија, истражуваме дали има некакви промени во изминативе три години откако изби војната, но и какви промени може да се очекуваат од разгорувањето на глобалната трговска војна поттикната од новите царини.
Во 2024 година, 77 проценти од корисниците на интернет во ЕУ купиле или нарачале стоки или услуги за лична употреба преку интернет во претходните 12 месеци, што е зголемување од 59 проценти во 2014 година. Откриваме какви се трендовите кај нас и што се купува најмногу онлајн.
Истражуваме каква е состојбата со фондовите со ризичен капитал во земјава и регионот и кои се најголемите односно највредните подароци во акции од македонските компании во текот на минатата година.
.webp){kind=icon}
