Франција ќе избегне рецесија зимава, смета централната банка

Банката на Франција ја отфрли можноста за рецесија оваа зима, бидејќи нејзиното месечно истражување покажа раст посилен од очекуваниот и покрај низата надворешни шокови.

Економската активност во сите сектори напредуваше во јануари повеќе отколку што предвидуваа деловните лидери, покажува анкетата спроведена меѓу 8.500 фирми. За февруари се прогнозира дека темпото ќе забави, со благ напредок во услугите, стабилност во индустријата и пад во градежништвото.

„Француската економија забавува, но се спротивставува. Минатата есен бевме загрижени за рецесија, но ова утро, за 2023 година, мислам дека може да ја исклучам рецесијата, освен ако не се случи некој голем глобален настан“, рече утрово гувернерот на Банката на Франција, Франсоа Вилерој де Галхау, за телевизијата Франс 2.

Bloomberg Mercury

 

Економистите стануваат сè поголеми оптимисти во врска со краткорочните изгледи за втората по големина економија во еврозоната, откако таа забележа благ раст во последниот квартал од минатата година и намалување на цената на енергијата.

Националната агенција за статистика „Инсе“ (Insee) исто така ја отфрли можноста за рецесија, предвидувајќи во своите прогнози од вторникот дека економијата ќе порасне за 0,2 отсто и во првиот и во вториот квартал.

Банката на Франција рече дека обемот на нејзиното истражување сè уште не ѝ дозволува да прави прецизни прогнози, но дека растот во првите три месеци од годината треба да биде малку позитивен.

Централната банка соопшти и дека нивоата на несигурност измерени со нејзината анализа на коментарите на деловните лидери се намалиле во индустријата во јануари, а биле стабилни во услугите и градежништвото.

Француските компании се помалку загрижени за идното влијание на цените на енергијата врз активноста, а нивната процена за тешкотиите во снабдувањето падна на најниско ниво откако Банката на Франција почна да го мери влијанието на тесните грла во мај 2021 година.

Во моментов нема коментари за веста. Биди прв да коментира...

Остави коментар