.webp){kind=icon}
Потпретседателот на Европската централна банка (ЕЦБ), Луис де Гвиндос, изјави дека најголем проблем со кој што се соочува економијата во Европа е рекордната инфлација, која што се повеќе се распространува и која што претставува закана за инвестициите и за трошењето пари за производи за широка потрошувачка.
„Намалувањето на инфлацијата е многу значајно за да ја подобриме економската состојба“, рече Гвиндос денеска во Мадрид.
Надлежните од ЕЦБ сигнализираа дека каматните стапки треба да продолжат да растат во борбата против најбрзиот раст на цените откако е воведено еврото. Кон крајот на неделава се очекуваат и септемвриските податоци за инфлацијата, после што ќе се донесе одлука за тоа колку ќе се зголеми референтната каматна стапка.
Економистите предвидуваат уште еден рекорд за еврозоната и очекуваат ново покачување од 75 базични поени. Членот на Управниот совет на ЕЦБ, Мартинс Казакс, изјави во петокот дека според него во моментов таков потег е сосема соодветен.
Гвиндос изјави дека бројот и обемот на зголемување на каматните стапки зависи од новите податоци. Исто така, рече дека економијата во еврозоната значајно ќе забави во третиот и четвртиот квартал годинава, дека ЕЦБ сака да ја смири инфлацијата и дека треба подобар фокус на фисклната политика во време на енергетска криза.
