Британската централна банка (БОА) предупреди дека ако економските услови продолжат да бидат вака тешки, некои домаќинства во Обединетото Кралство може да се соочат со притисок во врска со отплатата на долговите во размер како пред финансиската криза од 2008 година.
„Некои домаќинства ќе бидат пред голем предизвик за управување со домашниот буџет во услови на раст на трошоците за основните животни намирници проследено со зголемени каматни стапки“, велат од Одборот за финансиска политика на централната банка во својот тримесечен извештај, објавен денеска.
Иако домаќинствата сега се во поповолна позиција отколку што беа пред кризата во 2008 година, сепак ако трошоците за финансирање на кредитите продолжат да растат, дел од нив може да се соочат со притисок поради своите хипотекарни и други трошоци, кои се слични како пред финансиската криза, велат од БОА.
Заработките на компаниите, исто така, ќе бидат под притисок поради високите трошоци за кредити, смета банката. Според нивната анализа, зголемените трошоци и намалената побарувачка ќе ја оптовари заработката на многу компании, посебно на тие со голема изложеност на цените на енергијата и горивата.
Централната банка беше принудена да ги прошири, односно продолжи своите итни мерки во обид да го стабилизира хаосот на пазарот на обврзници. Интервенцијата следеше по распродажбата во понеделникот, во која што приносите поврзани со инфлацијата во Обединетото Кралство пораснаа најмногу во историјата.
„Иако можеби не е разумно да се очекува од пазарните соработници да се осигураат против сите екстремни пазарни исходи, важно е од оваа епизода да се извлечат поуки и да се обезбеди соодветно ниво на отпорност“, велат од БОА.
Просечните 5-гдишни хипотеки за недвижнини со фиксна каматна стапка вчера пораснаа на 6,29 отсто, најмногу од ноември 2008 година, пресметаа од „Moneyfacts Group Plc“. Двегодишните договори со фиксна каматна стапка се зголемија на 6,43 отсто, најмногу од август 2008 година.
Се чини дека цените за куќи и станови во Обединетото Кралство следната година ќе паднат бидејќи трошоците за отплата на хипотеките веќе не се поевтини од изнајмувањето, сметаат од „UBS Group AG“. Отплатата на хипотеките, како удел во приходите на домаќинствата, порасна на 40 отсто по зголемувањето на каматните стапки, напишаа аналитичарите Грегор Куглич и Маркус Кол. Според нив, тоа е клучна точка што ќе резултира со пад на цената на недвижнините за 10 проценти во текот на следната година.
.webp){kind=icon}
