„Роснефт“ ја тужи Германија за преземање контрола врз нафтените ресурси

Руската нафтена компанија „Rosneft PJSC“ поднесе правна тужба против германската влада минатиот месец бидејќи сметаат дека властите се обидуваат да ја преземат контролата над нивниот имот во земјата. Владејачката коалиција на канцеларот Олаф Шолц го оправда таквиот чекор со тврдењето дека тоа е неопходно да се стори за да се заштитат залихите на енергија и да се осигура иднината на рафинеријата „Schwedt“, во близина на полската граница, која што ги снабдува со гориво Берлин и поголемиот дел од источна Германија.

„Rosneft“ тврди дека не се исполнети условите за барањето за дозвола за присилно управување, што е наведено во германскиот Закон за енергетска безбедност и дека компанијата во целост ги исполнува своите обврски околу испораките. Исто така, се наведува и дека новите прописи, кои што се усвоени летово, се противуставни.

„Rosneft“ секогаш ги исполнуваше своите обврски во Германија и постоечките договори во трговската пракса без политичко влијание и независно од конфликтот во Украина, се наведува во објавата што правниот застапник на компанијата ја напиша на социјалните мрежи.

„Rosneft“ поднесе тужба против германската Сојузна управа пред Судот во Лајпциг. Портпаролот на Судот ја потврди пријавата. Блумберг го контактираше германското Министерство за економија, од каде се чека за коментар.