Поради маглата вчера на Меѓународниот аеродром Скопје имаше намалена видливост што резултираше во периодот од 00:00 часот на полноќ до 12 часот напладне, авиокомпаниите да откажат 20 лета и да пренасочат еден лет. Согласно временската прогноза од Метео-службата на М-НАВ, намалена видливост се очекува и во текот на денешниот ден.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Време ли е за рефинансирање на станбените кредити: Македонската инфлација го има зборот
Европската банка ги задржа каматните стапки на исто ниво. Ова е четврти состанок по ред на кој централните банкари се одлучуваат за статус кво затоа што преовладува мислењето дека каматите се на „добра позиција“. Депозитната стапка падна на два отсто на 11 јуни годинава, откако осум пати пред тоа творците на политики во Франкфурт намалуваа по четвртина поен на секој состанок почнувајќи од јуни 2024 година, кога стапката првпат падна од нивото од 4 отсто.
Малкуте поборници на тезата дека е потребно уште едно намалување пред состанокот во четвртокот се повлекоа. Дали ваквите проекции значат дека заврши периодот на ниски трошоци за задолжување и дали токму овој момент, пред евентуални нови зголемување на каматите, треба да се искористи за рефинансирање на кредитите? Аналитичарот на „Блумберг Адрија“ Матеј Вујаниќ вели дека репрограмирањето на обврските во моментов може да биде исплатливо.
Голема победа на пазарите во развој годинава, какви се прогнозите за следната?
Инвеститорите во акции од пазарите во развој имаат причина повеќе за веселба за време на новогодишните празници бидејќи како што се наближува крајот на 2025 година така станува јасно дека тие прв пат по неколку години ќе ја завршат годината со многу подобри резултати отколку пазарите во развиените економии.
Растот на пазарите во развој годинава го предводеа Јужна Кореја, Јужна Африка, Полска, Бразил, Мексико и Кина, а тоа најдобро го отсликуваат главните берзански индекси во овие земји. Клучното прашање меѓу светската инвеститорска јавност сега е дали позитивниот моментум на пазарите во развој ќе продолжи и во 2026 година. Повеќето аналитичари од реномирани финансиски институции предвидуваат розови времиња за пазарите во развој.
Промената во модерното војување носи раст на акциите на одбранбените компании
Во минатото, воените компании им се допаѓаа на инвеститорите во акции поради нивната цврстина - предвидливи приходи, солидни маржи на профит и сигурни дивиденди. Но, времињата се менуваат. Иако гигантите за оружје како производителот на борбени авиони „Локхид Мартин“ (Lockheed Martin Corp) и производителот на ракети „РТХ Корп“ (RTX Corp) сè уште заземаат клучен дел од повеќето портфолија на акции, тие во последно време добија конкуренција - агилни почетници кои наликуваат повеќе на технолошки фирми со високи вреднувања и ветувања за брз раст на профитот.
Новодојдените на врвот на рангирањето - по пораст на цената на акциите, ако сè уште не и на пазарната вредност – ги вклучуваат производителот на дронови „Кратос Дифенс и Секјурити Солушнс“ (Kratos Defense & Security Solutions Inc), компанијата за сателитско разузнавање „Планет Лабс“ (Planet Labs PBC) и компанијата за анализа на податоци „Палантир“ (Palantir Technologies Inc). Секоја од нив имаше барем двојно зголемување на акциите оваа година. „Аеро Виронмент“ (AeroVironment Inc) и „Блек Скај Технолоџи“ (BlackSky Technology Inc) исто така понудија силни приноси.
Пазарите маршираат во празниците: ВИ го крена Волстрит, централните банки главен белег во Европа
Берзите ја завршија последната недела пред Божиќ подобро отколку што ја започнаа. Растот на технолошките акции кон крајот на неделата му помогна на S&P 500 да ја заврши неделата во плус. Во исто време, на пазарите влијаеја голем број поволни макроекономски податоци во Соединетите Американски Држави, како што се подобрувањето на расположението на потрошувачите во САД пред Божиќ и ноемвриските податоци за инфлацијата.
S&P 500 доби 0,9 проценти во петокот доволно за неделен раст, објави Блумберг. Секторот со најдобри перформанси беше информатичката технологија, при што акциите поврзани со вештачката интелигенција се издвојуваат. „Енвидија“ (Nvidia) доби зелено светло да ја заврши својата инвестиција во „Интел“ (Intel), а акциите на „Оракл“ (Oracle) скокнаа за 6,6 проценти - најмногу од септември - бидејќи пазарот го гледа потенцијалното преземање на „Тикток“ (TikTok) како позитивен развој на настаните. Nasdaq 100 порасна за 1,3 проценти, а Dow Jones за 0,4 проценти.
Лек за продуктивноста: Компаниите мора да постават цели
Во малите и средните претпријатија еден ист човек извршува повеќе задачи и тоа е една од причините за ниската продуктивност, вели Васко Карангелески, бизнис-советник од „Брулз“ (Brulz), кој беше дел од панел-дискусијата „Продуктивност – замки и решенија“ што неодамна ја организираше „Блумберг Адрија“. „Кога ќе ми кажат имаме проблем со луѓето, прво велам ајде да видиме дали се соодветно обучени и дали имате соодветни процеси, а потоа ќе зборуваме за вештините на лицата на работните позиции“, вели Карангелески.
„Во малите и средните претпријатија имаме ограничени ресурси, еден човек работи повеќе задачи и ние не можеме да кажеме дека правиот човек е на правото место со најголем дел од својот капацитет затоа што тој најчесто има и дополнителни активности. Затоа мислам дека тоа што недостасува е на организациско ниво. Од една страна го имаме тоа што е статичен, формален дел од работното место, работни задачи, опис на работно место итн., а реалноста на работата е многу пофлуидна и проблем е што ние не ги ажурираме овие два момента“, објаснува Карангелески.
.webp){kind=icon}
