.webp){kind=icon}
Падот на производството во еврозоната се ублажува откако почна да спласнува грчот во синџирите на снабдување и почна да забавува инфлацијата. Ова сигнализира дека економскиот пад во овој блок ќе биде помал отколку што се стравуваше. Подобри резултати од очекуваните има и во Германија, најголемиот македонски трговски партнер.
ПМИ, индексот за набавки на „СП глобал“ (S&P Global), се зголеми повеќе од очекуваното во декември, на 48,8 поени. Иако останува под прагот од 50, стапката на опаѓање на деловната активност е умерена веќе втор месец.
„Иако понатамошниот пад на деловната активност во декември сигнализира силна можност за рецесија, анализите навестуваат дека падот ќе биде поблаг отколку што се мислеше веројатно пред неколку месеци“, рече главниот бизнис-економист на „СП глобал маркет интелеџенс“ (S&P Global Market Intelligenc), Крис Вилијамсон.
Бруто-домашниот производ во 19 земји од еврозоната веројатно ќе се намали за „само помалку од 0,2 проценти“ овој квартал, вели Вилијамсон и додава дека има индикации дека стапката на опаѓање може дополнително да се намали во следниот тримесечен период. Претходната анкета укажа на пад од нешто над 0,2 отсто.
Претседателката на Европската централна банка, Кристин Лагард, во четвртокот рече дека регионот може да доживее „краткорочна и плитка“ рецесија во овој и следниот квартал, но, сепак, вети понатамошно зголемување на каматните стапки, откако последен пат вчера каматите беа зголемени за половина поен. И покрај континуираната енергетска криза, изгледите за растот во Европа станаа малку порозови благодарение на оптимизмот за Германија, нејзината врвна економија.
Клучниот производствен сектор во Германија се подобри овој месец, потпомогнат од подобрите услови за снабдување и намалувањето на стравувањата за недостиг од енергија. Само Франција забележа послаби резултати што беа поттикнати од најсилниот пад во услужниот сектор во речиси две години.
Bloomberg Mercury
Британските бизниси, пак, се подготвуваат за влошување на очекувањата за рецесија откако и производствениот и услужниот сектор паднаа во четвртиот квартал, што го поттикна првиот пад на вработеноста во речиси две години. Мерката на расположение кај менаџерите за набавки се зголеми на 49 во декември од 48,2 минатиот месец.
Што вели „Блумберг економикс“?
„ПМИ во еврозоната нема да направи многу за да ја одврати ЕЦБ од дополнителното монетарно затегнување, особено од најавеното зголемување од 50 базични поени во февруари. Тоа сугерира дека економскиот пад предизвикан од порастот на цените на енергијата, инфлацијата и заострувањето на финансиските услови не е особено длабок и дека инфлацијата останува неприфатливо висока, иако се забавува“.
Новите нарачки паднаа шести месец во еврозоната, бидејќи компаниите продолжија да известуваат за слабеење на побарувачката на клиентите, иако стапката на пад беше најмека од август. Во комбинација со подобра понуда, ова доведе и до најбавната стапка на пораст на влезните трошоци од мај 2021 година.
„Изгледите за инфлацијата се охрабрувачки“, рече Вилијамсон, иако негативната страна е што ова главно произлегува од падот на побарувачката што ја намали ценовната моќ кај многу компании и нивните доставувачи. Деловното расположение севкупно останува придушено.
Цените во еврозоната пораснаа во ноември за 10,1 отсто во однос на претходната година. Според податоците на Евростат објавени во петокот, цените се намалени за 10,6 проценти во претходниот месец, но за 0,1 процентен поен повисоко од прелиминарното читање.
По сектори, најголем пад продолжи да се забележува кај хемиските, фирмите што работат со пластика и основни ресурси, како и во секторот за финансиски услуги. Значителен пад имаше и на транспортот, но се подобрија туризмот и рекреацијата.
