.webp){kind=icon}
Европската централна банка (ЕЦБ) и во наредниот период ќе ги зголемува каматните стапки, и тоа најмалку за уште 100 базични поени, вклучувајќи го овде и зголемувањето од оваа недела, се наведува во анализата на главниот аналитичар на „Блумберг Адрија“, Андреј Кнез. ЕЦБ одлучува за каматите на состанокот в четврток.
„Очекуваме ЕЦБ на состанокот оваа недела да ги зголеми сите каматни стапки за 50 базични поени. Клучната причина за натамошните зголемувања на каматните стапки првенствено произлегува од неодамнешните соопштенија за изненадувачки висока базична инфлација на ниво на еврозоната, што ја одразува сè уште силната побарувачка“, анализира Кнез.
Според него, во фокусот во моментов не е одлуката што ќе биде донесена в четврток, туку комуникацијата што се одвива во седиштето на ЕЦБ и која оди кон тоа каматите да растат и во наредниот период „најмалку за дополнителни 50 базични поени во наредните месеци, со потенцијал за уште поголемо затегнување во зависност од развојот на базичната инфлација“, вели нашиот аналитичар.
Bloomberg Adria
Банката „Силикон валеј“ – дополнителен проблем
Пропаѓањето на американската банка „Силикон валеј“ (СВБ) е нов неочекуван елемент, вели Кнез.
„Иако колапсот на американската банка е концентриран на реакциите на американските регулатори, не треба да се игнорира нестабилноста на финансиските пазари предизвикана од тектонските поместувања што ги носи банкротот на толку големи банки. Имено, во светло на настаните околу СВБ, фокусот е ставен на конкретни показатели за стабилноста на финансиските пазари, како што е т.н. ТЕД-распон помеѓу тримесечен либор во американски долари и тримесечни приноси на американското министерство за финансии. Нестабилноста на финансиските пазари доведува до побарувачка на посигурни средства, што во овој случај е краткорочниот долг на американската влада“, вели нашиот главен аналитичар.
Bloomberg
Според него, од друга страна, зголемената недоверба меѓу комерцијалните банки доведува до зголемување на цената на меѓубанкарското необезбедено задолжување, во случајов стапката на либор во американски долари, со што се зголемува разликата во цената помеѓу двата финансиски инструменти.
„ТЕД-распонот во последните денови се зголеми за 17 базични поени, сега изнесува 25 базични поени, веќе покажува тенденција на стабилизирање и е далеку од врвовите од над 300 базични поени забележани во втората половина на 2008 година, односно по распадот на банката ’Леман брадрс’“, анализира Кнез.
„Во следните недели потезите на американските регулатори за стабилизирање на пазарот ќе бидат внимателно следени, а во случај нестабилноста да ескалира, може да се случи пресврт во потезите на ЕЦБ и ФЕД во смисла на дополнително монетарно затегнување“, вели Андреј Кнез, главен аналитичар на „Блумберг Адрија“.
